نعم المعلومه صحيحه وانا شخصيا شفتها وهي موجوده بكثرره وعلى شكل اسراب وولد عمي طاح من الجت سكي في البحر وطول شوي لان الجت سكي عيا يشتغل ولسعته برجوله وانتفخت رجله وقالوا له احمد ربك لانه فيه نوع منها ساام اذا جا على العين يسبب العمى الله يحمينا
ومشكورره اختي انك ذكرتي الموضوع علشان ينتبهون الناس

بالنسبة لي معلومة جديدة ....
لكن شاطئ بينانج لا يصلح للسباحة مو بسبب وجود السمكة الهلامية فحسب ...
بل لأنه هائج أيضا أحس إنو من الصعب السباحة فيه ....
ليس كشواطئ لنكاوي فهي أهدأ بكثير ...

وعليكم السلام ورحمة الله وبركاته ...
حياكِ الله اختي ام ريم .
هذه المعلومة صحيحة لكن بصراحة ما شفتها بعيني لكن صار لي فيها قصة .
المهم في يوم من الايام في حدود الساعة 11 كنت والاخوان نلعب الالعاب البحرية
على الشاطيء اللي قدام بي فيو ...بعد ما تعبت جلست فوق التراب اتفرج على الناس
وشفت رجل من جماعتنا وعياله الله يحفظهم يتسبحون ...وكنت اتفرج عليهم
لين ما جات اسيوية ممكن تايوانية وعيالها الصغار ويتسبحون جنبهم ...
وجدت الاخ الماليزي اللي يقوم بتاجير الدبابات اتجه للعائلة التايونية واتكلم
معاهم ...وكان كلامه غير مسموع لي لانهم على مسافة شوي ...وبعد ما كلمها
لقيتها اخذت اطفالها ومشوا راجعين للفندق ...في نفسي قلت وش الموضوع
قمت سألت الماليزي وش الموضوع ...اخبرني انه السباحة هنا خطيرة
قلت له ليه ما كلمت اخونا اللي هناك ...قال: كلمه لكن الظاهر انه ما فهم .
غلبان ولد ديرتنا لكن سبحان الله يتسبحون قدامي ربع ساعة ما صابهم شيء
وعلى طول رحت لعنده وقلت له اخونا الماليزي يقول السباحة هنا خطيرة
لوجود حيوانات (الماليزي اخبرني حيوانات) الرجل طلع نشمي ومتعاون
وشال عياله واتجه لمسبح الفندق ...لكن سبحان الله والحمدلله انه ما صابهم
شيء ...ما ادري هل لو تعمقت في البحراكثر ستجد هذه السمكة الهلامية..
ام انها تجي على الشط لكن الله حفظ اخونا وعياله وما صادف جيتهم .
الله اعلم .....قصة طويلة لكن ان شاء الله تفيد .
وبعدين ما دام اننا على الشط ...اختاروا الجت سكي اللي يكون كبير واطول
..لانه بعض دبابات البحر وخاصة اللي تشوفها اصغر من غيرها ومنفخة
وتحسها رياضية تنقلب بسرعة .
اما بخصوص ليه ما احد ذكر هالملاحظة من اول ...كلامك ولومك في مكانه
لكن عن نفسي ما عرفت اسم (الحيوان) على قولة الماليزي الله يكرم الجميع
الا الآن يوم ما فتحتِ الموضوع وتذكرت القصة ...قلت اجل هي ما في غيرها .
الله يستر علينا وعلى المسلمين وجزاكِ الله خير على موضوعكِ...والسلام عليكم

معلومة جديدة... الحمدلله اني مطحت من الجت سكي

السلام عليكم ورحمة الله وبركاته
جزاك الله خيرا على المعلومة وهذا التنبيه المهم..
أما بالنسبة لإسم (jellyfish) بالعربي نحن لا نقول له سمك هلامي لأنه لايشبة السمك في كثير من الأشياء بل نسمه (قنديل البحر) وهو رخوي الملمس وله أحجام منها الصغير والوسط ومنها الضخم الكبير , ولقد حصل لي معه موقف في الصغر فعندما كنت أسبح في إحدى شواطئ المملكة شاهدته في البحر بكميات كثيرة وأحجام مختلفة فأخذت واحدا منها وقمت بالعب به ودعكه (فركه) على جسمي وعندها أحسست بالحرقان على جلدي فرميت به ووضعت مراهم على جلدي حتى شفيت والحمد لله , وطبعا حرٌّمت بعد كده المسه (الله رجعني الموضوع لذكريات الطفولة البريئة) والسلام ختام أخوكم القم14ر

ياركم الله تخافوون من الدوول
حنا نسميه حيوان الدوول صحيح لسعة تحرق وتحمر وتعور بس أبوي البحر يباله ناس لفيحة
مب الي ها بيلسعني أو بيقرصني أو بينهشني شواطيئينا ممزورة وايد من هالسوالف ما عليكم أبوي
بس بصراحة لسعته تحرق شرات السمسوم
بس بعطيكم حل يوم كنا نسبح ونعرف أنه المكان فيه دوول نلبس درنكسوت مب هافات يعني بناطلين مال الرياضة الخفيفة الراصة على الجسم ويخسي الدوول يهبشك وخاصة اللون الأصفر منها وفي اللون الأزرق والبنفسجي يالله يا قرصته تحرق
أبوي يوم أنتم سايرين حق مدينة بحرية وحق شو تسبحون وتخيسون عماركم بعدين في شي ثاني أهم من هذا أسماك القرش الأبيض تحوط بالهبل صوب سواحل ماليزيا وتايلاند وأندونيسيا
وشوفوا أماكن إنتشار القرش الأبيض يشمل ماليزيا بعد

بالنسبة لقنديل البحر فهو حسب علمي انه من الجهة العليا التي تشبه الشحم لا يضر ملمسها
الذي يضر ملمسها هي الأطراف التي تشبه الحبال
لأننا دايم في شواطئ الشرقية نترامى فيها بس نمكها مع جهة العليا اللي زي الشحمة
وهي تفرز مادة سائلة هي التي تسبب الحساسية لتدافع عن نفسها
والله اعلم

اصلا البحر في بينانج مهوب نضيف لان فيها ميناء و تشوف لونه اسود من السفن
لنكاوي بحرها انضف بس برضوا ما سبحت فيه

من المشاركات اعلاهللاخوان الاعضاء الله يجزاهم خير نستخلص مايلي:-
1-السباحه بشكل عام لاتصلح في بنانج
2-ابعد الاطفال تماما عن السباحه في البحر
3-اذا كان لابد من السباحه فتكون للكبار فقط
4-الذى لديه حساسيه من البعوض او الحشرات الافضل له الابتعاد عن السباحه في بنانج
5-اثناء اللعب بالجت سكي البس تي شيرت و بنطلون رياضي طويل
6- حمام السباحه بديل ناجح
أسأل الله أن يحفظ الجميع