نوال 2
15-02-2022 - 07:11 pm
انا ذهبة الى امريكا ب25 /اكتوبر من الرياض لاورلاندو ,,لوس آنجلوس,,,لاس فيقس,,,نيويرك
وابيكم تفيدوني كيف اقسم المدة بكل مدينه مع العلم اني انا رايحة انا وزوجي وطفلي ,,وابي شوركم في
الاماكن اللي ازورها وأفضل الفنادق للسكن مو شرط 5 نجوم الاهم مريحه ونظيفه وآمنه ..
على سبيل المثال كم يوم يكفي لاورلاندو وهل فيه اماكن ترفيهيه هناك غير ديزني ..
واين اجد اماكن الماركات للشنط في اي ولايه..
نوال 2
هلا اختي
من ناحية تقسيم الأيام اعتقد ان 35 يوم كثيرة على اربع مدن فقط واشوف انه في مجال تزورون مدينه او مدينتين زيادة ...
يوم لمملكة السحر ويوم لمملكة الحيوانات ويوم للام جي ام ستوديو ويوم للابكوت وطبعا لا تنسين اليونيفيرسال استوديو والسي وورلد ..... ويومين للداون تاون حق اورلاندو والداون تاون حق الديزني لاند واذا معكم سيارة تطلعون لمدن مجاورة مثل دايتونا بيتش او ميامي وانا افضل دايتونا لأنها اقرب (حوالي ساعة وربع ) ومدينة حلوة للي بيتمشى فيها 5 او 6 ساعات ....
بس احسبي حسابك في اورلاندو تصحون 9 او 10 وما تجي 12 الا وانتم في الديزني وعليها الى وقت الاغلاق ... والله يعينكم على المشي واذا طفلك ضغير لا تنسون العربية .
الفندق في اورلاندو انا انصحك بفندق orlando world center marriott resort اربع نجوم ممتاز ونظيف وسعره مناسب وقريب من الديزني ....
لاس فيقاس طبعا معروف انها معقل القمار في العالم وابرز معالمها الفنادق العجيبة الي فيها والي اغلبها موجود في الشارع المشهور الي طلع في كثير من الأفلام الي هو las vegas blvd او مثل مايسمونه las vegas strip الشارع هذا فيه عشرات الفنادق العالمية المستوى والسياحة في لاس فيقاس اغلبها زيارة هالفنادق واسواقها ومطاعمها والعروض الي فيها واعتقد ان 6 ايام كافية نوعا ما لهذا الشئ ..
اختيار الفندق جدا صعب ومحير للمنافسة الحميمة بين الفنادق لكن من وجهة نظري فندق Bellagio اروع فندق لأسباب كثيرة منها انه فندق خمس نجوم وسعره جدا مناسب قياسا بفخامته ويقع في نصف الشارع مما يسهل مهمة زيارة الفنادق المجاورة وجديد واللوبي حقه افضل واشرح لوبي دخلته ... واذا بتاخذون فيه ضروري الغرفة تكون مطلة على البحيرة لاستمتاع ماله حدود ..
واذا حبيتو في فنادق اخرى بديله ايضا ممتازة مثل paris las vegas او the wynn وهو احدث فندق او caesars palace او aladdin او mgm او غيره من الفنادق الفخمة الأخرى ...
فيه عروض بالهليكوبتر في لاس فيقاس رحلة تطوف على شارع لاس فيقاس سترب وسفاري اعتقد هاذي جدا ممتازة لكن للأسف خويي سوداني :whistling وعجاز ما شجعني عليها وبصراحة انا متحسف عليها لا تفوتكم ..
لاس فيقاس ما تحتاج استئجار سيارة ...
مدينة تتميز بناطحات السحاب طبعا فيها اماكن لابد من زيارتها مثل المانهاتن وافضل السكن فيها ومثل السنترال بارك والامباير ستيت بلدنق وتمثال الحرية ومبنى الأمم المتحدة والكولومبوس سيركل والسوق الي عليه The wamer centerوالتايم سكوير طبعا واهم وارقى شارع للشوبنق الي هو 5th Ave وتقدرون تزورون البرجين الي طاحوا وتقفون على اطلالها ( والله داقتني ام الركب يوم انزل اشوفها :sad1: ) ..
بالنسبة للفندق انصح بالسكن في مانهاتن لأنها قلب نيويورك واصلا معظم الأماكن السياحية المشهورة فيها لذلك انصح بفندق جدا رائع سكنته يوم اروح هو فندق THE WESTIN NEW YORK فندق فخم ورائع وسعره مناسب وبينه وبين التايم سكوير 3 دقايق مشي ...
هذا ما لدي بالنسبة لمخططكم لكن اذا تبين اقتراحي لل35 يوم كالتالي :
6 ايام لاس فيقاس - 6 ايام اورلاندو - 4 ايام نيويورك - 5 ايام سان فرانسيسكو - 5 ايام لوس انجلوس - 5ايام سان دييغو - 3 ايام دي سي ... طبعا مع مراعاة الخريطة الأمريكية تنظيميا ....
بالنسبة للشنط لا تشيلين هم لوي فيتون وكوتش وديور وشانيل واخواتها في كل مدينة ...
اتمنى اكون افدتك وموفقين ان شالله ...