تشاينا تاون في كوالالمبور فيه أشياء حلوة خاصة الساعات المقلدة والشنط الحريمي لكن لابد من المكاسر إذا قال لكم ب 300 رنقت قولوا له ب 50 وفي الأخير تشترونه ب 70 أو 80 رنقت
ساعة رولكس تقليد درجة أولى ب 100 رنقت .. شنط حريمي ماركات ب 50 و 60 رنقت لكن روحوا له قبل المغرب لأنه بعد المغرب يصير زحمة والمكان ضيق
سوق بي بي بلازا في شارع العرب أيضاً فيه شغلات كثيرة حلوة وأرقى من تشاينا تاون وأسعاره كويسة
بالنسبة للشرايح خذوا شريحتين أول ماتنزلون في المطار تلاقون مكتب إتصالات خذوا شريحة سيلكوم Celcom ممتازة ومجربة الشريحة ب 10 رنقت وأشحنوها في البداية ب 100 رنقت بس أهم شيء خلوه هو يركبها لكم ويفعلها ولا تمشون من عنده إلا وهي شغالة
وأحذروا ثم أحذروا ثم أحذروا تستخدمون جوالكم السعودي في الإتصالات ... يا ما ناس حصلت لهم مأسي لما رجعوا لقيوا فواتير بانتظارهم بالآلاف !
شوفي الخداع أول ماتنزلون هناك تجيكم رسالة من شركة الإتصالات حقتنا أن الدقيقة ب 4 ريال بس الحرامية مايقولون لكم أن هذا سعر المكالمة داخل الشبكة (فقط) لكن لو اتصلت على رقم خارج شبكتهم وقتها يذبحونك على غير القبلة .. تخيلي لو من STC اتصلت على رقم موبالي يحسبوا عليك الدقيقة ب 35 ريال !!! ولو على زين مدري بكم !! شغل حرامية وخداع للعميل عيني عينك
وبعدين يقولون : حياة أسهل !
وإذا خلصتوا من الرحلة إرموا الشرايح وانتبهوا لا تعطوها لأحد هناك أو تقولا نتصدق بها على أحد
لأنها مسجلة بأساميكم يروح واحد يستخدمها إستخدام غير شرعي بعدين تتحملون المسؤولية ! لأنه لما تطلبون الشريحة يطلب منكم صورة من الجواز يعني الشريحة رسمية صادرة بإسمكم فلا تعطوها لأحد أبداً

شكرا اخوي المغادرون معلومات استفدت منها كثير
رحلة موفقه اختي روج