إن شاء الله تكون رحلتكم العلاجية موفقة
أخوي
أحمد
بكل صراحة .... لا أعرف بالتحديد مكتب شحن
لكن الخيارات متوفرة لديك ..... وأسهل طريقة تتصل بالسفارة الإماراتية في أسبانيا وما راح يقصرون معك
والأخت سفريات كان لها تجربة تستحق كل التقدير مع موظفي السفارة الأماراتية في أسبانيا
وأعتقد أن أسم الموظف ..... راشد المنصوري
أو تسأل مسئولي الفندق أو المستشفى وراح يدلونك
وأخر الحلول : في سوق الكورت إنجلس بساحة كاتلونيا يوجد مكتب سفر وسياحة كبير وهو في الدور الخامس تقريباً
يمكن يكون عندهم خدمات شحن
والله يردك بالسلامة
مودتي وإحترامي
أخوك
المنقلب

مرحبا اخوي احمد
انا كنت في برشلونة السنة الي طافت
ممكن تروح للمطار وفيه مكاتب كثيرة ممكن تخدمك في موضوع الشحن ...
ممكن تخبرني شو نوع العلاج ... وهل هو يخص العيون ؟؟ وشو رايك بالعلاج ؟؟
لأن انا كنت ناوية ازرع قرنية في باراكير لكن هونت و زرعت في السعودية ... و العين الثانية يمكن ازرعها في باراكير ... بس المدة مب اقل من شهرين وان ما بتحمل ايلس في برشلونة كل هالمدة بصراحة

شكرآ على مساعدتكم
راشد المنصوري ماقصر معنا بس هوه في مدريد
انا اتعالج في باركير مستشفى العيون كنت بزرع بس أجلتها لين بعد6 اشهر و المستشفى ممتاز و انصح اي واحد بيعمل زراعة قرنيه يعملها عندهم ..و انا يمكن اجلس في الامارات بعد العيد بسبوع برجع لهم في برشلونا عندي عمي بيتعالج عندهم في الامارات لعبو في عينه .....
و برشلونا مدينه حلوه ماكنت متوقع انه جميله و انا كل سنه اسافر سويسرا و ألمانيا و فرنسا و شفت برشلونا احلى دوله في اوروبا و حبيتها : و انتظروني في مواضيع القادمه بضع لكم الصور الملتقطه من عدستي

ولد كالفورنيا
يعني فيه حد من الأهل زرع قرنية عندهم ؟؟ انا اريد تجربة لزراعة قرنية وكم طولتوا بالضبط من بعد العملية لين ما رخصوكم,,,,؟؟؟ وهل الهيئة الي تكفلت بموضوع العلاج او لا ؟؟؟
انا زرعت في جدة و العملية اعتقد انها ناجحه و الحمدلله اشوف منها 66 بالنظارة ... اما من دون نظارة لا ... بسبب الخيوط
سلملي على برهان المترجم

الاخت سفريات يوصل سلامج سافر سوريا يقول بيسر العمره و نحنا مش معتمدين عليها لانه اخوي يتكلم اسباني بس مب ذاك الزود لانه في امريكا يدرس في مدينة سان ديجو قريبه في حدود المكسيك و كل شعب و كالفورنيا اغلبيتها مكسيكان و بالنسبه للعمليه انا عندي اثنان من الاهل عملو العمليه واحد ياهل عمره 9 سنوات وانا بعد يمكن بعد العيد الاضحى و العمليه ناجحه و في الفندق يمكن اكثر من خمس اشخاص عمل العمليه و الهيئه ترسل للعلاج بس يبالها واسطه لانه في عيادة تعملها في ابوظبي و بعد العمليه لازم في الصلاه لاتسجد و لا تنزل من الدرج بسرعه و لا تحرك راسك و لازم تلبس نظارة شمسيه و لا تسوق دراجه لحماية العين لين بعد شل الخيوط

1. ولد كالفورنيا


2. هلا اخويه ...


3. (keratoconas )


4. http://www.roseklens.com/home/home_default.asp


5. ولأن بنتي صغيرة ذاك الوقت الظروف ما سمحت لي ازرع قرنية وقتها .


6. قلت السموحة من بحالي شكيته *** مردود مني بالفرح دوم أهنّيه

ولد كالفورنيا

هلا اخويه ...

انا الحمدلله عمليتي ناجحه ... بس مرات تقل فيها الرؤية وافكرها فاشلة بس الظاهر يعتمد على امور اخرى و الظاهر النظر ما يثبت الا يوم اشيل الخيوط ... الحمدلله الحين اموري احسن من قبل بوايد ... اما بالنسبة لسواقة الدراجة ترا ما انيوز عنها خاصة في رمضان .... لا تصدق اسولف
وتراني من كم يوم اتصلت ببرهان رمسته ... قلت له انا زرعت قرنية في السعودية و الثانيه افكر ازرعها في برشلونة ... كم مدة يريد لنا بالضبط ؟؟ قال مب اقل من شهر بعد العملية غير المدة الي قبل العملية ولين ما تتوفر القرنية ,,,, عاد بنتوهق من وين بنلقى اجازة كل هالمدة ,,, فالظاهر اني برجع ازرع في جدة .
انزين اخويه ممكن اعرف ما مدى حاجتك لزراعة القرنية ؟؟؟
لأن اذا كنت تعاني من قرنية مخروطية ترا عندنا في بوظبي عدسات ممتازة اسمها k rose في بصريات القطان وهذي العدسات ممتازة جدا للي يحتاجون زراعة قرنية بسبب مرض القرنية المخروطية

(keratoconas )

http://www.roseklens.com/home/home_default.asp

للعلم : كنت اعاني كثير قبل ما اعرف عن هذي العدسات الي تنطلب من برع و تحتاج شهر لين ما توصل .. و خاصة ان المستشفيات الحكومية وحتى الخاصة اول ما اتييهم يعرضون لك خيار زراعة القرنية مع ان خيار الهارد لنسس موجود ويعتبر بديل ممتاز لزراعة القرنية الي ممكن تأجلها الى ان تحس بحاجتك لزرع قرنية .
عموما تراني استخدمت هذي العدسات مدة طويلة ,,, ومن طول استخدام العدسات صابني تحسس و صرت ما اقدر البسهن على طول ..والنظارة ما تفيد حالتنا .. و حالة قرنيتي تعبانه ووصلت مرحلة تقارب العمى القرني يعني ما استفيد شي منها اذا ما كنت لابسه العدسة ,,,, لهذا لجأت الى ان لا بد من زراعة القرنية ,,
رحت برشلونة الشتا الي طاف على حسابنا لأن الهيئة مناحسة .. قبل ما اسافر كلمت سفارتنا بخصوص المترجم .. وبصراحة قنصلنا في مدريد والله والنعم ... واشهد انه ما قصر ...

ولأن بنتي صغيرة ذاك الوقت الظروف ما سمحت لي ازرع قرنية وقتها .

نقرير رحلتي الى برشلونة https://artravelers.com
على امل الرجوع الى برشلونة ... قدمت تقارير جديدة من مستشفى المفرق و تقارير باركير طيعا رفضوها للمرة الثانية ... عموما في موضوع علاجي انا كنت اسعى لكل شي بنفسي مع ان في ناس ممكن تتكلم عني لكن قلت موضوعي اتابعه بنفسي عشان اقتنع وين الخير لي .
كلمت المكتب العود الي في الهيئة و رد علي بكل همجيه واستهزاء واحد الله ياخذ حقي منه وانت ادرى به اكيد يبدأ اسمه بالميم و ينتهي بالكاف .... لا يطلع واحد من اهلك والا من جماعتك تراني دعيت في مكة ان الله ياخذ حقي منه وطبعا الحين هو وجماعته طلعوا عن وظايفهم .
المهم قلت لهم اريد اروح اتعالج في برشلونة ولو غالبنها الهيئة تعالجنا ما عندنا مانع نريد اجازة المرافق فقط و كل شي بيكون على حسابنا ,,,, طبعا النحاسة زادت و وقتها انا دخلت مرحلة نفسية صعبه لأن كان اكبر حلم اتمنى تحقيقة اني ازرع قرنية ,,, بعدها رحت السعودية و ما تتصور ان خلال اسبوعين بالضبط انا كنت زارعة قرنية و رجعت بوظبي ,,,, بعدها تيقنت ان كل امر هو خير من الله ,,, و هذا ما اختاره الله لي .
وكانت لي هذه الأبيات يوم بدا النظر يرجع لعيوني ...
ما خاب ظني به لأني دعيته *** الخالق الرحمن ما خاب داعيه
ربي جعل لي فرحتي قرب بيته *** عاد النظر للعين يا فرحتي فيه
ابكي و دمع افراح نفسي خفيته *** و وسادتي تشكي به الليل تاليه

قلت السموحة من بحالي شكيته *** مردود مني بالفرح دوم أهنّيه

وفي النهاية يا ولد بوظبي ,,, مب يا ولد كاليفورنيا نريد منك تقرير خاص و مميز جدا جدا جدا عن برشلونة واذا ودك اساعدك في رفع صور والا معلومات او اي شي فالك طيب ... المهم يكون ثاني تقرير برشلوني مميز بقلم ظبياني
صحيح لا تنسى تجرب احلى هوت شوكوليت ... و بتلقاه في المركز الي على old port هذا المركز الي تمشي له بجسر خشبي ... في كوفي شوب فوق بتلقى عنده هوت شوكوليت ولا عمرك ذقت مثله صدق مميز ... ولا تنسى بعد محل الفلافل الي عدال فندق رويال رامبلا .. هذا راعي احلى فلافل ,, و البيتزا الي تحت الفندق بعد روعه ... صحيح اني ما حبيت برشلونة وايد وايد لكن الحين يوم اتذكر ايامها احسها ايام حلوة ,,,
وأخيرا
الله يدوم عليكم و علينا نعمة الصحة و البصر ...
والعذر منك ...

الله يعنج والله الصراحه انا متروع من العمليه لانه واحد من الشباب سوى العمليه و بعد مطلع من غرفة العمليات جلس يسب العالم ويسبني و في اليوم الثاني قال والله مذكر اني سبيت حد لول.....
انا ماعندي حد في الهيئه و هذا حرف ميم ماكد سمعت عنه اعرف بس فرع اللي في شارع الدفاع ... و اول مره اعرف انه هذا المول اسمه old port و محل الفلافل اول مادخل علينا رمضان ماقمنا ناكل منه و انا ساكن فندق نظام شقق اسمه Augusta تقريبآ ثلاث نجوم بس انه قريب من باركير و ونحنا مانكل من مطاعم كله اكل البيت وانا في كمبيوتري فيه صور في هذا الصيف فقط صور سويسرا و النمسا والمانيا و فرنسا و برشلونه و ماعرف وين ابتداء في التقارير اكثر من 10000 صوره بس 9999 فيه صورتي بس بحاول حط احلى صور في برشلونه ..... و بعد شهر بضبط احتمال ارد برشلونه و ياليتكم تعطوني اماكن السياحيه في برشلونه و المناطق القريبه منها لاني باجر سياره و قرب سفري وراجع الامارات قريب

ولد كلفورنيا
مب كأنه الأسم تغير ... والا نسيت الباسوورد
انزين اخويه ولد كالفورنيا ترى العملية صدق صدق صدق متعبة و ما ينلام ربيعك يوم قام يسب العالم ... صراحة انا مسكت عمري وما سبيت حد الحمدلله اخاف اسب وعمليتي تفشل ... بس كنت شوي عصبيه هذيك الفترة و ما اتحمل اي صوت واي صوت اسمعه لو صوت كيس احسه في راسي ... بس اللهم لك الحمد والشكر من حال الى حال ... وانصحك بقوة انك تجري العملية اذا كنت محتاجها مثل حاجتي يعني اذا كنت قاربت الوصول الى مرحلة العمى القرني .... الله يبعد عنك وعن المسلمين الشر .
بالنسبة للتقرير ابدأ ببرشلونة لأن وايد هالصيف طلعت تقارير عن النمسا و المانيا و فرنسا و سويسرا و قليل جدا عن اسبانيا ,,, فالافضل انك تبدأ تقرير برشلونة وان شالله متابعينك ....

ان شاءالله اقرب فرصه بعمل لي بعمل العمليه
و باكر الرجعه و ان شاءالله اوصل لكم بالسلامه و من بعد برشلونه ماعتقد اني بسافر سويسر و المانيا لانه عجبتني وايد