بعد ماشيكنا من افاموزا .. ركبنا مع السائق حسن وبدينا رحلتنا لقنتنق ..
طبعا الطرق وناسه ماتحس بملل ابد
مناظر حلوه .. غير السوالف والضحك واهم شي الحلويات
حتى اتذكر الصغار انبسطو بالمكرفون الي في الفان فصار كل واحد يقول انشوده
وبالاخير ختمها ابوي وقال اغنيه من العصر الحجري
واحنا ورا بنموت من الضحك
وصلنا قنتنق وهالمره ماركبنا التلفريك .. لكن بالرجعه ركبناه..
المهم
وصلنا الي فندق ريسورت ..
جميل جدا .. اخذنا فيه كذا غرفه
وصلنا الليل تقريبا الساعه11
وكنا ميتين جوع ..
نلف يمين يسار المطاعم مسكره
ياناس مافيه شي مفتوح
قالو لا
دخلنا السوبر ماركت مالقينا شي يشبع
عندهم انواع خبز غريبه محشيه مدري ايش
اخذناها وتغصبناها
وبعدين كل واحد راح يدور المخده
قمت الصباح واول شي فتحت الشباك
ياربي على الجو رائع
والمنظر قمه في الخيال سبحان الله
بعد ماقامو الكل
رحنا نفطر طبعا الفطور مجاني
المهم
فطورهم حلو
بس فطور فندق قنتق احلى ;)
انا كل صباح اوقف واحتار وش اختار من الشاي
في كذا نوع
لكن بالاخير اطلع بالشاي الصيني لانه لذيذ
المهم بعد ماافطرنا
رجعنا الغرفه شوي نتجهز
ورجعت فتحت الشباك
ياناس ايش المنظر هذا سحب قدامك شي رهيب
تحس انك تطير فوق هالسحب
تسرح بدنيا ثانيه
تتامل قدرة الخالق وابداعه سبحانه
كل شوي احاول المسها بيدي ههه رائعه...
خلصو لبس وانا عند الشباك احاول اصيد هالسحب
المهم بعد ماجهزو
رحنا للالعاب
الالعاب حلوه خصوصا بهالجو
احلى شي فيها القطار الكبير وهذيك الي تطلع فوق وتنزل يالله اذا ركبتها وطلعت فوق تشوف منظر قمه في الروعه لكن لاسف ماقدر امسك الكاميرا اخاف امسكها تطيح مني اذا نزلنا بقوه ..
وفيه لعبة الكراسي الي تدور الي اول شي عند البوابه حلووه
لو اشوف هالالعاب بمكان ثاني اقول عاديه وفيه احلى منها بكثير
لكن جو قنتنق يخليك تستمتع بكل شي
لاتضحكون علي:rolleyes:
طبعا احلى شي فيها اذا رش المطر وانت بمدينة الملاهي واو روعه
احساس لايوصف والله لو ماالحيا كان جلست اناقز تحت هالمطر
شي يرد الروح وربي
وفي هالاجواء حسينا بالجوع بعد اللعب .. رحنا طلبنا من المطعم واكلنا
ولما خلصنا اكل خلص المطر ورجعو شغلو الالعاب من جديد..
كملنا الالعاب الين ملينا
مشينا للفندق طبعا هو قريب مره من الالعاب
يالله روعه المشي بقنتنق سحب وجو خيال ورذاذ مطر لوامشي من هنا للصبح مااقول لا
رجعنا للغرفه وريحنا شوي واتذكر هذاك اليوم نمنا بدري
المهم ثاني يوم بعد الفطور وصيد السحب
رحنا لفندق فيرست ورلد
هناك عالم ثاني بس ينقصه الجو طبعا
في اللبي حق الفيرست ورلد يروح الوقت بدون ماتحس
فيه كذا شي
احنا نمشي بالممر بين فندقنا وهالفندق
وبامكانك تمشي من برا عشان الجو
انا احيانا اترك اهلي وامشي من برا
المهم هالمره كنت امشي بالممر ويوم وصلنا
الاقي على يساري محل لبيع الدوريان
وتذكرت كلامكم عنه
قلت يابنت خليه بعدين الحين يصير فيك شي وانتي مابعد تهنيتي
وانتي راجعه للفندق خذي
المهم دخلنا جوا
وبسم الله يستقبلونك حقون بيت الاشباح
حسبي الله على بليسهم
اشكالهم تخوف وتضحك بنفس الوقت
انبسطو اخواني معهم
وبعدين قصينا تيكيت ودخلنا لبيت الاشباح
انا واخواني الصغار
اول شي تدخل بعربه تطلعك لفوق عند بوابه الاشباح
وكل واحد يعطونه زي العصا صغيره تنور
المهم طلعنا الا ونلاقي واحد هو وزوجته يستنون احد يدخل قبلهم
رحت يقالي شجاعه دخلت اول وحده
والشعب كلهم وراي
صراخي وصل كوالا لمبور
صرت ارمي العصا حقتي هذي قدام واشوف وش بيصير
عشان مااتفاجأ :rolleyes:
لان اذا رميت العصا يصير فيه حركه ونور وتتحرك الاشياء
المهم
انا شفت الدعوه مافيها يمه ارحميني
وكل شوي طالعلنا شي ينشف الدم
صرت كل مره اخلي واحد قدامي
الين صرت اخر وحده وقدامي الزوجين وقدامهم اخواني
وليتني مارجعت
من الخوف تحس احد يلاحقك ورا
وكل شوي التفت ماالاقي احد
الا واسمع واحد من اخواني يقول زهروه واحد ورا يلاحقنا
هو قال كذا الا ونقزت اول وحده
والله لايوريكم بطني راح من الضحك وهالزوجين ماتو علينا ضحك
وصلنا البوابه واحنا ماسكين بطونا
المهم يوم طلعنا
تركت البزران
ورحت مع الكبار نتفرج على المحلات
صراحه محلاتهم حلووه
اكثر مكان شريت منه قنتنق وبينانق
بس قنتنق فيها غلا شوي
بس فيها اشياء جدا ناعمه سواء للكبار او الصغار
وفيها محل اكسسوارات جوالات حلوو
وبطاقات شحن الجوال تلاقونها بالفيرست ورلد بس اظن بالدور 2
وبعدين تغدينا
واهلي مايحبون يغامرون بمطاعم جديده
فكل اكلنا كان فاست فود الا فيما ندر
المهم اخذنا جوله على المحلات
وبعدين دخلنا السينما
وبعدين رجعنا وفي طريق العوده لفيت على محل الدوريان لقيته مسكر
قلت بنفسي احسن :rolleyes:
المهم نمنا وبعدين كالعاده قمنا الصباح وافطرنا
واللزي منه
وعجبنا الوضع بفيرست وورلد
فرحنا له نكمل الاشياء الي فيه
هالمره مشيت من برا والجو ماشاءالله كل يوم رائع
المهم تلاقينا عند حقون الاشباح
وكانو هم نقطه تلاقينا دائما لانهم بوسط الساحه
اخواني مبسطوين مره معهم ودخلو الاشباح ميه مره
المهم رحنا هالمره لتسلق الصخور
وقصو تيكت الصغار وبدو يجربون يتسلقون
واحنا نضحك على اشكالهم اذا احد وقف بالنص ورجل يمين ورجل يسارولا رجل فوق ورجل تحت ولاعاد يقدر يتحرك
استمتعو فيها كثيرالصغار
وواحد منهم بس قدر يوصل للقمه
بعد مانهد حيله
يبغالها قوة تحمل وتركيز
المهم خلصنا منها
رجعنا لنقطه التلاقي
وشربنا كوفي اظن في محل اسمه كوفي بيين
لذيذه كوفي موكا عنده
بعد ماخصلنا
رحنا للطيران .. مكان زي الاسطوانه يلبسوك لبس وتطير كانك في الفضاء
حجزنا للي يبيها ورحنا الين يجي موعد الطيران
رحنا كملنا تسوق
ثم رجعنا للطيران .. وجلسنا نتفرج على الي دخلوو
اشكالهم تحفه تموت ضحك وربي
طبعا جوا هالاسطوانه يكون فيه شخص يمسكك اذا طحت ويرفعك لفوق كل شوي
وتقدر تدفع زياده وتاخذ شريط فيديو مصور فيها اللقطات الخاصه فيك
خلصنا منهم رحنا تعشينا
ثم رجعنا للفندق
اليوم الي بعده بعد الفطور والصيد
رحنا لفندق قنتق
فيه كذا محل كوفي وكذا مطعم وسيع صدره ماعليه
وفيه صالون .. قص صبغه مساج واللزي منه
ماعليهم
وفيه مكان للحريم فقط
لفينا شوي هنا ثم رجعنا لفيرست وورلد
قصينا تيكت عشان مدينه الثلج
ودخلنا ياي بارده
طبعا تلبس لبس خاص جكيت وقفازات وماالى ذلك
اخواني مااشوف الا هالخشوم الحمر من البرد
بس وناسه
انا يدي تجمدت ماعاد اقدر امسك شي من البرد
تقدر تدخل كاميرتك جوا وتصور
بس كله كوم ولما واحد من اخواني رمى علي كورة ثلج
اح اي
دخل كله بعيني
منظر تحفه انا غمضت ماعاد اشوف ووقفت بمكاني
مدري اضحك ولا ارمي عليه عشر كور بدل كوره
منظري تحفه صار ثلج على النقاب وانا مغمضه وواقفه
وماسكه بيدي اخوي الصغير وهو يضحك علي
المهم بعد ماخلصنا طلعنا نتعشا
واخواني راحو لمكان جمب بيت الاشباح فيه على قولتهم فيه غرائب اسمه موشن ماستر بيلف ات اور نت
يقولون حليو
وبعدين رجعنا للفندق ورتبنا العفش لانه بكره بنروح لكاميرون هاي لاند..
والدوريان ماذقته لانه وانا جايه الصباح اقول لا خليه بعدين ثم اجي والاقيه مسكر وهكذا ههه
المهم من بكره لبسنا وشيكنا من الفندق وطلعنا
وانا قلبي حزين لفراق قنتنق بصراحه جوها مستحيل تمل منه
شافنا ابوي حزنانين فقال تبون ننزل بالفان ولاالتلفريك ..
قلنا تلفريك ..فقال لحسن ينزل بالفان ويستنانا تحت
ركبنا التلفريك بالرجعه ..
تلفريك وسط السحب وش اروع من كذا منظر ؟؟
وكل مانزلنا شوي اطالع فوق الاقي مدخل التلفريك لسه باين ثم شوي شوي اختفى وسط السحب
وصرنا مانشوف الا السحب تودعنا معلنه نهاية الرحله لقنتنق وبدايه رحله جديده لكاميرون هاي لاند
ادري طولت عليكم سامحوني ..
الصور بنزلها بعدين لان الكلام كثير هنا