1. والفندق بشكل عام للراحه ليلاً والنوم.

هذي نصائح مع توجيهات ومعلومات عن أشياء دقيقة قبل التوجه لالمانيا ، من المفرض أن يعرفها السائح لدينا..
الحجز من الخطوط السعودية افضل ، اريح لك من الترانزيت على أي خطوط أخرى.
لا تكثّر حقائب لأنها شغله مُتعبه في الترحال ، خذ الملابس والاشياء الضروريه وتأكد من طقس المدن اللي ناوي تروح لها لأجل تجهيز الملابس المناسبه للجو.
أكثر فنادق المانيا اقتصاديه ، يعني نادراً ماتجد حامل حقائب ، اخدم نفسك بنفسك ، لذلك خفّف من الأمتعه عند السفر ، وخفّف من الهدايا والمشتريات عند العوده ، للضروريات فقط أو اعتمد على الهدايا الصغيرة الحجم.
غرف الفنادق في المانيا صغيره ، وقد تكون صغيرة جداً ، فلا يغّرك أن الفندق في الحجز مستواه خمس نجوم ، يعني ماهو شرط أن الغرفه كبيرة.. حتى التواليت صغير جداً ولاتنسى تشيل معك ( شطاف ) من السعوديه ، يباع في الاسواق هنا وهو مخصص للسفر

والفندق بشكل عام للراحه ليلاً والنوم.

عكس بلدنا في السعودية فنحن نسهر طويلاً في الليل ، لكن متعة المانيا النوم بدري كما الالمان وتصحى بدري الفجر ، حتى محلاتهم تفتح بدري جداً الصباح وتغلق أكثرها مع غروب الشمس ماعدا الكافي شوبات وبعض المولات
الافطار في الفنادق يبدأ بدري ، وينتهي بدري لذلك أحرص على تناوله خاصه لما يكون حجزك شامل الافطار
بعض القطع والهدايا في المدينه تلاقي سعرها 100 ريال ، لكن لو يوافق تواجدك يومي سبت واحد بتلاقي نفس الهدايا هذي بقيمة 15 ريال يعني فرق كبير ، لذلك انصح بزيارة الاسواق الشعبيه اللي تفتح في عطلتهم يومي السبت والاحد
أنظمة المرور والسير هناك صارمه وانتبه بالنسبه لليمين واليسار عند العبور على الأقدام لأنه عكس اتجاهنا في السعوديه ، والتزم بالأنظمه إذا معاك سياره مثل السرعه المحدده
الالمان لايحبون الشخص الذي يقاطعهم بالاستفسار عند المشي في الاسواق وغيرها لأن الوقت لديهم من ذهب ، فالأفضل التوجه بالاسئله والاستفسارات لأقرب متجر تمر بجانبه ، كما أرجو الإنتباه للسرا داخل المحلات أو المتاجر لابد أن تقف في السرى ( وماتسقط ) على الموجودين وتقاطع الموظف الذي يؤدي عمله باستفسارك لأن ممكن يوبخك أو مايعطيك وجه
قد تواجه بالصدفه في الفندق مثلاً المان يتكلمون عليك أو مع زوجتك بكلام غير مفهوم ( عصبيه ) فلا تستغرب فهذه العصبيه موجوده على مستوى العالم ، واحذر الرد ، خلك ساكت ولا تشيل همه ، فقط بيرمي كلمتين باللغه الالمانيه ويذهب.
بنزين السيارة المستأجره يسلمونها لك ( مفلله بنزين ) ، ولازم ترجعهم بعد إنتهاء الرحله مفللها بنزين.
مواقف السيارات اغلبها برسوم ، بتلاقي جهاز مكتوب عليه الرسوم ادفعها وهي بالعمله المعدنيه وليست بالورقيه
الطعام الوحيد اللي بتلاقيه ( حلال ) هو الافطار نوعاً ما ، والمأكولات البحريه ، ممكن تلاقي مطاعم تركيه أو عربيه بس إيش يضمن أنهم يومياً بيذبحون بقره أو خروف ، مدري أنا عن نفسي لا أثق فيهم حتى لو كتب على اللوحه ( حلال ) اصلاً لم أشاهدهم يصلون في أوقات الصلاة فكيف أثق بهم..
احذر من النشالين في القطار ووسائل النقل الأخرى ، ربما من الزحمه يلتصق فيك وياخذ محفظتك بدون ماتشعر ، لذلك اجلس في مكان آمن وخلي عينك مفتحه ، واحذر وضع الجوال على طاولة المطاعم والكافي شوبات
لا تتكلم مع الغرباء وخاصه العرب اللي عايشين هناك ، لو هو جاء عندك فاحذره و ولا تتكلم معاه ، مهما قالك من الكلام المعسل والعسلي..
اذكر في بلجيكا ، تركت الأهل على بعد عشر أمتار من الصراف ATM لأنه كان في اللفه ، غبت عنهم أقل من خمس دقائق ، لما رجعت قالو لي جاء ( شخص من جنسيه مغربيه ) يسألني وش تحتاجون ومن الكلام الفارغ ، الحقير تمنيت أني جيت وهو موجود لكن شكله حط رجله قبل ماشوفه
في السيارة المستأجره ، ضروري جدا تلتزم بالمسار اللي راح تتجه بعده يمين أو يسار يعني لا تسير على اليسار وأنت على بعض أمتار بتتجه يمين ، لازم من البدايه تحدد وجهتك وتمسك المسار اللي راح تلف معاه ، ولا تنسى تربط حزام الامان ( ترى فيه غرامه ) وتستخدم الإشاره عند الإتجاه يمين أو يسار
صعبه أخذ معلبات جبن وغيره معك في الرحله والطياره لأنه تحتاج إلى ثلاجه أو مكان بارد بينا نضعها داخل حقيبة السفر وفي أجواء مكتومه فتتعرض مكونّاتها للتغير مما يجعلها مُضرّه لاحقاً ، إن كان ولا بُد ، خذها مباشره من السوبرماركت في المانيا
ستواجه بعض المشردين في الأماكن السياحية ، لا تقترب منهم ، ترى روائحهم كريهه جداً وغالباً مصابين بالامراض المعديه
انتبه ، مشاهدة القنوات الفضائيه في الفنادق غالباً عليها رسوم ماليه في غرفتك ، لا أعتقد أنه شي ضروري .
في المانيا وأغلب دول اوروبا ستجد نفسك تمشي كثير على أقدامك ، المشي متعه في الاسواق والأماكن السياحية المشهوره ، ولكن ستشعر بالالم اول يومين أو ثلاثه ، فمن الأفضل تسوي رياضة المشي من الآن في بلدك قبل السفر بأسبوع على الأقل ، عشان اللياقه وماتتعب لما توصل البلد من كثر المشي
خذ معك شاحن جوالك لاتنساه
تمنياتي للجميع برحله سعيده