عليكم السلام ورحمة الله وبركاته
حياك الله يالحياة جميله
اول شي مدة السفر 14 يوم 13 ليله مو 15 يوم
هذا إذا كان المغادره حسب التواريخ اللي انت حاط المغادر 26 يعني الوصول 27 والعوده يوم 10
والجدول حسب المدن اللي طلبت
ليلتين سيلانقور -- اربع لنكاوي -- ليلتين جينتنق -- اربع كوالالمبور -- آخر ليله بورت ديكسون
و ممكن تشيل ليله من لنكاوي وتزودها علي بورت ديكسون لو حبيت وممكن تزوده علي كوالالمبور
والتعديلات ممكنه في اي مكان
وفيه ملاحظه إن يوم وصولكم بيكون جمعه والألعاب المائيه بسيلانقور بيكون سبت وبتكون عز الزحمه
لو طبعا بتدخلون الألعاب المائيه فأشوف يتعدل الجدول تصير بورت ديكسون هي الأوله وسيلانقور الأخيره
اما لو مابتدخلون الألعاب المائيه فالجدول الأول افضل شي
الفنادق
سيلانقور -- الصن واي لاقون وبعده البيراميد
لنكاوي -- الويستن او ذا دانا و بعدهم البلانجي بيتش
كوالالمبور -- قريب البرجين فندق تريدرز مطله علي البرجين وفي شارع العرب
الويستن و الماريوت وقريب شارع العرب رويال شولان
بورت ديكسون -- فندق قراند ليكزس غرفه ببركة سباحه خاصه
شوف اللي يناسبك سعره و فيه اقل منهم اسعار بس وقتك إن شاء الله تكون اسعارهم معقوله لأنهم الأفضل
والتنقلات
من سيلانقور إلي لنكاوي ومن لنكاوي إلي كوالالمبور
طيران وعندك الماليزيه وآير آسيا والفاير فلاي
قارن بين اسعارهم واختر الأرخص كلهم ممتازين مع العلم ان الماليزيه
والفاير فلاي يعطون 20 كيلو مجانا عفش و آير آسيا العفش بمقابل بسيط
ومن كوالالمبور لجينتنق ساعه بالتاكسي او الباص
ومن كوالالمبور لبورت ديكسون ساعه ونص تقريبا بالتاكسي
الصرفيه
وبالنسبه للصرفيه احسب حسابك بين 350 و 550 رنقت يوميا بين هالرقمين
ممكن تقل و ممكن تزيد قليلا بعض الايام
بالنسبه للأماكن اللي تستحق الزياره
شوف الروابط وموجود فيه جميع المواقع و الأماكن اللي تستحق الزياره
في سيلانقور
ملاهي الصن واي لاقون المائيه وسوق البيراميد هذي أهم مافي سيلانقور
ولو عندك وقت ممكن تمر الماينز ويندر لاند مع انها عاديه وممكن بعد تزور مدينة الأضواء
لنكاوي
أهم شي رحلة المناقروف البحريه تحجزها من المطار او من نفس الفندق او من مرسي السفن
قارب خاص من 250 الي 300 رنقت تقريبا لمدة ثلاث الي اربع ساعات
وعندك في لنكاوي تلفريك لنكاوي وقريب منه شلالات الأبار السبعه الطلوع لها شوي متعب بس رياضه
وبعد عندك ميدان النسر وحديقة ليجندا والأسواق القريبه منه ممكن تروح له علي نهاية العصر وتشوف الغروب
وحديقة الفواكه وتاخذ جوله في المدينه لو حبيت
وقريب فندق البلانجي بيتش عالم تحت البحار ولو بتزور اللي بكوالالمبور فهو يكفي وافضل اقصد اللي بكوالالمبور
وفيه أماكن ثانيه مثل التماسيح وغيرها نصيحه انا أعتبرها مضيعة للوقت والمال فخلك بشاطئ الفندق وفعالياته افضل
وبالنسبه لكوالالمبور
الأماكن كثير في كوالالمبور عندك اهم شي البرجين ومجمع سواريا وحديقة
البرجين بعد العصر جميله جدا جدا وفي نفس منطقة البرجين عالم تحت البحار الأكوريم
و فيه شارع العرب في الليل أسواق ومطاعم ومقاهي وحركه ووناسه
وعندك مجمع التايم سكوير يستحق الزياره سوق والعاب وفندق
وعندك برج المناره وبالنسبه للحدائق لو تحبها عندك حدائق الفراشات والطيور والزهو تروح لهم
بنفس الوقت مع حديقة بردانا وفيه عندك حديقة الحيوان حلوه مش كبيره مره ولو بتروحون لها تروحون
لشلالات تمبلر بارك مو بعيد مره منها وهي شلالات مريحه الطلوع لها سهل مو متعب
وعندك منطقة بوتراجايا منطقة الحكومه الجديده لو عندك وقت فاضي ممكن تروح لها منطقه جميله وهادئه
اغلبها مباني حديثه حكوميه وفي الرجعه ممكن تنزل بمجمع الميدفالي ميقامول من اكبر المجمعات في آسيا
وعندك أفاموسا انا اشوفها عاديه ولكن ممكن تعجبك فيها عروض كابوي وسفاري وحديقه بسيطه والعاب مائيه
يبي لها يوم كامل وهي خارج كوالالمبور بحدود ساعه ونص تقريبا
وفيه بعد مطل ومطاعم اسمه لوك اوت بوينت جميل جدا قبل الغروب والعشاء مايتفوت
جينتنق
اهم مافيها طبعا الألعاب والجو الجميل جدا
بورت ديكسون
مافيها إلا منتجع قراند ليكزس عشان كل غرفه ببركة سباحه خاصه مافيها مايستح الزياره
وفيه اماكن كثير في هالروابط لأني قلت لك الأهم
https://artravelers.com/p/re/452938

هل يمكن وضع في الجدول جزيرة تيومان لأني شاهدت لها تقرير لوافي في زمن جافي واعجبتني كثيرا هل يمكن زيارتها في الرحله ؟ ومتى تكون بعد اي مدينه اذا امكن زيارتها ؟

الحياة جميلة
اول شي انا اشكرك علي ردك يعطيك العافيه وجزاك الله خير !!!!!
الكلمه الطيبه تؤجر عليها إن شاء اللهعموما جدولك مايحتمل زياده ونصيحه دامها اول زياره خلها للمدن الرئيسيه و المهمه
اما تيومان جميله بس مافيها شي وهادئه جدا و ممكن بزياره ثانيه
والتقرير اغلبه صور من النت ولا تعتمد علي صور النت لأنها لا تأتي بالحقيقه
فخلك علي جدولك افضل و إن مره حبيت تزورها فممكن تلغي جينتنق وتكتفي
بزيارتها من كوالالمبور من الصبح للمساء

كلمة شكر لاتكفي لك بمساعدتك بالمعلومات القيمه والمهمة ....
ويعطيك العافيه .....
ولاكن لي رجعه تحملوني لين وقت السفر لأني حستفسر منكم اكثر ولاكن بعد ما اجمع معلومات وكلي امل بالله ثم فيكم بأنكم ماراح تبخلون علي بمعلوماتكم لأن هذي أول سفره لي خارج المملكة ومتخوف قليلا .... لاكن البركه فيكم وفي منتداكم العظيم ومعلوماتكم القيمه