1. مساكم الله بالخير ولا صبحكم الله بالخير


2. المصيبة ماادري شلون ابدأ


3. هذه صورة على الطريق


4. ومااقدر اقول ساعتها الا سبحان الله العظيم ويالله ترزقنا الجنة


5. بالختام

بسم الله الرحمن الرحيم

مساكم الله بالخير ولا صبحكم الله بالخير

المصيبة ماادري شلون ابدأ

اكثر الأعضاء ماقصروا بغوانزهو والطريق لغوانزهو حتى بعضهم ماشاءالله عليه صار يوصف بالمتر " تمشي ثلاثمية متر وتلف يمين بعدين يسار تلقى حاجتك " ماشاءالله عليهم والله لايضرهم لاباكر يضيعون يقولون لقطنا هالأشهب
الزبدة ياطويلين العمر كانت رحلتنا تحديداً 21 يوم انا و اخوي وكانت السفرة سياحة واستطلاع وبعد ماشفنا بعض الأسواق والمراكز التجارية لاحظنا كثر الإعلانات على الباصات شلالات وطبيعة وأخوكم بالله جاي من صحاري السعودية وتفرك كبده على شوفة الشعيب شلون شلال بكبره المهم عرفنا الشركة اللي مسويه هالدعايا وهي قريبه من فندقنا وهو قريب من فندق بارك فيو نسيت والله أسم الفندق لكن سعره كان 150 رمبي.
كنا نتمشى العصريه على رجلينا ومرينا من عند الشركة وقلنا خلنا نشوفهم وش عندهم دخلنا وسلمنا " كثر منها سلمنا " هالو هالو وحصلنا موظفه تكلم إنجليزي وقامت ترطن مع اخوي وانا والله ماادري وش الطبخة المهم قال زبدة الحكي أنهم عندهم رحلات سياحية داخل الصين مع قروبات وعليك تحدد المنطقة وعليهم تحديد السعر أنا ماصدقت خبر وشفت صورة شلال وشجر قلت نبي هالمنطقة قال هذه قالت ب 190 رمبي وتكون الرحلة بالباص مدة ثلاث ساعات دفعنا الفلوس وقالت الرحلة تكون الساعة 7 الصباح من هنا والعودة الساعة 7 المساء واعطتنا ورقه وخذت رقم الجوال وقالت نتصل بكم الليلة نحدد لكم الباص طلعنا من عندهم سفري لكارفور وشرينا جبن وتست وبعض العزبه " ياحليل عزبتنا " ورجعنا للفندق وعيّنا من الله خير واتصلوا علينا تقريبا الساعة 8 بالليل وقالوا باصكم رقم 7 ونمنا ويوم جت الساعة 7 حضرنا عليهم ونبدأ معكم بالصور
هذه صورة الشركة والبنت اللي واقفه لابسه برتقالي هذه أحد الموظفات ومعاها رقم الباص التابع لها يجمعون كل شلة مع مرشد
هذه صورة باصات الشركة وبالتحديد الباص اللي ركبنا فيه
هذه مرشدنا وهو جالس يتعرف على أسامينا ويعرفنا على بعض

هذه صورة على الطريق

بعد ماقطعنا حوالي الساعتين ونصف وقربنا للمنطقة تغير الطريق كله طلعات ونزلات بوسط الجبال وهو صراحة يخوف إذا كان سواق الباص مثل سواقنا مرجوج زين بس اللي مايمشي على كفرتين والظاهر اني ساعتها خايف ولا مستغرب من الطريق نسيت اصوره
هنا وصلنا للمنطقة وهي عبارة عن متنزه طبيعي وتطوره شركة سياحية في محلات تجارية ومطاعم لكن للأسف مافيه ولا مطعم يصلح لنا يالمسلمين
بعد كذا ركبنا باصات ثانية صغيرة وكملت فينا المشوار لنصف الجبال لأن الطريق اقشر ومااظن الباص الكبير يقدر ياصله ووقفنا عند منطقه ثانية فيها مطعم صغير وفيها النواعير متوزعه على مجرى النهر وفيه بيوت هناك للإيجار اليومي
هذه صورة أحد النواعير وعنده العامل اللي جالس يقوم بالصيانة
استرحنا حوالي ساعة وتمشينا بالمنطقة وانا اقول بقلبي لعبت بنا البنت وجابتنا لهالمنطقة ومابه الا هالشخاليل الصغير حتى لو انه رائعة واستمتعنا بشوفته لكن نفسي اشوف الشلال اللي بالصورة بالدعايا
جاء معزبنا أو مرشدنا السياحي ومعاه علم قال يالله امشو وراي يمين ويسار بين هالشجر والطبيعة سبحان اللي خلقه صدق كذب ياولد هذا الشلال قدامك سبحان الله العظيم
ونمشي شوي قدام ونحصل شلال اكبر منه

ومااقدر اقول ساعتها الا سبحان الله العظيم ويالله ترزقنا الجنة

بعد ماشفنا الشلالات وصعدنا ونزلنا بين هالجبال حصلنا استراحه ثانية وعنده لعبة الحبل أو ماادري وش اسمه الواحد يربطونه بحبال ويتزحلق مع هالحبل من جهة ويستقبله ثاني بالجهة الثانية ويرسله مع اثره يركبه الواحد ب 25 رمبي
بعد الإستراحة مشينا شوي وحصلنا استراحة ثانية وعندهنا لعبة القوارب ويمكن له اسم ثاني طبعا يقولون أنه آمنه والآمان بيد الله لكن يركبها الواحد مجاناً وهي مدفوعة من ضمن الرحلة
هذه صورة المنقذين أو السباحين ويكونون بالعادة عند النزلات القوية لو طاح احد من القارب رجعوه
بعد كذا نزلنا من جهة ثانية وحصلنا محطة الوصول وحصلنا العمال يشتغلون على قدم وساق
وهذه صورة للبيوت جالسين يبنونها وشكل هالمنتزه جديد حيث ان اكثر المباني والتجهيزات جالسين يشتغلون فيها
وهذه صورة للمسبح تحت الإنشاء وتذكرت الطبيعة عند استاذ الملك فهد يوم شفت هالمظلات

بالختام

الرحلة حلوة وأحلى من الحلوة وتستاهل من يتعنى له لكن من ينويها لابد انه يجيب معاه غيار للملابس إذا كان ناوي يلعب بالنهر ولاينسى أكله يجيبه معاه لأن مافيه مطعم مسلم ولا احد يسألني عن اسم المنطقه لأني ضيعته