السلام عليكم ورحمة الله وبركاته عدنا الى الرياض بعد جوله ممتعه ورائعه في بلاد العجايب والنظام والترتيب والاحترام تمشي عدل يحترمونك الناس تمشي غلط ارضاء بالي يجيك اتوقع هذا نظام ديرتهم في التقرير بنتمشى معكم في الصين حسب الجدول الي مشينا عليه حبه حبه واذا تبون بالتفصيل فصلنا واذا تبوج جاهز موجود بعد أولا التخطيط لرحلة في البدايه ماكان فيه دوله معينه والا هدف محدد مره نقول شرق ومره نقول غرب يعني مافيه وجهه معينه والصراحه قويه بعض الاحيان بس اكتشفت ان مواقعنا العربيه في الانترنت تفتقد إشياء كثير خصوصا في موضوع السياحه وقع الاختيار على الشرق وقلنا يالله يالصين وينك قررنا الصين لتكون الرحله سياحيه وعمل في نفس الوقت يمكن يجوز لنا شي ويمكن لا تم اختيار الراعي الرسمي لرحله خطوط الكاثي باسيفك ( الرياض - هونج كونج - شنغهاي ) فتره الرحله 16 يوم عدد الاشخاص 2 قيمه التذاكر 3744 ريال لنفر الواحد قصينا التذاكر عن طريق موقع الخطوط بكل سهوله ويسر من الرياض الى هونج كونج ومن هونج كونج الى شنغهاي ومن هونج كونج الى الرياض طبعا بيتخلل المشوار هذا رحله بالطياره من شنغهاي الى كونزوا وبالقطار من كوانزوا الى هونج كونج طبعا انتم عجلين على الصور ما عليكم الصبر زين خلك مثل الصينين وهم يحترون القطار يلعبون بالجوالات او يلعبون لعبه بصابع اليدين بس رحت وجيت ما فهمتها الى يومك تم تجهيز الفيزا الصينيه من مكتبهم في شارع التخصصي بعد طيران الامارات يمين يجونك على يدك اليسار في العماره مده استخراج الفيزا اربع ايام مع تجهيز مافيه ملف اخضر لاتشيلون هم يبون سلمكم الله حجز فندق في الديره الي بتروح لها في الصين لا يقل عن ثلاث أيام ويبون صوره الجواز وطبعا تعريف من الدوام الي انت فيه وطبعا صوره لفيسك الكريم سلمناهم العده وبعد اربع ايام استلمنا الجوازات مفيزه وخالصه تروح الحين تزهب شنطتك خلصنا من موضوع الفيزا نجي لموضوع الشنطه يعني ما يحتاج اقول جهزوا ملابس بس شيك على درجات الحراره قبل ما تجهز الشنطه ولا يغرك الي يقولك بردهم رطب ترى عندهم برد يدخل في العظم وما يحتاج تملى الشنطه مره لانك بتقضا من هناك رضيت ام ابيت فيك فيك وما يحتاج قواطي تونه والا قواطي فول عندهم مطاعم زينه وعندهم ماك وبيتزاهت ودمينوز وبرقر كنق ومطاعم واجد يعني منتب بلشين مره في الاكل بس قلهم انك ما تبي لحم خنزير وما تبي شي مذبوح تبي خضروات او سمك والامور تساهيل مليتوا من الهذره والله في صور واجد بس يبيلي اعرف طريقه التحميل وتملون من الصور ها جهزتوا الشنط والا توكم اذا جهزتوا الشنط علموني تراني انا الي بسوق وما عليكم بصير مصحصح والا يوجعه بطنه من المطبات الهوائيه ترى الخط مليان مطبات ياخذله حبه تنومه لين ناصل بعدين نقومه من النوم أحتريكم عند بوابة الطياره وعلموني عدد الركاب لاننا بنصير على ارتفاع 39000 قدم وبسرعه 964 كم في الساعه تستغرق الرحله 7:30 كتابيا سبع ساعات ونص في الروحه في الرجعه عشر ساعات يمكن لاننا عكس دوران الارض او ان الطيار وده يتمشى لا تنسون وترى ما فيه واسطه الي بيتاخر بمشي واخليه منحب في الخطوط السعوديه لنا لقاء اخر