السلام عليكم ...اخوكم عدنان من جدة.. اتمنى تكونوا في افضل حال .حجزت عالخطوط السعودية من جدة لجنيف ( الذهاب 1 سبتمبر والعودة 14 سبتمبر 2012 ) .. الحمدلله عشان من بدري حجزت طلعت علي 5338 ريال تقريبا انا والمدام مع النيو بيبي ^_^.
مريت على بعض مواضيع الاعضاء والتقارير ...والمرغوب بالنسبة ليا كالتالي: .. اني اخد سيارة بالايجار من جنيف ..على طول اروح لزيورخ اجلس فيها 5ايام ..وبعدين على ميونخ 3أيام .. وبعد كدا على باريس 5أيام..وارجع منها لجنيف يومين . (المجموع 14 يوم تقريبا)
ليش دا الترتيب في المدن!؟ .... عشان فتحت الخريطه وشفت انو دا انسب مسار .. لو تلاحظوا انها لفه بدائرة عشان اكسب وقت و مسافه.
استفساراتي:
1- اش رايكم في مخططي المبدأي ؟؟
2- هل هناك تأشيرة او فيزا لدخول سويسرا ومنها لألمانيا ثم فرنسا ؟؟
3- افضل شركة تأجير سيارات ؟(في السعر والجودة والخدمه)(مع العلم ان رغبتي بسيارة المانية يعني اودي او بي ام ).
4- ميزانيتي للسفرية في الاسبوعين دي 20 ألف ريال..هل هيا كافية سكن وسيارة ومصاريف؟؟ (طبعا من غير التذاكر خلاص اشتريتها الحمدلله)
5- كيف الجو في سبتمبر في دي الثلاث دول ؟
6- طريقة حجز السيارة والسكن ؟؟
7- هل الجي بي اس في السياره كافي ويسهلي كل شي في الطريق من غير ما احوس ؟؟!!
8- في كلا من الثلاث مدن اللي حروحها ... اش المناطق والمعالم والامكان المهمه اللي تنصحوني فيها اعتمادا على عدد الايام اللي مخطط لها في كل مدينة ؟؟
اتمنى ما تبخلوا عليا حتى لو ما تعرفوا تدلوني على مواضيع فيها نفس مسار رحلتي او اجوبه على اسئلتي ..و سامحوني عالاطاله وكترة الاسئله بحكم اني اول مره اخطط السفر لأوروبا .