خوي النشاما
01-12-2022 - 09:07 am
وصف ل(سنغافوره)من الشاعر عبدالخالق البعيجان
الله يصبركم ياهل سنغافوره
ياللي تركتوا دياركم للمهمات
أخذت فيها بعض الأيام دوره
وابختصر ماشفت في عدة أبيات
الجو لا بارد ولابه حروره
مره يزين الجو وامطار حزات
جمهورية بها مجالس وشوره
واللي يحركها نظام انتخابات
اللي رأسها ينتهي لعب دوره
ماهي مثل شغل العرب بانقلابات
شفت البلد هذا غريب بطوره
كل عرق ماخذ له ديانه وهرجات
الصيني مربع وطاغي حضوره
والهندي والمالاي راعي معاشات
شعبٍ خليطٍ ومتقطع جذوره
مثل العمار اللي بليا أساسات
لوجاله شويت هوى طاح سوره
الأرضا تنهش داخله بالسهالات
يبي يتغرب مير ضيع بحوره
لا هو نحسب للشرق ولا للخواجات
إذا صحى بالصبح يلحس فطوره
ينزل جحوره ولا يطلع عمارات
ترى الجحور اللي اعنيها جحوره
(أم آر تي) اللي تمشي القطارات
اللي يقص الكرت تسلك أموره
وترى يضيع إن ماتبع هالعلامات
واللي يبي التكسي يوقف بدوره
يركب إذا جاه السرى بالسلامات
واعجبني الشارع وحزة عبوره
الشعب كله يلتزم بالاشارات
واللي يبي المرفق وجاته حشوره
يفطن لجيبه يلزمه دفع سنتات
العلك والفصفص تراها محضوره
واللي جدعها يدفعونه غرامات
شفها نظيفه لاورق لاقشوره
تلمع شوارعها وكلها نباتات
واللي يبط الكبد ريح الزفوره
من أي شارع جيتها ريحها جات
وأشياء تسبح وسط ذيك القدوره
اللي اكلها يالربع كيف مامات
بالصبح ولا لا طفى الليل نوره
ماشفت في دربي فقيرٍ وشحات
ونادر بهالديره تشوف البزوره
كنت احسب اني جيت وقت اختبارات
مدري البنادق طلقها ما تثوره
ماهي مثلنا تصوب لعشر مرات
لناثي أكثر من اعداد الذكوره
الشي واضح ما يبيله حسابات
عديتهم كذا بنظره وصوره
واحد ذكر يقابله تسع ستات
نسوانهم دايم تجيك مخصوره
تمشي كثير وتشتغل عشر ساعات
تشبه حواقيل السمك بالبحوره
الجسم مسلوبٍ ولابه زيادات
لو خيروني بين (شن شن) ونوره
قلبي على اللي يلبسون العبايات
اللي محاسنهن عليها ستوره
ما قلبوها قبلي أهل الدعايات
ولو خيروني أسكن بسنغافوره
أفضّل أسكن في حدود القريات
الكون كله لو نلف وندوره
من أوله لتلاه لين الولايات
يامملكتنا في دفاك مخبوره
ما راح نلقى مثلك اليوم بالذات
الشاعر/ عبدالخالق البعيجان
صدقت يالشاعر وصح لسانك
والحمدالله على نعمة الاسلام الاسلام الاسلام وان نحن
مسلمين وعرب وخليجين والله العظيم يوم يسالك واحد من اي بلد انت وتقوله من الامارات ولا السعودية ولا الخليج عامه يتعجب ويقول او انتو عندكو فلوس وبتروول وين ما تحفر اي مكان في بلادكم تلاقي بترول صراحة الواحد شوتباه يقول .
والحمد الله على ان حريمنا متسترات بالعباية ولا الحجاب وانا انصح جميع النساء بعدم التخلي عن العباية لانها رمز من عاداتنا وتقاليدنا .
والي بيزور سنغافورة بيشوف التطور والعمران لكن فيها اماكن والله تخاف تدخلها الشرطة ما تقدر تسوي شي فيها .
والسموحة على التعليق يالشاعر.