البدايه دي اول مشاركه ليا بموضوع في المنتدي الرائع ده ولأني استفدت منه كتير حبيت اساهم ولو بجزء صغير يفيد المجموعه الجميله الموجوده من زوار المنتدي واللي اكتر شيء عاجبني فيه هو التحام العرب وترابطهم في الردود والمواضيع تحس اننا اسره واحد ربنا يقوي شوكتنا ملناش غير بعض
نبتدي الموضوع من الاول خالص حجزت طيران داخلي علي مصر للطيران من القاهره لشرم الشيخ كان ذهاب ورجوع بحوالي 1200 جنيه واحيانا الاسعار بتقل عن كده او بتزيد حسب ميعاد اليوم والرحله والمواعيد في مصر للطيران مفيش اكتر منها
والرحله بتاخد حوالي 45 دقيقه متحسش بيهم وتستمتع بمناظر جبال سينا
ملحوظه بخصوص الطيران: فيه شركة طيران داخلي جديده غير مصر للطيران اسمها smart aviation
ميزتها انه سعر الرحله فيها سابت ورخيص 360 جنيه يعني رايح جاي 700 جنيه مصري ودي اكتشفتها مؤخرا وجربتها بنفسي وانا راجع من شرم
في سفرية شغل وكانت جيده
مشكلتها الوحيده انه مواعيدها قليله ومش كتيره زي مصر للطيران
فلو ميعادها يتناسب معاك حتوفرلك
وصلت مطار شرم الشيخ الحمد لله انا والاصحاب وكنت متفق مع شركة رحلات اعرفها انها تستنانا بعربيه van
عشان توصلنا لغاية الفندق عشان كان معايا اصحاب من بره مصر وكنت حابب اكرمهم واوصلهم مرتاحين للفندق اللي كان في خليج نعمه فالمسافه كبيره
العربيه الvan نضيفه جدا ومكيفه ومريحه وشالت كل شنطنا وقعدنا مرتاحين
وكان فيها غير السواق كمان مرشد سياحي هو للي استنانا وخدنا من المطار ووصلنا لغاية الفندق وفي الطريق ادانا فكره سريعه عن شرم
واخد 100 جنيه مصري
والحمد لله وصلنا للفندق ولما اقول الفندق يبقي لازم اقف شويه عشان دي حكايه لازم تتحكي
بعد الفحص والتمحيص الشديد علي افضل الفنادق بسعر غير مبالغ فيه توصلت للفندق اللي يتحكي عنه حكايات
وهو فندق stalla di mare
فندق كل مافيه جميل من اول ماتدخل لغاية ماتخرج
فندق 5 نجوم بكل ماتحمل الكلمه من معني وكان بسعر 100 دولار في الليله للغرفه المزدوجه القياسيه Standard room
الفندق موقعه رائع في خليج نعمه ولكنه في مكان مميز واخد جنب في اول خليج نعمه وبيفصل بينه وبين الميناء والممشي هضبه
وعشان كده مينفعش تدخل لخليج نعمه منه مباشرة ولازم تطلع لشارع السلام وتدخل خليج نعمه من اوله .. قد يجد البعض انه ده عيب ولكن انا شايف
انه دي اكبر ميزه لانك جمعت مابين حاجتين قربك لخليج نعمه وفي نفس الوقت بعد الفندق عن الضوضاء والزحمه واللي بتعيب
معظم فنادق خليج نعمه (تحس كانك قاعد في الشارع )
لا ده بقي هدوء رهيب واستمتاع بالخصوصيه وكان كل خليج نعمه في مكان وانت ملك لوحدك في فندق خاص
ليك شاطيء خاص من اروع الشواطيء الصخريه ميزته انك ممكن تعمل غطس او snorkeling فيه ببلاش
وتتمتع بالمنظر الجميل للشعب المرجانيه والاسماك الملونه والشاطيء في حد ذاته مقسم لكذا شاطيء او كذا قعده
من اول مادخلنا تم استقبالنا بمنتهي الترحاب وادونا فوط نضيفه مليانه عطر جميل
عشان نمسح ايدينا ووشنا من تعب السفر واخدو مننا الشنط فورا وقالولنا اتفضلو في اللوبي وادونا مشروب الفندق الجميل
وتم انهاء اجراءات الحجز في دقائق واحنا كنا واصلين بدري الساعه 10 قبل ميعاد الcheck in
فقالولنا الغرفه حتجهز الساعه 2 وراحو موصلنا ل family room عشان نستريح فيها
لغاية مالغرفه تجهز كانت غرف رائعه ومستقله للعائلات تحس كانها شاليه كبير
ووصلونا جوه الفندق لل family room بعربيه من بتاعة الجولف دي رغم انه المسافه قريبه بس عشان منتعبش رجلينا ووصلونا واتطمنو علينا
وقبل ما تيجي الساعه 2 اتصلو بينا علي الغرفه العائليه وقالولنا الغرف جاهزه
كنا حاجزين غرف مطله علي الحديقه لانها الاقل سعر ورغم كده هي مش مطله علي الحديقه بس !
هي مطله علي الحديقه والبحر وكمان علي الجاكوزي الخارجي في منظر رائع
وكل الغرف ليها بلاكونات
الغرف نضيفه جدا وواسعه وبتتنضف يوميا بطريقه رائعه
والامان رهيب
بتيجي تلاقيهم مرتبينلك حتي هدومك ... كنت ناسي كذا مره فلوس وجيت لقيتهم حطينها علي البار ومرتبنها جنب بعض بطريقه جميله
وفيه كمان غرف باطلالات بانوراميه علي البحر غير الغرف العائليه الجميله المستقله تماما والاجنحه المبهره !
فطار الفندق عظيم بمعني الكلمه فيه كل الاصناف وحتي الصنف الواحد زي البيض مثلا بيتعمل بكذا طريقه لارضاء كل الاذواق
الفطار open buffet
مليان من كل حاجه جمليه انواع الفاكهه والمخبوزات الفرنسيه والشرقيه
من الاخر مش محتاج تتغدي حتفطر وتفضل شبعان لغاية العشاء !
الفندق فيه حمامين سباحه فوق بعض ومصصم بطريقه تحفه وكذا قاعده للشاطيء زي ماقلت و مركز غطس وتاجير ادوات الغطس بسعر تافه
والفندق بيقدر ينظملك لو حبيت جميع الرحلات اللي انت عايزها تقريبا بنفس الاسعار العاديه او يمكن اغلي شويه انت وشطارتك بقي في الشركه او الشخص اللي حترتب معاه رحلاتك
فيه 3 مطاعم في الفندق بتقدم احلي اكلات وانواع كتير من الاطباق المصريه والايطاليه واطباق دول البحر المتوسط والاسيويه
وزي مافيه غطس فيه كمان ملاعب جولف وتنس وكره طائره وبلياردو وجيم وحجرة العاب ومكتبه وعروض تنوره ورقص شعبي
وفيه spa رائع بس بفلوس
وفيه جاكوزي تحفه في الهواء الطلق مجاني بتستمتع فيه بالمياه السخنه وترخي عضلاتك من تعب السنين ! ودا كان من اجمل الاشياء
العاملين في الفندق بيشيلوك من علي الارض شيل وطول ماتبقي قاعد علي حمام السباحه
ييجو يدوك قطع من الكانتالوب والفاكهه وكانك باشا
طولت شويه في الفندق بس يستاهل ولازم اديله حقه لاني جربت غيره وقلت مش حنزل في شرم بعد كده غير عليه ان شاء الله نكمل في الحلقه القادمه
اسبكم مع الصور وطبعا يهمني اسمع رايكم
صوره من مطار القاهره وطائرة مصر للطيران للرحلات الداخليه

صوره لجبال سيناء والمنظر الرائع من الطياره

مطار شرم الشيخ

صوره بانوراميه للفندق مش انا اللي مصورها بس جيبتها عشان اوضح موقع الفندق في خليج نعمه (بقية الصور كلها من تصويري)

غرفتي في الفندق

المنظر الجميل من بلكونة الغرفه

وده علي فكره مش حمام سباحه ده الجاكوزي الخارجي outdoor jacuzzi

حمام السباحه الاول في الطابق الثالث

حمام السباحه الثاني في الطابق الارضي وفيه كرة ماء

ركن خاص بالاطفال في حمام السباحه

صوره بانوراميه من تصويري لجزء من اجزاء الشاطيء

وواحده تانيه اقرب

الجمال في كل مكان في الفندق

صوره للغرفه العائليه

swimming, snorkeling and diving

المنظر بالليل

الي اللقاء في الحلقه القادمه باذن الله