الامارات المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
سكوتش
12-05-2022 - 05:08 pm
السلام عليكم ورحمة الله وبركاتة
ياليت احد من أهل الإمارات الطيبين يفيدني المسافة بالكيلو بين كل إمارة . ولكم كل تحية


التعليقات (9)
kaledvip
kaledvip
اللي اعرف ان المسافه بين ابوظبي ودبي حوالي 150 كلم وكذالك العين الى دبي 150كلم وكذالك العين ابو ظبي حوالي 150كلم لانها صايره زي المثلث والطريق منور ومزروع وسريع
اما المسافه بين دبي والشارقه لاتذكر حوالي 13كلم فقط وكنك ماطلعت من دبي لان عماير الشارقه تشوفها
وانت ما طلعت من دبي
واقرب اماره الى السعوديه هي ابو ظبي واقرب اماره لعمان هي العين بل انك تدخل عمان وتطلع ما دريت
واسمح لي على القصور

عيون_المها
عيون_المها
المعلومات اللي عندك اخوي kaledvip صارت قديمة
طبعا بعد الامتداد الكبير اللي حصل في كل مدن الامارات وتوسعها .. اصبح الان
أبوظبي الى دبي .. تقريبا اقل من 100كم
أبوظبي الى العين .. تقريبا اقل من 120 كم
العين الى دبي .. تقريبا اقل من 120 كم
دبي الى الشارقة .. تقريبا اقل من 2 كم
الشارقة الى عجمان .. صفر كم
هذه تقريبا المسافات بين المدن في الوقت الحالي

emadku
emadku
والله صاج الامتداد المعماري يزداد كل يوم عن يوم

cuccl_q8
cuccl_q8
عيون_المها شلون راحت 50 من بوظبي الي دبي وطارت 30 من العين فسرها لنا يعنى اختصرو الطريج

الأخت سفريات
الأخت سفريات
عيون المها حبيبتي ....... معلوماتج غير دقيقه ( اسمحيلي )
ابوظبي الى دبي تاخذ بالسياره ساعه ونص ... والمسافه مستحيل تكون 100 كم
على حد ظني 150 او 160
من بوظبي الى العين تاخذ من ساعه ونص الى ساعتين الا ربع ... يعني احتمال تكون 160 الى 180 كم
دبي والشارقه كما قالت اختي عيون المها ..... كلها عشر دقايق وعماير الشارقه تنشاف من دبي ....
عموما اطول مسافه بين مدينتين هي بين العين و ابوظبي ... وبعدها من ابوظبي الى دبي ...... بس والله هذي الساعهونص تمر بسرعه لأن الطرق وايد ممتازه ... الله يرحم بوخليفه
ومن ثم الامارت الباقيه متقاربه جدا ......

hawe
hawe
من ابوظبي الى دبي حوالي 130 كيلو .... من دبي للعين حوالي 114 كيلو ... ومن دبي للشارقة حوالي 14 كيلو ... وسلامتك ... والعتب على اللوحات.

عيون_المها
عيون_المها
عيون_المها
اعتقد ردي كان واضح .. بعد الامتداد الكبير اللي حصل في كل مدن الامارات وتوسعها وانتشار الابراج والمباني .. اصبحت المسافة اقل .. مب شرط المسافة تكون ثابتة دام في توسع في المدن

cuccl_q8
cuccl_q8
لا لا مانى مقتنع اول مره اسمع ان الابراج والمبانى تصغر المسافه الا يمكن فاتحين شارع يدخل من باب المبنه ويطلع من الباب الثاني يمكن

اماراتيه
اماراتيه

أخي الكريم
cuccl_q8
( الا يمكن فاتحين شارع يدخل من باب المبنه ويطلع من الباب الثاني يمكن )
الله يجبر بخاطرك ..
اخوي المسافه بين ..
ابوظبي و دبي
ساعة وربع أو ساعة ونص .. على حسب السرعة (نقول 120 )
دبي و الشارقة
دقائق
الشارقة و عجمان
ثواني ( الفاصل بين الإمارتين دوار فقط )
عجمان و أم القيوين
ربع ساعة تقريبا
ام القيوين و رأس الخيمة
نصف ساعة تقريبا
رأس الخيمة والفجيرة
ساعة تقريبا وتم حاليا إفتتاح شارع جديد ومختصر
تحياتي


خصم يصل إلى 25%