1. يومين ولا واصله ال4 جوازات الباقه

السلام عليكم...
سبق وان كتبت لكم عن اجراءات استخراج الفيزا الشنجن من دبي:واليوم بكمل لكم قصة ما جرى بالنسبة للحصول على الفيزا...
بعد ما تقدمت للحصول على الفيزا لي وعائلتي 7 اشخاص تمت الموافقة وبعد 5 ايام وصلوا لي 3 جوازات سفر فقط عن طريق شركة ارامكس، وباقي ال 4 جوازات وين؟
تواصلت مع القنصلية الالمانيه عن طريق المراسلة بالايميل ردوا على بسرعه وقالوا طرش ارقام الجوازات المفقودة طرشتها لقوها عندهم بس المعامله مجمده الى حين احضر الهم جوازات ابنائي القديمة...
ملاحظه :- علما اني قد وحدت كل جوازاتنا الاصدار والانتهاء من سنة وشوي تقريبا..
سرت الجوازات ابي احضر الجوازات قالوا خلاص مب موجودات انعدمن الحل؟
قالوا رسالة لمن يهمه الامر خذتها وذهبت الى المكتب قبلوها..

يومين ولا واصله ال4 جوازات الباقه

بس للاسف عطوا عيالي 3 شهور فقط بينما انا وامهم واختهم الكبرى 3 سنوات!!!
رحت من الفجر القنصليه وكلمتهم جابوا لي الموظف اللي عمل لي الفيزا مال العيال قام يتفلسف وقال انته متى رحت المانيا وجاوبته غير قال وين سكنت جاوبته انحرج قال عندك فاتورة الفندق قلت له انا من سنه كنت فالمانيا تتوقع اني احتفظ بفاتورة الفندق مثلا ؟
قال نعم عادي!!!
سالته اكيد انته متعشي في مطعم قبل اسبوع مثلا هل عندك فاتورة المطعم الحين؟ تغير وجهه وبدأ يستعبط وقال زين عندك صورة وحده لالمانيا بما انك تقول زرت المانيا؟
فاجأته وقلت بجيب لك 400 صورة احمر واخضر وما عرف شو يقول؟ والناس فالقاعه تضحك واتابع الموقف حتى ربعه اللي على الكونتر مستغربين!!!
قلت له اذا جبت الصور بتصدر لي فيزا ل3 سنوات قال ما اقدر اوعدك قلت له اذا لا تتكلم معاي انا اتكلم مع رجال وقولهم لازم يكون افعال سحب ويهه وراح ما عرف شو يقول( على فكره الموظف الماني)
بعدين رحت وزارة الخارجه بدبي وعطوني رسالة ما قصروا وعطوني كرت من معالي نائب وزير الخارجه لمقابلة نائب القنصل الالماني رحت له وقابلني واعتذر عن موقف الموظف وقال راجعني بعد رجوعك بالسلامه وعطاني كرته الخاص وقال انا اوعدك اعطيك فيزا 3 سنوات لعيالك اسوة باللي حصلوا على ال3 سنوات ووقع لي على رسالة وزارة الخارجية
قال بس بتدفع رسوم مرة ثانيه اسمح لي هذا قانون دولتنا قلت مب مشكلة ووصلني للباب والله ودعني..
هذا اللي حصل بالضبط
ومن هنا حبيت اشكر الاخت السكرتيرة الموجودة في وزارة الخارجة فدبي بمساعدتي بسرعة فائقة وباتصالات مباشرة مع القنصلية في نفس الوقت واللحظه..