بسم الله الرحمن الرحيم
السلام عليكم ورحمة الله وبركاته
وإشحالكم اخواني وخواتي زوار واعضاء ومشرفين منتدى العرب المسافرون
حاب اتشاركوني برحلتي بصور رحلتي لإمارة أبوظبي يوم السبت الموافق 17-07-2010 م وبالتحديد فندق قصر الإمارات وبصراحة الفندق عيبني من كل النواحي يعني ما شاء الله عليه 100 % بصراحة يستاهل ان الواحد يزوره (اسويلهم دعاية) المهم بترككم مع صور واجهة الفندق
طبعاً أول ما وصلنا عند البوابة استقبلونا بدلة القهوة والتمر
ومن وصلت الاستقبال اهدونا هالباقة
والفندق ما يحتاي ما شاء الله مساحته وايد كبيرة فارسلولنا وحده اتعرفنا على مرافق الفندق وطبعا قمت اصور صور سريعة واليكم بعض الصور قبل ما اوصل الغرفة
ووصلتنا لباب الغرفة وهذا شكل الغرفة
وصور الحمام (وانتوا بكرامة)
وخذت جولة بالفندق وهالصور تبين حوض السباحة والحديقة الخلفية للفندق (اقصد الحديقة المطلة على البحر)
وعوقت العشاء لفت نظري ان عندهم مطعم إماراتي فقلت بجربه لاني عيزت من المطاعم الاجنبية واول ماحدرت كان في استقبالنا اخت مواطنة (الله يوفجها) ومن حدرت اشوي شفت الديكورات تراثية واغاني ميحد حمد ومن اجدمت صوب المطبخ شفت الشيف علي البدواوي (إماراتي) راعي حتا وطبعا الي يتابع قناة سما دبي بيعرف الشيف علي البدواوي والي كان يطبخ الطبخات الشعبية ومن شفته استانست وسلمت عليه وابديت اعجابي بالمطعم الاماراتي وبالشيف الاماراتي وكانوا هناك طباخات مواطنات (الله يحفظ أهل البلاد) ويعطيهم الصحة العافية وهاي صورة الشيف علي البدواوي
واول ماقدمولنا سلة مخبوزات
(خبز رقاق + خبز تنور + خبز عليه حبة الحمرا)
واول شي طلبته شوربة
(كريمة بالزعفران بقطع سمك القرش والمحار)
وعقب طلبت سلطة جرجير
وهذا هو الحبول (بيض السمك) بصراحة مافيه حيلة
وحمسة ربيان
واترككم مع الثريد (فريد)
وبعد هالعشوة الحلوة من الايدي الاماراتية اللي الواحد من ياكل يضمن النظافة والجودة رجعت الغرفة وكانت المفاجأة (عقولتهم هدية الفندق) واول ماحدرت الغرفة شفتهم فارشين الغرفة كلها ورود وشفت طاولة عليها كيكة ومشروب غازي (هب كحول) وباقة ورد جميلة ومجهزين الغرفة بطريقة حلوة
اترككم مع الصور
طبعا هذا التقرير من ارشيفي
وسبق ان قمت بانزاله في احد المنتديات باسمي ولكن حبيت انقللكم تجربتي فيه
واعتقد ان سعر بذاك الوقت 1000 درهم
وعلى ما اذكر ان سعر العشاء 520 درهم
وتقييمي للفندق
الموقع 10/10
الاهتمام 10/10
النظافة 10/10
المرافق 10/10
وانصح فيه للي بيزور أبوظبي
ودمتم بود