- اسعد الله مساء الجميع
اسعد الله مساء الجميع
بالبدايه حياكم الله باول مشاركة لى واعتذر عن عدم تمكنى نشر لصورها بصراحه.........لانى مااعرف . هثرو هو اول مطار دولى ادخله فى صغرى ولى معاه ذكريات مصادره لعبة المسدس اللى معاى برحله العوده ( يعنى ترى كنت صغير) وهذا الجزء الاول منها:
ابتدت الرحله من مطار الكويت الدولى وعلى متن الخطوط الجويه الكويتيه رحله رقم 103 الساعة 12 ظهرا والتذكره بقيمة 225 دينار طبعا على السياحيه بالتاكيد ( شوف المصداقيه) والغريب فى الموضوع ان ركاب هالرحله بالتحديد كلهم اسيوى بس هالاستغراب زال لما المضيف وضح لى ان ارخص تذكرة ترانزيت للندن بالنسبة لهم هى من تقديم الخطوط الكويتيه ولا ادرى شنو الاسباب واستغرقت الرحله بالضبط ستة ساعات وربع وصلنا بعدها لديار الانجليزى اللى اخذوا مسدسى قبل 23 سنه وكانت الساعه عندهم اربع ونص العصر اجراءات الوصول كانت جدا ميسره بس المطار تغير على ( يعنى ترى رايح من قبل ) بس طحنا بموظفه اصلها اسيوى وهات يااسئله؟؟؟ ليش جايين؟ كم قاعدين؟؟؟ وين ساكنين؟؟ باقى بس تسالنى عن نوع الجل اللى بشعر صاحبى عموما خلصنا منها وانتقلنا الى مرحلة الشنط وكانت اسهل والتفتيش بعد ابشركم مافتشونا ومرت شحنه الهيل والقهوه بسلالالالالالالالالالالالالالام .
طلعنا برا المطار وتصفقنى موجة هوا نستنى تعب الرحله وركبنا تاكسى من المطار اخذ علينا حوالى 80 باوند متجهين بحفظ الله الى فندق الماريوت (عندهم اكثر من ماريوت من كثرهم نسيت تكملة اسم فندقنا) اللى باول اكسفورد وهو فندق جدا ممتاز ليلتة من الكويت خمسة وستين د.ك ومقابل محطة الباص لعشاق الباصات!!! والهايد بارك وقريب من الدنيا كلها للى يحبون صخب المدن. بطبيعة الحال لندن اكيد تغيرت خلال الفترة اللى طافت وهذا يخلى رحلة البحث عن المسدس اصعب!! واصعب!! :112: ريحنا شوى بالفندق وبعديها طلعنا نستكشف الاماكن القريبه من موقعنا ( على فكره نسيت اقول ان مدة الرحله ستة ايام بس) ولقينا الدنيا زحمة موت لدرجة ان صاحبك يمشى وراك من الزحمه ولايقدر يمشى جنبك سالنا احد الاخوه العراقيين هنالك وهو بالمناسبة كردى وبشرنا البشاره ان اليوم عيد (عيد الفصح) فرددنا كلمة عاد عيدكم وقعدنا نندب الحظ العاثر اللى ماخلانا نحسب حساب عطلتهم اخذنا اليوم كله تمشى بهالمحلات ولفت انتباهى حلاوة السوق هنالك وجودة البضايع مقارنة بدول اوربا الباقيه....ما اطول عليكم اتفقنا نقضى ليلتنا نوم بعد مانتعشى عشا دسم فى مطعم لبنانى اسمه الجورىوهو بشارع متفرع من اكسفورد مقابل مدخل السيلفردج شعاره ورده حمرا دلنا علية الاخ العراقى وردد على مسامعنا كلمة اهوايا حلو وكانت الساعة حوالى تسع ونص وكان اختيارنا للمطعم اختيار جدا موفق وطبعا الاكل اللبنانى مايخفى عليكم بنوعيته دفعنا فيه 45 باوند بعدها قررنا نتمشى للفندق اللى ماهو بعيد عن مطعمنا ندور بس الراحه بعد المشى بالسوق وعلى اتفاق انا نبدأ رحلة البحث عن مسدسى بكره...............الى اللقاء فى تفصيلات اليوم الثانى.
بس على فكره ، غالى التاكسي العاده المشوار من هيثرو لماربل آرج (منطقة سكنكم) ان كثر 45 باوند .. ليش 80 باوند ... ممكن نعرف فى أي سنه هالسفره