يعطيك العافية برنامج ممتاز ويغطى تقريبا اغلب الاماكن رحلة موفقه

يعطيك العافية اخوية ابو السعد ..
بالنسبة لحديقة صن واي لاقون البرنامج ممتاز ..
لنكاوي للأسف ما اقدر افيدك لاني ما زرتها ..
بينانج انصحك لا تروح حديقة الفواكه لانها ما تسوى و مافيها شي يستاهل العنوه .. المكان عادي جدا و ما شفنا اشياء يديده و الجو كان حار يوم رحناها ..
و بالنسبة ل يوم الثلاثاء في بينانج ما بتقدر تغطي كل هالأماكن في يوم واحد !
مرتفعات بينانج وصلنا لها بس ما صعدنا القمة .. تلاقينا ويا ناس سعوديين و ما نصحونا فيها بس يمكن تكون حلوه .. ما اقدر احكم لاني ما صعدت لها
بالنسبة لفندق با فيو بيتش انا اشوف فندق بارك رويال أفضل عن تجربة .. بس طبعا على حسب الميزانية
برج المنارة في كوالالمبور وايد حلو استانسنا فيه بس المتحف الوطني ما رحته هالمره للأسف .. لكن اعتقد اني زرته قبل 7 سنين سنة 2000 ..
جنتنج الأفضل انك تبات فيها ليله وحده .. نحن وايد استمتعنا فيها و الصراحه احلى منطقة عندي في ماليزيا .. الجو عجييب و مدينة الملاهي متعة بحد ذاتها و فيها مراكز و شغلات حلوه بس الفنادق مستواها عادي يعني نحن حجزنا في فندق 5 نجوم ( فندق جنتنج ) بس مستواه 3 نجوم !
بوكيت تنجي الأفضل انك تخليها مع جنتنج لانها قريبه منها بس اليوم الثاني ( يعني تبات في جنتنج ) ..
البرجين التوأم تخليهم الصبح مع المركز التابع لهم و ذا ماينز وندر لاند من العصر إلى المسا
الحدايق كلها في منطقة وحده و قريبه من بعض يعني تقدر تغطيها في يوم واحد بس المشكلة ان الصبح يكون الجو حار .. نحن هلكنا من الحر في حديقة الطيور .. بحيرة تاسيك بيردانا رحناها بعد الظهر و كان الجو مغيم و المطر ما وقّف ما شاء الله .. وايد استانسنا فيها .. انصحك فيها و بقوة
بالنسبة للمطاعم نحن كنا ساكنين في فندق ( برجايا تايم سكوير ) عبارة عن فندق و مول و مدينة ملاهي و فيه تشكيلة واسعة من المطاعم .. كنا كل يوم نتغدى و نتعشى فيه و طبعا الأطفال ما يحبون الا ماكدونالدز !
اتمنى اني أفدتك .. و أي استفسار نحن فالخدمة .. ما يردك الا كيبوردك ^_^

مساء الخير
برنامجك في لنكاوي ممتاز
أول يوم حاول تروح التلفريك بدري قبل الشمس لا (تسنتر) عشان لا يصير الجو حار عليكم
وبعدها رحلة المنغروف رحله ممتعه بمعنى الكلمه ولو تتغدا بالمطعم البحري إللي على النهر يكون عز الطلب
هو بيكون يوم ممتع.. بس متعب شوي.. الله يعينكم
ثاني يوم إذا بتروح حديقة التماسيح روح أوقات العرض فقط لأنها بدون العرض مو شي..
عالم تحت البحار طبعا ماعليه كلام ولازم تزوره..
عموما إذا قررت تجلس هناك اكثر من يومين اعطيني خبر أقولك وين تروح بعد
أنا كنت مقرر 3 ايام فب لنكاوي.. جلست 5 وبغيت امدد يوم سادس..

zozo6
الله يعافيك و يوفقنا و إياكم إلى كل خير

غلا الإمارات
الله يعافيك مشكور أختي على النصائح

Special_Offer
يعطيك العافية أخوي

ابوعبداللطيف
يعطيك العافية أخوي