أنا بجاوبك عن الشق الأول من سؤالك
أقول إتكل على الله و أمش ..
أنا ألحين أكتب لك و أنا في جاكرتا .. مسافر لحالي .. صار لي الحين 12 يوم .. و باقي على عودي 8 أيام ...
يا سلام أروع رحلة علماً أنها ليس الأولى إلى جاكرتا السفرة اللي قبلها كان معي شله بس هذي فضلت أكون لوحدي ..
البلد هنا آمان و نظيفه و الشعب طيب . و كل شئ على ما يرام .
و أي إستفسار أو خدمة أنا تحت أمرك .

أنا نفس طريقتك كان واحد من ربعي بيسافر معي وهون بالأخير وللحين أنا متردد
شخصياً لا أفضل السفر لوحدي حتى داخل السعودية
والرأي لك

اخواني الرجال يقول اول مره يسافر البلد
يعني ماعنده خبره عن المكان
يعني راح يحس بشوي ملل

هذا شي يعتمد على مزاج الشخص وشخصيته ولا أحد يقدر يفيدك
لكن وجهة نظري تأجل السفر لين تلاقي الخوي المناسب
والرفيق قبل الطريق
وسعر التذكرة ممتاز جدا جدا
بالسلامه

والله ياخوي العزيز احيانا تتفق مع صديق وانت صامل معاه بشهوه ورغبه وحماس ......... ولاكن اذا جلست معاه في السفر نكد عليك عيشتك وتتعقد من السفر ومن البلد اللي انت فيها ....... وتنصدم من افعاله ومزاجه
اقول توكل على الله بلا هم بلا غم من احد ولاتؤجل سفرتك علشان تشوف لك صديق او أحد ماتعرفه زين يخرب رحلتك
والصديق قبل الطريق
اما موضوع التذكره فهو مناسب جدا ولاتفوت الفرصه عليك بالتردد
تحياتي وبألف سلامه

ما دام أول مره بتسافر أندونيسيا .. أجل سفرك أفضل
الرفيق قبل الطريق

الطيب الوافي
مرحبا اخوي الطيب الوافي
بما انك مسافر اول مره انا افضل انك تدور لك على خوي....حاول تقنع خويك يروح معاك او شوفلك واحد غيره. ترى الخوي زين.
اما اذا كنت راعي سفر لدول اخرى وقد جربت السفر وحداني فتوكل على الله ودبر امورك بس والله الخوي زين باالسفر يونسك.
اما من ناحية سعر التذكره انا افضل انك تاخذ السعر الارخص وترى طيران الاتحاد زين. اما طريقة الحجز عن طريق النت فهي بسيطه :
ادخل على موقع شركة الطيران وسويلك حجز وبعد ما تتم عملية الحجز راح يطلب منك تحط رقم الماستر او الفيزا وبعد ما تحط ارقام البطاقه الائتمانيه وتنفذ العمليه راح يطلعلك رقم الحجز . كل اللي عليك تطبع الصفحه النهائيه اللي فيها رقم الحجز وتتصل على شركة الطيران وتتاكد من الحجز وهم راح يرسلون لك الكنفرميشن "تاكيد الحجز". على فكره ميزة المكتب السياحيه هي انك تقدر ترجع لهم التذكره ويخصمون مبلغ رمزي منها اما شركات الطيران الرسمي انسى يرجعون فلوسك "هذا اللي اعرفه وان شاء الله يكون غيروا طريقتهم".
تحياتي
تحياتي

الصديق ضرورى جدا جدا جدا والاسباب كثيرة يأخوى الكريم أخوك أبن السعودية 000

الصديق ضرورى جدا ما دام أول مره بتسافر أندونيسيا