الاخت نور الدنيا حياك الله
ارجو تحديد الحد الاعلى للفندق وان شاء الله راح نجيب على جميع استفساراتك .
وكم الاسعار الي وجدتيها ؟ واسم الفندق ؟
تقبلي مروري بكل ود واحترام لك

الشمالي الغربي اول شي شاكرتلك جدا مرورك الكريم وردك على موضوعي
بالنسبه للاسعار انا ابي حول 50 دينار كويتي لليله يعني حول 650 ريال سعودي
واللي لقيته حول هالسعر خفت ان الفندق مايكون على درجه جيده من النظافه
ابيكم تنوروني بتجاربكم بالفنادق الزينه الحلوه

اولا اسئل الله العظيم رب العرش العظيم ان يشفيك . وتردي بالسلامة والعافية
ارجو الايضاح ان كانت اول سفرة لكم الى الاردن ؟
عن تجربة شخصية سكنت ( فندق الشيراتون - الفور سيزون )
وشقق فخمة للبعثات الدبلوماسية اسمها grand-stay على طريق المدينة فخمة ونظيفة وحراسة امنية من القوات الاردنية.
مقابلها حبيبة للحلويات وعمان مول ومطعم ريم البوادي والكلحة والبرجر كنج والسي تاون - وكثير خدمات وقريبة من شارع الجاردنز ويمكنك المشي لهذه الاماكن على الاقدام .
ويمكنك المرور على هذا الرابط وبتشوفي الشقق وهي انواع :-
لو اخذتم غرفة وصالة ومطبخ وتكرمون دورة مياه بتكون مريحة واقل سعر
http://www.grand-stay.com/
اتصلي واسئلي عن السعر ؟
Tel: +(962) (6) 550 2222
Fax: +(962) (6) 550 2220
انا افضل انك لا ترتبطي بفندق يكون قريب من المستشفى لان المستشفى بتكون على الاقل زيارة واحدة في اليوم .
في فنادق فخمة في منطقة الصويفية وهي منطقة حيوية وبها اماكن تسوق وخدمات متكاملة .
اذكر فندق الوليد او الوليدي بالصويفية صراحة كان نظيف وممتاز نزلنا فيه مرة .
في فنادق كثير معروفة لكن بعيدة عن الخدمات والاماكن الحيوية مثل الراديسون ساس وحياة ريجنسي وحياة بلاس والماريوت .
في فندق الرويال ايضا من افخم الفنادق في عمان . وفندق جديد سميرا ميس في شارع الجاردنز وقريب من الخدمات مدحه لي واحد من الشباب
المطاعم مثل ما ذكرنا ( ريم البوادي - جبري - قصر الغابة))))) وجبات للغداء والعشاء) ( الكلحة - الترويقة بالشميساني اسعاره غالية جدا - عبود في الجاردنز ) للافطار .
حلويات حبيبة على طريق المدينة قرب عمان مول لا تطوفكم الكنافة الحارة بالجلسات الخارجية خصوصا بعد العصر لان الليل الجو بارد
الاخ الذيب يمدح مطعم القدس بالبلد للمنسف الاردني .
محلات الحلويات للهدايا كثيرة وعن تجربة ( زلاطيمو - العنبتاوي - حبيبة )
ماذكرته عن تجربة شخصية وحسب رغبتكم اسف للاطالة ولاي استفسار اخر او معلومة بالخدمة .
الشمالي الغربي

اول شي اشكرك اخوي الشمالي جدا على ردك الكريم .. ومشكور ماقصرت
فعلا هاذي اول زياره لي وحتى لزوجي للاردن فمحتارين وايد خصوصا ان الوقت شتا وبرد
ومن شوي زوجي يقول ليش مانروح البحر الميت اذا كان دافي والجو يسمح بالسباحه في هذا الوقت والعياده نزورها في اليوم المخصص ؟
مادري هاذا راي والبحر الميت شنو اسم منطقته ؟ وهل اهو قريب ؟ وينفع للسكن بهالجو ؟
بالنسبه الفورسيزن اهو طبعا بكل مكان غالي بس انا استغربت من اسعار الشيراتون
عموما مو مشكله زدنا اليوميه حول 60 دينار كويتي يوميا يعني 800 ريال سعودي .. جيد ؟؟
زوجي رفض رفض تام الشقق الفندقيه او الابرتمنتس يقول كلها 5 ايام و4 ليالي ماتسوى ابارتمنتس
مشكور عالرابط وبصراحه الاماكن القريبه من الشقق الفندقيه كثيره ومشجعه بس ماباليد حيله !
غير جذي انا خذت برايك اني مو شرط اسكن قريب من العياده اوالمستشفى حتى لو نسكن خارج عمان .. ينفع ؟ علشان الجو يعني .
بالنسبه حق فنادق عمان شلون فندق هوليداي ان بعمان ؟ زين ؟ لقيت ان اسعاره مناسبه وايد وكمبنسكي عمان ؟ وكراون بلازا ؟ هل ممتازين ؟ ادري فنادق عالميه وسكنت في معظمهم بس انا اتكلم عن اللي بعمان ؟
وودي باللي قريب من الخدمات والسياحه والاسواق والمطاعم
شكرا على تفصيل المطاعم وراح احطهم في بالي ان شاءالله وازورهم وارد لكم بتقرير لو بسيط
واهم شي زلاطيمو .. منو مايحبه .. ولازم هدايا منه بعد
وعالطاري وين محلات البشوت والدراعات او الجلابيات هناك ؟
وانا جدا جدا جدا شاكرتلك وانحرجت من كثر ما سئلتك بس مشكور وماقصرت وبيض الله ويهك

صباح الخير رديت حق موضوعي مره ثانيه
الحمدلله استقرينا واخيرا على فندقين طبعا هاذا كله من فضل ربي واستشاراتكم ومواضيعكم
اما فندق الماريوت في عمان في الشميساني واخترنا الماريوت اليديد
او فندق لي رويال بعمان
شرايكم ؟ شنختار ؟ خصوصا ان فرق السعر مو وايد كبير حول 500 ريال سعودي ( الرويال اغلى)
اهم نوعا ما قريبين من بعض حسب قوقل ايرث
بس الاقرب حق مستشفى الامل الماريوت نص كيلو يبعد اما الرويال 2 ونص كيلو بس ماياثر اظن

حياك الله اختي وعلى الرحب والسعة بجميع الاسئلة والاستفسارات ولا يوجد اي احراج ولن نبخل عليك بما نملك من معلومات نعرفها .
السؤال عن اول سفرة علشان تحطون بالكم من التاكسي .
التاكسي داخل عمان بالعداد . وطريقة الحساب تكون كالتالي حتى لا تتعرضون للغش والاحتيال .
العملة الورقية هي دنانير - المعدنية قرش او فلس
اعطيك مثال :- لو كان العداد مكتوب 180 فمعناه ان حسابكم ( دينار وثمانون قرش = تقريبا 10 ريال ) وليس 18 دينار = 100 ريال
لاحظي الفرق لان البعض تقول له كم الحساب يقول لك ناظر العداد فتظن المبلغ كما ترى وتدفع اضعاف المشوار .
ان كان موعد المستشفى يوم واحد فالافضل تقسيم الايام الباقية .
البحر الميت يوم من الصباح حتى المغرب لانه بعيد عن عمان 46 كلم ولا يوجد اشياء حيوية هناك غيره . لا انصحك تسكنون هناك وتردون لعمان يوميا ( تعب ولا في تمشيات وتكلفة يعني خسارة بلا فائدة )
جرش قريبة من عمان 30 كلم وبها اثار جميلة تكون الزيارة بنفس اليوم .
باقي يوم المستشفى - يوم للتمشيات داخل عمان
اكثر مناطق الاردن تقريبا الان باردة فيما عدا بعض مناطق الجنوب والبحر الميت ادفى شوي من عمان .
الهوليدي ان قريب من الخدمات ومن المناطق الى عند الشقق الي ذكرتها و في مكان لايوجد حوله مباني كثيرة ( هدوء ) الفندقين الاخرين صراحة ما دخلتهم .
البشوت والفري والدراعات في البلد .
الاسواق الاخرى والمراكز التجارية ( على شارع الجاردنز - الصويفية - عمان مول - مكة مول - سيتي مول - )
اي استفسار بالخدمة وارجو ان اكون وفقت بتقديم لمعلومة المفيدة لك .
اخوك الشمالي الغربي

وعليكم السلام ورحمة الله وبركاته
دخلت لكي أقدم المساعدة ولكن ردود الفاضل الشمالي الغربي كانت
وافية وكافية ماشاء الله عليك ما قصرت
رحلة جميلة وإقامة سعيدة أتمناها لكم يا نور الدنيا .
وأسأل المولى أن يشفي جميع مرضى المسلمين وأن يلبسهم
ثوب الصحة والعافية .

مشكور جدا اخوي الشمالي وكفيت ووفيت ماقصرت على هالمعلومات الرائعه .. تعبتك معاي
بالنسبه للتاكسي معلومه جدا افدتني فيها .. بس ممكن التوضيح بشكل اكبر علشان قد اكون اسالت الفهم ؟
يعني مثلا 240 = دينارين و40 قرش ؟؟
0= دينارين و400 قرش ؟؟
0= اربع وعشرين دينار ؟؟
بالنسبه للاماكن اللي ذكرتها من البحر الميت و جرش وراح اخذهم في عين الاعتبار وراح اضيف لهم البترا وباجي الوقت راح احاول اقضيه في ربوع عمان لانها تحتوي على العديد من الاماكن
اما الجو البارد فالله يعينا عليه .. وبكثر من الملابس الشتويه الثقيله .. وان شاءالله نتحمل الجو
والفندق خلاص الحمدلله اعتمدنا وحجزنا فندق لو رويال عمان وحسيت ان فندق راقي وحلو ومناسب لنا
البشوت والدراعات والفروات ذكرت لي اخوي الكريم انهم في البلد ؟ شنو في سوق وسط البلد يعني ؟ وهل نوعياتهم راقيه كهدايا للوالدين الغاليين ؟
اما المراكز التجاريه والمولات فماشاءالله عمان فيها مجموعه كبيره ما اعتقد راح اقدر اروح الا اثنين او ثلاث بالكثير فاي مراكز افضل واحسن للزياره ؟
ارد اشكرك مره ثانيه اخوي وبصراحه ماقصرت ووفيت بالاجابات

اخوي الكريم DataBase مشكور على التفاعل مع الموضوع وفعلا اخونا الشمالي ماقصر كفى ووفى بالاجابات
واسال الله تعالى ان يتقبل منا الدعاء ويشفي جميع المرضى ويخفف عنهم ويرزقهم الصحه والعافيه .. اللهم امين يارب العالمين
تقبل تحياتي وسلامي