60 مشاهده من غير رد ارجوا الردود من اعضاء و مشرفى المنتدى لو سمحتوا

والله ياغالي أنا من ضمن ال 60 اللي شاهدوا موضوعك لكن للأسف لا أملك اجابة شافية
تحياتي

شكرا على الرد و ارجوا من الله التوفيق

السلام عليكم والله انا كنت بادور علي اجابه لحاجه ليا لقيتك انت قولت افيدك , ادعيلي بس بظهر الغيب بالتوفيق
انا عايش في المانيا من سنتين وسوف اوضح لك الصعوبات خلال السطور القادمة :
1 اللغة , اللغه هنا صبه ومحتاجه وقت ومن غيرها مش حاتعرف تعمل ولا حاجه ولا دراسه ولا شغل نصيحتي ليك انك متسافرش ولا تقدم حتي علي جامعه غير لما توصل للمستوي ده B2 روح الجوته واسأل حيقولولك عليها , حياخد منك بتاع سنه عشان توصله
2 - الثقافه والحياه مختلفه متفتكرش انك عشان سافرت حتستريح حتتحرم من حاجات كتير عندنا في مصر مش حتلاقيها اقلها الأصدقاء وحتتعب من الوحده شويه
3 - الشغل هنا مختلف , من الأخر لو انت مش متعود علي شغل المرمطه , مطاعم , مسح تنضيف , وبعدين فيها كتير بتبيع كحول وخنزير يعني لو انت انسان بتخاف ربنا مش حاتعرف تشتغلها , لكن ممكن ربنا يوفقك في شغلانه كويسه وناس محترمه وبيدفعو كويس , في شغلانات هنا اسمها 400 يورو في الشهر , للطلبه او غير الطلبه , بتتوقف ساعتك حسب المكان اللي انت شغال فيه , فيه ناس بنت كلب هنا برده في المدن الصغيره عايزين يشغلوك بفلوس قليله , لكن لو اماكن محترمه حتلاقي شغل في حدود 6 او 7 يورو الساعة. بس الأهم من ده ان يكون الناس محترمين , عشان كتير من الناس اللي شغاله الشغلانات دي حثالة المجتمع اساسا وكتير جدا مش حتستريح معاهم لو انت انسان متعلم , لو مش متعود كمان حتتعب جدا , بالذات لما تكون انت جاي من مصر سايب شغلانه محترمه وتيجي هنا تمسح بلاط بس في الأول بس يعني مش حسودهالك
4 - تقديم الجامعة , عشان تقدم في الجامعة في مكان بتقدم فيه اسمه uni assist بتبعتله ورقك من الابتدائي للجامعة متوثق من الخارجيه ومترجم للألماني ومتوثق من السفاره الألمانيه , بياخد ورقك وبيبحثه وبعد كده يقولك انت ينفع تقدم في الجامعات اللي انت اخترتها دي ولا لا , واغلب الناس اللي معاهم بكالوريوس في مصر بيقدرو يقدمو في الجامعة مباشرة عن طريق اليوني اسيست . بتقدم حسب الترم في تخصصات بتقبل في الترم الشتوي وفي في الصيفي التقديم في الترم الشتوي بيدا في شهر مايو ويخلص في يوليو , والصيفي بيبدا في 10 تقريبا .
5 - لما يجيلك قبول الجامعه لازم يكون عندك 7000 يورو حتحطهم في البنك الألماني , وتاخد القبول بتاع الجامعة والشهادة اللي من البنك اللي بتثبت ان معاك الفلوس وبتقدمهم للسفاره وبتاخد الفيزا . ان شاء الله
6 - المعيشة هنا ممكن تكلفك في الشهر حوالي 450 يورو في الشهر , ونصيحه ليك تعيش في مدينة كبيره مش صغيره عشان الشغل .
اما عن الجامعات اللي ممكن تقدم فيها كتير , حسب المجال اللي انت عايز تتخصص فيه
اتمني اني اكون فدتك
ادعيلي بظهر الغيب بالتوفيق