1. طيب بندخل بالموضوع وبالنقاط مع ان النصر له الحين 3 نقاط


2. النقاط كما هي


3. بس خويكم ذيب قولوا ليه


4. دورت مغسله ولقيتها يجون للفندق وياخذون ملابسك ويغسلونها ويرجعونها لك

السلام عليكم ورحمه الله وبركاته
اخواني واخواتي((عشان لا يزعلون علينا الجنس الناعم))
ومع اني ما احب الاختلاط نفصلهم عن بعض وبنخليها كذا
اخواني
ثم اخواتي
كل واحد راح ماليزيا اكتشف بعد ما رجع ان له ايجابيات وله سلبيات
وانا بهالمناسبه السعيده هذي بعد فوز فريقي النصر السعودي العالمي ب 12 هدف على فريق من جيبوتي مدري منين جايبينه
مع اني اشك انهم ضايعين من حمله حجاج وجوا للملعب بالغلط
الاخ وهم الرجاء الدخول في الموضوع بدون فلسفه زايده هذا منتدى سفر مو منتدى كوره))
مع تحيات اداره المنتدى
:112: :112: طيب لا تدفون قاعد اكتبلكم ببلاش مع ان قناه ديسكفري عارضه علي برنامج بس كما اسلفت في بدايه الموضوع ما احب الاختلاط
المهم نرجع الى محور الحديث وخضم السالفه
حلوه خضم
اثناء روحتي لماليزيا الصيف الماضي
صارت لي مواقف تحصل لاكثر المسافرين
حبيت احطها لكم على شكل نقاط لاني ما اعرف اكتب موضوع على بعضه
وموضوع التعبير عندي عقده من ايام الطفوله بسبب مدرس اسمه صالح او كما احب ان اسميه ((صويلح الدب)) هو اللي كرهني بالماده ومن يومها وانا كل سنه اجيب فيها مقبول
المهم نرجع مرة اخرى الى خضم الموضوع
الاخ وهم صارلك ساعه والى الحين حنا ما ندري انت وشتبي تقول
عندك موضوع ولا رح لاقرب مسجد واشرحلهم معاناتك
ادارة المنتدى
طيب بدخل بالموضوع
المهم كما اسلفت راح اذكرلكم المواقف على شكل نقاط وعلى طاري النقاط اليوم النصر فايز ب 12 هدف حاله حال اللي فايز بواحد صفر
المفروض على كل هدف نقطه
وهم اخر تحذير ولا سنضطر الى حذف موضوعك وتسجيلك في احد المنتديات الرياضيه على حسابنا بس الله يرحم والديك لا عاد تمر علينا
اداره المنتدى الصابره

طيب بندخل بالموضوع وبالنقاط مع ان النصر له الحين 3 نقاط

النقاط كما هي

1- اول ما تدخا ماليزيا من المطار((يعني بالسفينه اكيد من المطار)) بيقابلونك اشكال والوان انحش ((اي اهرب وفر فرار الصخله من الذئب)) من الصينين لانهم اولا بيسألونك عن الفندق الي انت فيه ويشيكون بالكمبيوتر اللي عندهم وبيقولونلك مالك حجز
بس اخوكم ذيب ماتعدي عليه هالسوالف دقيت على الفندق وقالولي حجزك اوكي وتعال حياك الله((حياك الله بالماليزي ))
2-اذا وصلت الفندق وريحت وعينت من الله خير لا تتلقف وتسوي نفسك فاهم
اول شي اسال الكونسرج مدري وشترجمتها بالعربي بس المهم هو الرجال اللي له مكتب جنب الريسبشن هو اللي يفيدك عن كل شئ وبالاسعار وبالاوقات
3- التكسي لا تاخذه من قدام الفندق يعني امشلك خطوتين وخذ من اللي برا وخاصه في بييننق
4-اذا انت في كوالا لمبور لا تسوي نفسك زيي برستيج تبي مغسله المغاسل واجد
لاني شريت الله يعزكم جوارب ب 19 رنقت وغسلتها بالفندق ب 21 رنقت يعني لو شاري واحد جديد اصرف

بس خويكم ذيب قولوا ليه

دورت مغسله ولقيتها يجون للفندق وياخذون ملابسك ويغسلونها ويرجعونها لك

المغسله هذي سلمكم الله لما تطلع من فندق الجي دبل يو ماريوت اللي بكوالالمبور شارع بوكت بنتانج تلف يسار من الفندق وتدخل الشارع الفرعي يعني الشارع الرئيسي وراك وتمشي لما الشارع العام الي بنهايه الشارع الفرعي مسافه 5 دقايق بالاقدام وبعدين تلف يمين وتمشي مسافه 5 دقايق بالاقدام مره اخرى بعد ما تعدي مطعم ((انصحكم لا تجونه))اسمه شامي طالع يسارك بتلقى لوحه برتغاليه هذي هي المغسله رحلهم اول مره وعطهم رقم غرفتك وهم يوصلون لك
5-اسال الكونسرج عن الاماكن لاني مرتين اروح التون تاور والقاه مقفل مره اجازه ومره صيانه
6-في بيننق الشركات السياحيه الي تودي لنكاوي واجد وكلها نفس الشئ بس انصح خذ من الفندق صح نفس الفيري بوت بس الجدول في لنكاوي يختلف
7- في بيننق سواق اسمه ((لي))رهيب يوديك كل مكان ومحترم جدا جدا جدا عكس الاستاذ صويلح الدب وداني عرس هنود وانبسطت وياهم وشفت عروسهم ومراسمها وقعدوني معاهم بس ما كملت لان فيها طقوس بوذيه او هندوسيه ويوديك اماكن داخل بيننق مستحيل تشوفها مع الشركات السياحيه
السواق هذا خذيته من قدام فندق الهوليدي ان ب 25 رنقت للساعه وسيارته خاصه مش تكسي
ويفرح لا شاف مسلمين لانه الضاهر بيسلم ويحب يسال عن الاسلام وتناقشت انا وياه عن الاسلام وهو معجب بالاسلام وبالمسلمات شلون محترمات لانه قابل عايله كويتيه ولما جا الحساب صار خطا بالحساب ولما جاء الليل دقت عليه الاخت الكويتيه وقالتله باقيلك 15 رنقت فهو مستغر ب من الحركه هذي وقلتله حنا يالمسلمين ما ناكل مال حرام
8- بيننق هيل حلوه بس يبغالها روحه من الضهر لا تجيها العصر لان الوقت ما يديك تلفها كلها
واحلا ما فيها منضر الغروب مع هبات النسيم وقليل من المطر ذكرتني باغنيه محمد عبده (( اتعلمين اي حزن يبعث المطر))
9-لنكاوي تستاهل اكثر من يوم مع اني رحت الصباح ورجعت الليل بس متحسف ودي لو طولت
10-صن واي لاقون لا تروحلها بالعطل لانك بتنتضر اكثر من ساعه على اللعبه ويروح يومك على 4 لعبات
11- من كولالالمبور الى بيننق بالباص جدا ممتع احلا من الطياره ونفس الوقت لان الطياره على ما تروح المطار وتنتضر رحلتك وتطلع الطياره وتنزل من الطياره وتاخذ شناطك الا هي 5 ساعات وبالباص اربع ساعات ويوقفك عند محطه فيها مسجد وسوق فواكه والمناضر روعه بس الباص خذ التذكره الي ب 50 مش 25 لان ام خمسين اوسع واريح
12-انتبهوا من وحده صينيه اسمها ((اٌنا)) توقف هي وزوجها قدام ستار بوكس تقولك انا اسويلك وانا اوديك وتاخذ منك مبالغ عاليه وهي ما عندها سالفه
13-اذا عندك اغراض زايده تقدر تخليها بالفندق لين ترجع حتى لو انك سويت شيك اوت ورحت مدينه ثانيه
14- الوزن انتبهوا منه وفيه شركات كثيرة تشحن للخليج واذا تورطتوا ووصتنوا للمطار وطلع وزن زايد الله يخليلكم الخطوط السيريلانكيه هي ارخص شئ
ادري ان الموضوع معفوس فوق تحت بس زي ما قلتلكم من البدايه كل هذا بسبب الاستاذ صويلح الدب
واشكر اداره المنتدى لسعه صدرها علي مع اني ودي اعبر عن مشاعري بفوز النصر واحكيلكم تاريخ النصر من ايام ماجد عبدالله وبعد هزيمه نيسان الى كاس العالم للانديه
وهم انتهى وقت البرنامج توكل على الله ورح شف مباراه النصر
اداره المنتدى اللي ودها ان النصر ما يفوز عشان ما عاد تكتب مره ثانيه