1. تصوروا يا جماعة طلعت انا غلطان و طلع نفس الفراش ما بدلوه

موقف حصل لي في فندق هيلتون رمسيس القاهرة اعطاني فكرة واضحة عن مستواه
الكلام هذا عام 2003
سويت حجزي من الكويت على فندق هلتون رمسيس القاهرة
وصلت أول يوم ما لاحظت شي اخذت شاور سريع و بدلت و طلعت
و ما رديت الا متأخر قريب الفجر و كنت تعبان تخيلوا واصل من السفر و طلعت على طول بدون ما انام و ما ارد الا الفجر فكنت ادور الفراش بس
المهم لاحظت شي غريب بالفراش .. بقع
بقع شنو ؟؟؟ بقع بلون الدم .. الله يقطعهم
فندق خمس نجوم و فراشهم وصخ خمس نجوم ؟؟
المهم من التعب قلت باجر قبل ما اطلع اكلمهم .. عشان يبدلونه و انا برا و لما ارد الاقي الفراش نظيف. تعرفون فنادق مثل هذي بدلونه لك بسهولة لان عندهم المئات مسفطة.
و فعلا ثاني يوم و قبل ما أطلع ناديت المشرف و قلت له شنو هذا و شاف البقع و اعتذر و قال معلش و ما الى ذلك
المهم طلعت و استمتعت بأجواء القاهرة و أخذني التعب بدون ما أحس فرديت بوقت متأخر طبعا و أبي بس أنام
و نمت نومه هنية ... ثاني يوم لما قعدت .. تفاجأت أنهم ما بدلوا الفراش الله ياخذهم و كل اللي سووه انهم قلبوا اللحاف و خلوا البقع للداخل فما انتبهت لها الا لما صحيت من النوم و شفتها نفس البقع.
هني أنا ارتفع ضغطي و ناديت المسؤول و للأسف طلع واحد ثاني و قلت له القصة. و اعتذر مني بشدة و قال نبدل لك الفراش دلوقتي و أدامك قلت لا لا الحين مالي خلقكم لما اطلع بدلوه لكن ضروري مش عاوز ااخد فكرة عنكم مش كويسة و بعدين انا حاقز في خمس نقوم يا قماعة .. ففهم مدى استيائي و عطاني من الكلام المعسول و مشى.
بعدين طلعت كالعادة و ما رديت الا متاخر و مرهق .. و لما دخلت الغرفة قلت خلني اتأكد طالعت الا ما فيه بقع .. و قلت خلني اتاكد يمكن قالبين اللحاف من الداخل و لكن اكتشفت ان البقع فعلا مو موجودة .. فقلت الحمدلله ما بغينا نخلص من هالموضوع السخيف و القذارة.
نمت و شبعت نوم و لما صحيت كانت الطامة الكبرى

تصوروا يا جماعة طلعت انا غلطان و طلع نفس الفراش ما بدلوه

قالبين البقع للداخل و لكن خلوها من ناحية الأقدام .... يخرب بيتكم شهالقذارة و الكسل و الدجل .. عيب و الله هذا فندق خمس نجوم ..
تدرون شسويت ... ناديتهم و سفلت فيهم و طلعت حرتي و نادوا مسؤول عود و على طول طلعوا اغراضي و سووا لي اب غريد. لكن شعقبه عقب ما طابت نفسي من هالفندق .. بنفس اليوم طلعت لأني حجزت في الفور سيزون اللي فوق الفيرست مول اللي مقابل فرايديز
و من ذاك اليوم ما قمت اغير فندقي لما اروح القاهرة و الله اذا هلتون رمسيس أو رمسون هلتيت على قولة الشباب اذا هالفندق الزبالة خمس نجوم معناته انا اعطي الفور سيزون 6 نجوم.
أرجو من الجميع المشاركة و كشف الاعيب و قذارة الفنادق التي تدعي انها خمس نجوم و لا تراعي المبالغ التي نشفطها منا كل صيف.