نشر في ماليزيا

السرقه في ماليزيه يقولون زادت

أحمد العبيدلي

13-08-2022 - 12:30 am

السلام عليكم ورحمة الله وبركاته
والله يا أخوان ان شوقتونه لزيارة ماليزيا في المنتديات كل الحديث عنها في المجالس كل الحديث عنها لازم نروحها ونشوفها بس عندي سؤال
كثير من رجع من ماليزيه هذه السنه يحذرونا من الصينيين وطريقتهم الخفيه في السرقه والله انا سألت اكثر من ثمان اشخاص توهم راجعين من ماليزيه يقولون عنها مثل ماتقولون وعن جمالهال وسحرها لكن كلهم مسروقين من قبل الصينيين الي انسرق منه 20.000 ريال ولي شنطة زوجته ولي كمرته ولي جواله ولي محفضته وغيروغير والله خوفونه صراحه ويقولون لاتركب الباصات ترا تنسرق ولاتدري هل هذا الكلام صحيح ارجو الافاده انا تراني رايح في 14-08-2005 بس شكلي بكنسل ارجوكم فيدونا حنى رايحين نتونس موننسرق وتدرون حنى في غربه مانبي نتوهق
وبعدين بخصوص المبالغ وين نحطها هل في الفندق امان او في الخزنه الى فغرفة الفندق اامن او عند الاستقبال ارجو الافاده وطريقه كيف اخفاء النقود ترى والله يعني صورولي شي رهيب وبذات انه اكثر من واحد

التعليقات (9)

uae123

13-08-2022 - 03:25 am

شو هالخبريه اللي ماتبشر بخير الله يسامحك ونحن سفرنا بعد قريب
والله خوفتنا
اتمنى تفيدونا ياخبراء
هل هالخبريه صحيحه
شو يعني نحن البنات مانشل شنط؟؟؟؟؟؟؟؟؟؟؟؟؟؟؟؟؟؟
وشونسوي اذا بغينا نسير شوبينق نسير بلاشنط ولافلوس
يالله المستعان
وهل السرقه بس يتعرضلها ا للي يركبون تكاسي وباصات والا السرقه في السوق والشوارع عيني عينك؟؟؟؟؟؟؟؟؟

بنت الشرقية

13-08-2022 - 04:26 am

السلام عليكم
أختي uae123 ...
والله قرأت في المنتدى أنه فيه سرقات بس الكثير ينصحون بعدم حمل الشنط على الكتف في الأماكن المزدحمة (وهذا اللي ناوية أسويه) يعني مثلاً في شاينا تاون ، السوق الليلي ، في شوراع العاصمة ما بحمل شنطة على كتفي أسلم لأنه لو يسحبوها وهم راكبين موتور بتضرر اني أكثر ، ممكن تاخذين شنطة مربعة صغيرة قماش وتخلين الخياط يسويها أو تسويها انتين اذا انتي شطورة ، وتكون تكفي الموبايل والفلوس بس وتلبسيها تحت العباية أضمن وأسلم ...
واللي عنده نصائح للأمان يعطينا ...

الفاضي

13-08-2022 - 05:28 am

اخوي احمد اللي كاتبه الله بيصير لو انك حاط فلوسك في خزنه داخل خزنه وحاط كاميرات وحراسه , والله كاتب انها بتنسرق...بتنسرق.ولكن بعض الأخوان الله يهديهم يرمي اغراضه بكل مكان يحسب نفسه بالخليج وبعدين يقول انا انسرقت(المال السايب يعلم السرقه)لكن البلد مو هالدرجه , انت حافظ على اغراضك واترك فلوسك وجوازاتك بصندوق الأمانات وانشاالله مايصير الا الزين(خذ معك مبلغ بسيط وصوره من الجواز)

uae123

13-08-2022 - 06:29 am

بنت الشرقية
تدرين شو بسوي بسوي مخبا(جيب) في العباه مع شراطي(سحاب)
ديزاين يديد وبخترع موضه
والسوق الصيني ماينطاح صراحه شفت له صور ومايستاهل الواحد يتعنى ويسيرله زحمه لاوبعد حراميه
مافينا ابعد عن الشر وغنيله
شكلي احسن مااشل شنط وفلوسي بخليهن مع اخواني الشباب يوم ابا شي باخذ من عندهم اضمنلي
ولا انسرق واموت قهر والموبايل بفره عندهم بس بشل كاميرا والا الكاميرا تنسرق بعد؟
والله حاله
اكره ماعليه السفر لبلد فيها حراميه الواحد يتم على اعصابه من يطلع لين يرد وخصوصا اذا رايح شوبنق
وشو عن المراكز التجاريه المولات شي فيهن سرقه بعد والاعادي؟

travilller

13-08-2022 - 07:30 am

تجربتي مع الصينينن
حراميه واتحدى احد يمسكم ومتحايلين يعني ان مسكته جلس يصيح لين ربعه يفزعو له وبالنهايه منت مرجع قريشاتك
بكل مطار تلقون دي اند جي او أي شركه ثانيه تبيع تجهيزات السفر من محافظ على الساق الى محفظه وحامل جوال تعليقه ومحفظه على اليد تحت القميص
اسلم طريقه لا تبين ثرائك لاحد ولا تمشي قريب من الشارع خلك جهت المحلات وان شفت احد يركض تذكر كلامي وصارخ حرامي
وسلامتكم
ايه ترى الصينين يخافون من العرب وينظرو لهم على انهم عمالقه يعني وسعو صدوركم

طالب القرب

13-08-2022 - 08:31 am

ضحكتوني والله خل عنكم التشاؤم ماليزيا من الدول التي تحرص علي سلامة السياح حتي لاتتاثر السياحة عندهم لكن اذا كان( ولابد) ترك الشنط في الخزانة الحديدية الموجودة في الفندق ووضع المبالغ النقدية في جيب الملابس هذا اذا كنت حيل خايفين ولا ننسي المقولة اللي تقول المال السايب يعلم السرقة ديروا بالكم وان شاء الله ما كو الا العافية.

ابو عشوان

13-08-2022 - 09:32 am

والله انا رحت وجيت و لا صارلي شي
بس انتم اذا بغيتم تشترون لا تطلعون كل اللي عندكم قدامهم
بعدين يطمعون فيكم
ووزع فلوسك على كل جيوبك يعني ميه هنا وميه هناك حتى لو لا قدر الله انسرقت بيبقى معك شئ
وولا تنسرق كل فبوس وبيكون مبلغ بيسط جدا
هذي اقتراحاتي ان شاء تفيد

||^||شموخ||^||

13-08-2022 - 10:33 am

انا بسوي زي ماقالت الاخت بنت الشرقيه لفصل عبايه فيها من داخل جيب بسحاب او احطلي شنطه قماش صغيره تحت العبايه او اني احط سحاب على جيب البنطلون وانتهى الموضوع ..

ابواحمد1

13-08-2022 - 11:34 am

اثناء زيارتي لماليزيا وتجولي مع المدام في مجمع التايم سكوير جاني السكيرتي يهرول قالي احذر تمشي لحالك في ممرات المجمع الخاليه من الناس والتجمعات حاول تمشي في الاماكن اللي فيها تجمع وفيها ناس ، سئلته ليش ؟ قالي لان هناك عصابات تسرق المتسوقين بالقوه وتحت التهديد وقالي بان صارت عندهم حالات سرقه تحت التهديد ، عليكم الحذر دايما ، وبالنسبة للاخ اللي يسئل وين يحط فلوسه ؟ اقوله اذا كنت تسكن في فندق يتمتع بالامان فحط فلوسك والجوزات والتذاكر وكل شي مهم في صناديق الامانات فهي تقدم لك كخدمه مجانيه من قبل الفندق وهذا اضمن لك باذن الله واعقلها وتوكل .

ماليزيا المسافرون العرب

السرقه في ماليزيه يقولون زادت