زوجة الدبدوب
16-11-2022 - 01:27 am
هذي اول مرة اكتب فيها بالمنتدى ... تصفحت المنتدى وعجبني كثير وفيه كثير من المواضيع المميزة ....
ادخل في صلب الموضوع..... عشان ما اطول عليكم.......
قررت ان شاالله اقضي شهر العسل أنا وزوجي في استراليا .... راح يكون تقريبا في شهرديسمبرالقادم باذن الله .... طبعا اخترت استراليا على كثر ما سمعت عنها .....قريت كثير من المواضيع وكلها مفيدة.... بس ...... كل رحلتي اسبوعين تقريبا....اتمنى منكم وخصوصا ممن زار استراليا او له خبرة ان يقدم لي النصيحة..... مثلا.......
خطوط السفر المتاحة وافضل شركات الطيران....
الاسعار هذاك الوقت هل تكون منخفضة او ما تتغير.......
السكن ..... شقة فندقية او فندق ....والسعر المتوسط.....
المدن اللي يفضل زيارتها....
انا في الرياض ....فايش افضل المكاتب للحجز من خلالها؟؟؟ وهل يفضل حجز كامل الرحلة مع تذاكر التمشيات من هنا او اروح هناك واحجز من هناك افضل؟؟؟
كيف الجو هناك هذيك الايام؟؟؟ وهل عندهم رطوبة؟؟؟
وودي اروح لجزيره وش الجزر الى عندهم؟
اسالتي كثيرة بس معليش اعذروني ..... منكم نستفيد ...واللي في باله اي شي ثاني لا يبخل فيه علينا.....
مشكورين مقدما لكل من شارك في الموضوع...... وادعولي بالتوفيق......
اولا اهنأج لاختيارج استراليا لقضاء شهر العسل فيها
ثانيا انا قضيت شعر العسل فيها وكانت من احلى ايامي فيها هالكلام من 5 سنوات يعني سنة 2003
ذهبنا على ال cathy pacific ونزلنا هونغ كونغ ترانزيت لمدة 12 ساعه عطونا فندق في المطار عشان نرتاح فيه ..ومن ثم الى ملبورن 5 أيام بصراحة الجو كان ايجنن للعلم انا رحت في شهر 8 يعني وقتها كان عندهم ثلووج في الجبال اللي تبعد عن ملبورن 4 ساعات بس ما ادري عن الجو شنو راح يكون في شهر 12
طلعنا من ملبورن الى جولد كوست جلسنا فيها 12 يوم بصراحه هذي المنطقه اتجنن اتردين 10 سنوات ورا فيها الmovie world & dream world & sea world يعني اكثرها ترفيه وملاهي وفيها شارع surfers paradise اللي فيه الكوفي شوبات والمطاعم والسوق وكله في صوب والبحر اللي عندهم فضيع بمعنى الكلمه يعني اتمشين على البحر كفايه
ومن بعدها رحنا الى برزبن عشان نروح جزيرة اسمها tangalooma انا شفتها عن طريق النت .. الجزيره حلوه ومشهوره بالدلافين وفيها انشطه ترفيهيه كثيره بس لاني وقتها مرضت ما حسيت بشئ هناك
وهذا موقعهم على النت لأي معلومات:
http://www.tangalooma.com/
اتمنى اني اكون فدتج بشئ .. بصراحه ذكرتيني بأيام حلوه
والله يوفقج ان شاء الله ..