العصفوررر
21-10-2022 - 06:13 am
بسم الله الرحمن الرحيم
صبآحكم / مسآئكم ورد ويآسمين ..
كيفكم اخوآني أخوآتي , ان شاء الله تكونون بأتم الصحة والعافية , مع هالإجواء الباردة : )
اولاً , كل عام وانتمّ بخير جميعاً , بمُناسبة دخول السنة الهجرية الجديدة , وجعلها الله سنة
خير وبركة لكم جميعاً ..
اخوآني , موضوعي يغثّ اشوي بس الله يعينكم تحمّلوني .. لأن عندي كم استفسار , وحاب اكون في الصورة , ..
اخوآني انآ زواجي في تاريخ 2/8/1433 .. يعني تقريباً .. بعد 7 شهور من الآن .. اعرف باقي فترة طويلة .. لكن انا حاب اجهزّ كل شي من بدريّ .. عشان ما ادوشّ نفسي بعدين .. ويصير كل ترتيبي سريع سريع وملخبط ..
حبآيبيّ .. انا حاب اطلع شهر عسل اذا الله كتب لي .. بعد زواجي بِ يومين .. يعني في تاريخ 4/8/1433 .. لكن انا شخص ماعُمري طلّعت برة .. كل سفرإتي كانت ل دول الخليج فقط ..
لذلك ماعندي اي خلفية عن السفرات الخارجية .. خصوصاً دول اجنبية .. او اوروبيه مثل ماليزيا . وغيرها ..
الي عنده خبره وخلفية .. يفيدني والله يكتب له الاجر ان شاء الله .. وبياخذ مني دعوة طيبة ..
قبل كل شي ابي اقول لكم الميزانية الي انا حاط في راسي ان شاء الله .. من 15 الف ريال الى 20 الف ريال .. هذي ميزانيتي
1 .. بالنسبة لتذاكر الطيران .. هل احجزها على الخطوط السعودية .. أو اطلع من الامارات افضل وارخص ..؟
2 .. بالنسبّة لوقت الحجز . هل احجز من وقت بدري يعني قبل الرحلة ب 3 شهور او 4 .. او نفس الشي احجز قبل السفر ب شهر ع الاقل ..؟
3 .. بالنسّبة .. للمصاريف هل الميزانية تكفي للمصاريف ..؟ مع العلم اني حاب اروح اماكن حلوة ..
4 .. هل تنصحوني ب بكج ..؟ لاحد المكاتب .؟ او اني اخذ خبره من المنتدى هنا واروح انا بدون ارتباطي بَ أي مككتبَ .؟
5 .. بالنسبة للرحلات الداخليه المُتنقلة بين المُدن .. هل يتم الحجز في نفس الوقت .؟ ويكون السعر حلو ورمزي .؟ او احجز قبل بفترة ..؟
6 .. الي عنده جدول مُعين ياريت يفيدني فيه .. مثلاً .. اليوم الاول تروح المدينة ( .... ) تسكن في فندق ( .... ) تجلس فيها عدد ( ...) يوم .. في نفس المدينة هذي عندك اماكن السياحة كذا وكذا وكذا الخ ..
وهكذا الى ان تخلص ال 10 ايام .. واذا تنصحوني ب ايام اكثر تفضلوا مثلاً تكون 14 يوم بدل ال10
7 .. هل استطيع الحصول على مترجم هناك . ويلازمني ب مبلغ مُعين .؟ ونفس الشي التاكسي .؟
8 .. بالنسبّة للجُزر حاب اروح جزر انا والله خاطري ازور جُزر واشوف الطبيعة .. النصيحة الله لايهينكم ..
وفي الختام انا ابي اروح انبسطّ .. وابسط زوجتي المُستقبلية ان شاء الله .. وماراح اقصر على نفسي ولا عليها .. لا في السياحة ولا فِ التمشيّة ..
وابي منكم الفايدة بعد الله سُبحانه وتعالى ..
ولكم مني جزيل الشُكر ..
اخوكم ..
فيصل
العصفور
الامور سهله يا عزيزي والدنيا تغيرت من اسهل الى اسهل فلا تشيل هم ان اول مره تسافر خارج الخليج
شوف يا عزيزي اجوبتي ليست النهائيه ولكن تابع موضوعك ستجد اجوبه منوعه وقد تفيدك كثيرا
اول شي خليك مجهز فيزا الراجحي مسبقة الدفع
اقرا تقارير كثيره عندك وقت تقرأ بتتعلم وتستفيد وسجل في ملاحظاتك كل شي يجذبك مثلا مكان معين مدينة او ما شابه
بعدين احجز الطيران الدولي قبل السفر بشهرين او ثلاثه بالكثير و ان شاء الله بيكون في عروض والصراحه لازم تقارن بالانترنت بين اسعار الاماراتيه و السعوديه
وحدد عدد ايام السفر و المفضل دائما 15 يوم مع يومين السفر بدون ايام السفر تحسب 13
الان نجاوب على الاسئله
كل سؤال بيكون جوابي تحته
1 .. بالنسبة لتذاكر الطيران .. هل احجزها على الخطوط السعودية .. أو اطلع من الامارات افضل وارخص ..؟
2 .. بالنسبّة لوقت الحجز . هل احجز من وقت بدري يعني قبل الرحلة ب 3 شهور او 4 .. او نفس الشي احجز قبل السفر ب شهر ع الاقل ..؟
شهرين افضل شي لانك طالع بموسم سفر وهو بالصيف
3 .. بالنسّبة .. للمصاريف هل الميزانية تكفي للمصاريف ..؟ مع العلم اني حاب اروح اماكن حلوة ..لو فرضنا ميزانيتك 20 الف فهي تكفي ان شاء الله ولا تركز على المشتريات الضخمه و الغاليه كثير اساسا بتلاقي نفس البضاعه بالسعوديه فلماذا الحمل الثقيل ؟ اما لو حاب تشتري ساعه اكسسوار شي بسيط وليس غالي كثير فعادي وتذكر مسترياتك خليها اخر ايام في كوالالمبور
4 .. هل تنصحوني ب بكج ..؟ لاحد المكاتب .؟ او اني اخذ خبره من المنتدى هنا واروح انا بدون ارتباطي بَ أي مككتبَ .؟
تقدر تسوي انت بكج ليش لا ؟ قلت لك فوق طلع فيزا الراجحي مسبقة الدفع و بتحط فيها فلوس وبتحجز فنادق من النت وليش ياخذ المكتب ربحك وانت اولى فيهم و توفيرك لمبلغ ربح المكتب تعزم فيه زوجتك على عشاء فخم على شاطئ فنادق جزيرة لنكاوي على منظر غروب الشمس
5 .. بالنسبة للرحلات الداخليه المُتنقلة بين المُدن .. هل يتم الحجز في نفس الوقت .؟ ويكون السعر حلو ورمزي .؟ او احجز قبل بفترة ..؟
احجزها من النت قبل السفر بشهر ونص او شهر وعندك الماليزيه او اير اسيا والشباب شرحوا الطريقه بالانترنت كيف تحجز من الالف الى الياء
6 .. الي عنده جدول مُعين ياريت يفيدني فيه .. مثلاً .. اليوم الاول تروح المدينة ( .... ) تسكن في فندق ( .... ) تجلس فيها عدد ( ...) يوم .. في نفس المدينة هذي عندك اماكن السياحة كذا وكذا وكذا الخ ..
وهكذا الى ان تخلص ال 10 ايام .. واذا تنصحوني ب ايام اكثر تفضلوا مثلاً تكون 14 يوم بدل ال10
الجداول كثيره ولا تستعجل الحين عليها و اقراء مواضيع الشباب راح تطلع بجدول حلو واماكن حلوه لان الناس اذواق ممكن اسوي لك جدول ما يعجبك وفي موضوع مثبت لخليلها بينفعك كثير
7 .. هل استطيع الحصول على مترجم هناك . ويلازمني ب مبلغ مُعين .؟ ونفس الشي التاكسي .؟
مترجم ما تحتاج اي مكان تريده قول للتكاسي اسمه فقط
8 .. بالنسبّة للجُزر حاب اروح جزر انا والله خاطري ازور جُزر واشوف الطبيعة .. النصيحة الله لايهينكم ..
شي اساسي بيكون جدولك فيه جزيرتين جزيرة رومانسيه للعرسان اسمها لنكاوي و جزيرة صخب و حركه واكشن اسمها بيننانج فلا تشيل هم والطيبعه راح تبدا تشوفها من اول ما تنزل مطار ماليزيا الى عودتك للوطن
لمزيد من الافاده ياريت تشوف تقرير رحلتي لماليزيا وتستفيد منه فيه معلومات كثيره وانا كنت مثلك اول مره اسافر لدول غير عربي خارج الخليج
https://artravelers.com/p/re/651774