مجمع الاوقاف يقع وسط المدينة قريب من مجمع ديسكفرى بمنطقت شرق
مجمع مناور يقع بالفروانية قريب م فندق كراون بلازا بالفروانية

حياك الله ببلدك الثانيه الكويت

الله يهنيك باكويت و شوف تقريري
( رحلتي الي الكويت ) ان شاء الله تستفيد من الموضوع

بيت الكويتى
بعد اذن صاحب الموضوع .... وقبل كل شي مساكم الله بالخير .. وتقبل الله منا ومنكم صالح الاعمال ...
لاحظت في المنتدى ان الاعضاء ما شاء الله عليهم خدومين وجاهزين للرد على اي استفسار .. لكن لاحظت لما يكون السؤال عن معلم سياحي او فندق او مجمع تسوق او سوق ... لاحظت ان الوصف ما يكون كافي .. نحن مش عيال الديرة .. يعني مش كويتيين .. حد من الامارات وحد من السعودية والبحرين وقطر ... وهذا النوع من الوصف ما يكون دقيق بالنسبة لنا ...
مجمع الاوقاف من المجمعات اللي حطيتها في الجدول .. لكن للاسف ما قدرت احدد مكانه بالضبط على الخارطة عشان تحفظه في الجارمن ...
كل المعلومات اللي حصلناها عن المول انه في منطقة شرق وبجوار مول ثاني !!!
يا ريت لو حد من الاعضاء يحدد المول بوصف ادق شوية ...
في رد من الردود قريت واحد من الاعضاء كاتب ان الكويت مدينة صغيرة والشوارع ما تضيع وكل شي واضح وسهل ... هذا بالنسبة للكويتيين ... لكن تظل الكويت دولة .. والكويت العاصمة مدينة لها وزنها من جميع النواحي ..
وجزيل الشكر للجميع
ويعذرني صاحب الموضوع على التدخل ...
لكن احب الفايدة تعم على الجميع ...

صح كلامك اخوي LIFEisKNIFE .. و لا يهمك بحاول اوصفلك الطريق كثر ما اقدر
اذا كنت جاي من طريق الملك فهد باتجاه مدينة الكويت اللي هو نفسه طريق رقم 40 (ما كنت اعرف الارقام بس سايقناالجديد ما يعرف الا الارقام !!) المهم تكمل سيده لي آخره .. طبعا هو من بعد تقاطعه مع طريق الدائري الخامس يصير اسمه شارع المغرب ... و تكمل سيده تجيك الجابريه على يمينك و بعدها حولي و بعدها القادسيه و بعدها المنصوريه على يمينك و ضاحية عبدالله السالم على يسارك بعدهم على طول بيجيك تقاطع المغرب مع الطريق الدائري الاول ما توقف في الاشاره .. تاخذ فرعي يمين .. يعني تنزل عالدائري الاول .. تكمل شوي بتجيك اشارة .. تاخذ يسار و على طول بتجيك اشارة ثانيه تكمل سيده على شارع مبارك الكبير شوي تلقى الاوقاف على يمينك المبنى لونه رمادي و في مواقف من الخلف و بعد سنتر بوينت خلفه .. اي و بعد على نفس الشارع اللي فيه الاوقاف اذا كملت سيده .. بتجيك اشاره بعدها كمل بعد سيده بتلقى البلوكات (سوق الاقمشة) على يسارك .. او تكمل شوي قدام تجيك اشاره تكمل سيده و بعدين تلف يسار عند بنك الخليج هني المباركيه .. او تكمل على الشارع اياه تلقى البورصه على يمينك !!! ما ادري يمكن بعد تبي البورصه ولا شي
و بعدها اشاره تكمل سيده على طول بعد الاشاره يجيك مسجد الدولة الكبير على يمينك و اذا كملت شوي بيجيك دوار السيف بيكون بوجهك قصر السيف و الديوان الاميري و وزارة الخارجيه و بتكون على شارع الخليج العربي ... منه اذا اخذت يمين الدوار شوي قدام يجيك سوق السمك على يسارك و بعده سوق شرق واذا كملت سيده توصل السالميه و اذا اخذت الدوار يسار تروح يوم البحار !! ... ههه بس كفايه ؟؟ الله يستر ما اكون ضيعتك زياده
عموما ادري اني عطيت تفاصيل زياده حبتين .. بس والله الطريق سهل و انا حبيت اعطيك اسماء المناطق اللي تمر عليها على شان تكون مرتاح و متطمن انك صح .. و منها تتعرف على الكويت .. و آسفه عالاطاله
ان شاء الله تنورون الكويت و كل اموركم تتيسر بالخير

bint elQ8
من خلال الوصف وصلت الى المبنى الرمادي المطلوب ... ورفعت الصورة عشان تعم الفايدة ....
صحيح ان الشرح طويل لكن مشيت معاج خطوة خطوة
جزيل الشكر ... تحياتي لج ...