هلا اخوي
أعوذ بالله منك ههه خرعتنا يالامير الله يسامحك
ماليزيا مافيها الا العافيه بس انت انوي تسافر لها
اما الرشح والحراره لو تسافر من الخبر للكويت امرضت من تعب السفر عادي
خذا لك بندول وابوحصان وخذا لك خوي يوسع الخاطر وابشر بالعافيه
ولا تخرعنا مره ثانيه طيب ههه

السلام عليكم ...
حياك الله اخوي بن طواله ومشكور على الموضوع المهم ...وتحية عسكرية
للقائد الاعلى للاضراب .....تراهم يدورون عليك اخوي الشمري
والله عندي قصة يا جماعة الخيرصارت قريب لأخ عزيز وحبيت اكتبها
في المنتدى للعظة والعبرة ...ان واحد استفاد منها والله تكفينا وحققنا اللي
بغيناه .
لي اخ عزيز سافر لحاله لماليزيا وعمره من عمري وتراه معاي في نفس
الكلية ...المهم يوم ما رجع عندناوبعد اسبوعين من استقراره ,عاد بدأ يحس
بوهن وضعف في جسمه وحاس نفسه خامل ما وده يتحرك وتجيه دوخة وكتمة
بصدره وكان كثير الزكام ...المهم جيناه والشباب وشفنا حالته والله انه حالته
ما تسر العدو ...وقلنا له ساكت على نفسك للأن ..خاف ربك يا شيخ ...قال انه
الحالة تجيه من فترة وفترة من وقت عودته من ماليزيا ...قلنا افا ...المهم شلناه
وشجعناه بمساعدة اهله واخوانه ووديناه المستشفى وقال ودي استشاري قلب
لاني حاسس مرضي بقلبي ...ورحنا كشفنا عليه ودخل لحاله واخوه وحنا كنا
ننتظر بالانتظار و ننتظر قدوم شباب اخرين ...صلحوا تخطيط قلب وتحاليل
غدة رغم انه شاب ...المهم كله سليم ...ويوم ما عرف انه سليم لقيناه زاد
حزنه نسأل الله العافية ...لكن عرفنا السبب ...اخبرنا انه راح لماليزيا وفي
ليلة اتعرف على فتاة ماليزية من اصل صيني واقاموا علاقة (يا لطيف)
الرجال منهار ...قال رجعوني داخل ودي اطلب من الدكتورتحليل Hiv
تعرفون وش هالتحليل يا اخوان ...تحليل لنقص المناعة (الايدز) يقول
مادام ما بي مرض عضوي اجل صابني الايدز ...والله كأنه خبطنا كفوف
يومتها ...حتى اخوه الكبير ما عرف وش يقول ...دخلناه واعطه الدكتور
ورقة لاجل يدفع رسومها ويتجه للمختبر ...وصل المختبر وتراه مستحي من الموظفين
واللي يشتغلون ...وطلبوا بطاقة احواله لاجل يصوروه ...زادوا الفجعة فجعتين
وقالوا له بعد يومين تاخذ النتيجة ...قال يومين ...قال خذوا الف وخذوا الفين
لكن خلصوها لي بأسرع ما يمكن ...تراني عايش في هم وغم ما يعلمه الا ربي
لو على كلامكم ما انام يومين ...المهم اقنعوه انه هذه فترتها المحددة وما يقدر
يسون فيها شيء لاجل زراعة وما ادري ايه ...المهم عاش اخونا يومين ما اتوقع
انه ينساها طول عمره ...واعلنا حالة طواريء وحتى خويانا من الطائف نزلوا
له ...وقلنا نونسك لين ما تطلع نتيجتك ...والله ايام لا تنسى ...عكر على نفسه
وعلى اهله وعلينا كلنا ...وصار يدور في الانترنت عن مرض الايدز ...ويسأل
هل فيها حجر صحي ولا كيف ...واكتشفوا ادوية ولا باقي ...ابتسامة ما كانت تخرج
منه ...كان في يوم من الايام كالشعلة يضحك عشر مجالس واليوم نشوفه حتى
ما يفكر يبتسم حتى ...جبنا له افلام وصار بيته معسكر صيفي ولعبناه سوني
وسوينا دوري وذبائح وخرجناه ومطاعم صينية وغيره لكن الرجال في وادي
وحنا في وادي ...في شباب خيرين قالوا وديناه مكة خله يدعي ربنا ...كان
خايف انه يدوخ في الحرم ...قلنا توكل على الله ومعاك 14 حارس شخصي
من قدك ياعم ...ورحنا واتمها وسئل الله ولاول مرة اشوفه يبكي ...وجينا
راجعين ...وبتنا عندهم ...وكل هذا واهله ما يعرفون حقيقة اللي فيه الا
اخوه وحنا ...وقال لنا انه قابل البنت في صالون حلاقة شعروقت ما كان
يحلق ...وصار بينهم محادثة واعجاب وتقابلوا في الفندق وصار اللي صار
سئل هل استخدمت واقي ؟ قال مع ارتفاع الشهوة ما دري عن نفسه ورماها وهي
من اول تقل له ما ودها واقي ...لين صار اللي صار ..وندم وفكر في غلطته
واول ما شاف اعراض مرضه شك في تلك الليلة ...ليلة ضيعت عمر يا اخوي .
وكان على ليلته وعودته حول الشهر يعني المرض مكن يظهر رغم انه فترة الحضانة
اطول ...المهم يومين وصار من المصلين في الجماعة ومن اهل القيام ...ومسكين
ما كان ينام ومن تعبه نام على السجادة وهو يصلى وانسدح وهو داعي ...وحنا
كنا جنبه نصوي صجة لاجل ينسى ونونسه...ولا ييأس وينتحر ولا يضر نفسه ...
المهم جاء اليوم اللي ننتظره ...ومسكين من بعد صلاة الفجر شغال يتصل على
المستشفى وما يردون عليه الا الطواريء...وقتها حتى ابتسامة ما خرجها
حسيناه شايل هم الدنيا على راسه ...ولا كأنه رايح اعدام بعد ساعتين (يا لطيف)
وقال ياناس والله ماتمنى اللي صابني يجيكم ...غلطة واحدة ودتني ورا وكل
اللي احلم به صار سراب ...قلنا اذكر ربك يا شيخ باقي ما صار شيء وما
عندك الا العافية ...وقال نصيحة ان ما كنت قد السفرة لا تسافر وان سافرت
وبغيت توقع ..اجلد عميرة (استمني) وريح بالك (اسف على هالكلمة) ولا
توقع في اللي وقعته واخوكم معلق بين حياة وموت ...وابتسم شوي
المهم اتصل بعد نشرة اخبار الجزيرة العاشرة صباحاً وهو يعد الثواني
وسئل عن تحليله وقالت اللي في المختبر انه جاهز ...قال تكفين بشريني
قالت اسفة لابد انه الدكتور يفكها ...يا ساتر زودت همومه لهموم وطرنا
للمستشفى ...وكل ما نقرب من المستشفى كان قلبي يزيد نبضه و بقوة افتكرت
ايام ماكنت اتجه للمدرسة وانا صغير لاستلم شهادتي لكن هذه شهادة ما فيها
دور ثاني ...هذا شعوري اجل كيف شعوره الله يعينه ...وصلنا ودخلنا بعددنا
الكبير نقول يارب فرجها ...وهو خايف ...ووقفنا جنبه يوم ما اخذ الورقة
وقلت في نفسي ما دام سلموها له اجل خير ...فكها وهو يرتجف ولقينا
مكتوب (negative) الرجال ما تحمل من الفرحة والشباب كلهم
صرخوا من الفرحة ...وتهاني وتبريكات واتصالات وشفنا سنونه من جديد
وراح للدكتور وكشف عنده وقال انه حضنه وسلم على راسه من الفرحة
وحنا راجعين وكلنا نقول الحمد لله ..لقى مصلى نساء فيها موكيت على
جنب ...قال دقيقة ...وشفناه سجد لله حمداً وشكرأً ...وقام ودموع الفرحة
في عينه قال اليوم انا ولدت من جديد ...توبة والله ...اليوم نجاني الله
ابد ما اجحد نعمة ربي علي ...وقلنا هيا الى الطعام في احسن مطعم احتفالاً
قال خلوني ارجع البيت واسلم على امي واخواتي ...دعاء الام ماراح
هدر ابد ....امه غلبانة عارفة انه مسوي تحليل لمرض خطير لكن ما كانت
تعرف انه ايدز ...وكانت تدعي له لين ربي نجاه ....واخذ فيتامين ودواء
بسيط للقلق والحمد لله امس انا مكلمه وحالته في صحة وخير .
قصة ان شاء الله فيها عبرة ...وحقيقية وصارت قريب واخوكم من
شهودها ...تصدقون لو جاله شيء كان حسيت بالذنب لاني انا اللي
دليته على ماليزيا لكن ما اتوقعت انه بغى يجيب العيد ...اجل ننتبه يا اخوان
الا الوقعة هذه ...ثواني وتكلف حياة ...وفوق هذا معصية تشيلها في رقبتك
يوم الدين ...الشهوة قوية يا اخوي انا معاك وان ما كنا قد السفرية بلاش
منها ...وان ابتليت وقربت منها اجلد ابو عميرة حتى يموت
طولتها صحيح ...حتى انا حسيت بذلك ...لكن ان شاء الله المغزى
مفهوم ...ويارب احفظنا واحفظ المسلمين ويشفي مرضانا ومرضى
المسلمين والسلام عليكم .

واو يالشعيبي قصه تخوف
بس الحمدلله انه سلم خويكم
واضم صوتي الى الشعيبي واقول له والله ماتستاهل الشهوه كل هالعذاب
وانصحكم تزوجوا والله احلى وامتع شي الزواج والله وخاصه بدويه بكرتونها ماتزعجك ابد ههه
عاد ماليزيا ومع زوجتك شي ثاني والله
ياحلو الحلال والله ياحلوه واو
وربي يوفقك يالشعيبي ويكفينا الامراض يارب

الحمدلله على عافية خويك.. واشاء الله تكون عبره له... وتكون ولادة جديده نحو طاعه الباري عز وجل...
وان شاء الله تكون عبره لغيره والا سيقعون في هذه الحرب النفسيه التي قد تكون اوقع على النفس من المرض..

السلام عليكم .. نسأل الله العافيه ..
أخوي بن طواله
دول شرق أسيا كلها مليئه بالأمراض الغريبه اللي ولله الحمد ما تلقاها عندنا .. معظم الأمراض المعديه اللي تكتسح العالم تبدأ من عندهم .. لكن ومع ذلك إن شاء الله إن ماليزيا أقل هذه الدول تسجيلا لمثل هذه الأمراض ويمكن يرجع السبب الى أن معظم شعبها مسلمين وإن وجدت مثل هذه الأمراض تجدها بين الصينين البوذيين والهنود غير المسلمين ..
أخوي الشعيبي
يعطيك العافيه أخوي ماقصرت والله قصه مؤثره وان شاء الله فيها الفائده للجميع ..
ونصيحتي لكل من يريد السفر الى ماليزيا ..
اذا كان متزوج لازم وضروري جدا ياخذ زوجته معه مو بس عشان يعف نفسه لكن والله ماتحلى السفره في ماليزيا بدون المدام ........ الله يخلي لنا أم العيال ..
أما اذا كان عزابي لازم ما يسافر لحاله .. و ياخذ معه اثنين على الأقل من أصحابه اللي يرتاحلهم وانا أضمن له ان راح يستانس ان شاء الله .. (( بس أهم شي يعرف مين يختار ))
تحياتي للجميع .. والله يحفظنا جميعا بحفظه ..

الشعيبي والله ماقصرت فيني
والله قطعت قلبي من الخوف بس الحمد لله اللي سلمه
ومااشاء الله طرحك للموضوع رائع جدا .....تصلح مخرج
ويعطيك العافية على سرد مثل هذه القصة لما فيها من العظة والعبرة
والله يحفظنا واياكم من كل شر ومكروة وان يجنبنا مايغضبه انه على كل شيء قدير
عماد

أخواني على طاري جلد عميره .. واسمحولي ..
بس ترا مهما كان لايجوز هذا العمل أبد ..
حتى في أحنك الظروف

السلام عليكم ...
اخوي القائد الاعلى ...تحياتي سيدي الله يعافيك وما تشوف مكروه في عزيز .
وما دام انك ضميت صوتك اجل اكيد وصل الله يسلمك .
اخوي الامير بن طواله الله يسلمك ويعافيك ...ويارب تكون بداية خير .
اي والله الحرب النفسية ماهي هينه وانا اشهد ...الله يحفظنا منها يا اخوي .
اخوي العزيز ابو ميسم الله يسلمك ويعافيك ...ويارب نلقى الفائدة ومعاك في كل
كلمة قلتها اخوي العزيز .
اخوي عماد الله يسلمك ويعافيك ...بالله كيف عالمي اي والله يارب يحفظنا والمسلمين
من كل شر ...عوفيت اخوي عماد .
اخوي العزيز ابو ميسم ....بيض وجهك ومشكور على الملف الرائع ...تسمح لي
ارد طبعاً ...ومهما اختلفنا حنا اخوان وكلنا تابعين للحق سواء لنا او علينا
اخوك بحث في موضوع الاستمناء (جلد عميرة) ولقيت انه الموضوع فيها سعة
والحمد لله ...ما اقول اني عالم ولا شيخ لكن ندور الحق وين ما كان ...قريت في
كتاب (فقه السنة) للسيد سابق ...كتاب معروف ...لقيت انه العلماء مختلفين
في الامر وما فيها اجماع ...مثلاً
الذين ذهبوا الى تحريمه المالكية والشافعية والزيديه .
الذين ذهبوا لتحريمه في بعض الحالات والوجوب في الاخر (الاحناف) .
اما الحنابلة فقالوا انه حرام الا اذا خاف من الزنى او خاف على صحته .
وترى الكلام كثير وكتبت هنا اختصارها والكل معاه دليل ...وفيها اقوال صحابة
وتابعين رضي الله عنهم وجمعنا واياهم في جناته .
للاستزادة....كتاب فقه السنة ...للسيد سابق ....المجلد الثاني ...باب الحدود .
واخوي الكل يعرف القاعدة الفقهيةالضرورات تيبح المحظورات ...واخذ اخف الضررين.
اخوي رجل قدامه اما يزني او يستمني وش افضل له ...لو كان متزوج قصته ثانية
ممكن ناس يقولون طيب وش وداه للزنى ...حنا نفرض صارت ومن فينا الصالح اللي
يضمن انه ما يوقع وكلنا اهل خطأ ومعرضين وضعاف ...لكن الاستمناء لجلب الشهوة فقط
هذه حرموها الكثير من العلماء وفيها اقوال وادلة اتمنى انكم ترجعون للكتاب ..تاخذونه
بنفسكم من عالم افضل ...واقول في الاخير الله اعلم ...لا تروطوني واجي يوم القيامة
شايل ذنوب ...الكلام اللي قلته مكتوب في الكتاب وماهو من عندي وما انا الا ناقل .
اخوي ابو ميسم ...اختلفنا ...والاخوان دايم يختلفون لكن القلوب تزيد حب واحترام
بعد كل اختلاف لاني لو ما عزيتك ما ناقشتك ...ولكم جميعاً كل تحية وتقدير ...ويارب
اشفي مرضانا ومرضى المسلمين والسلام عليكم ...

الحقيقة قصة مؤثرة....
الله يهدي شباب المسلمين أجمعين قولوا آمين