يسعدني صباحكم ومساكم
في البدايه احب أشكر كل اللي استفدت منهم في بوابة تايلند
مشرفنا وأخويه الحوسني وخواتي ام منوره وشموخ واخويه سالم
السعيدي وغيرهم ...
وشكرا خاص جدا جدا لأخويه وولد بلادي الحربي اللي ماقصر ويايه
ولابخل عليه بأي معلومه ...
الف الف الف شكر لك وجزاك الله الف خير وجعله في ميزان حسناتك يارب ..
وبعرض عليكم في بداية التقرير كل الاسئله والاجوبه اللي طرحتها على
أخويه الحربي عشان تستفيدون منها
بداية رحلتنا لبانكوك
تاريخ السفر ...
من 5 / 4 / 2010 الى 12 / 4 / 2010
مدة اسبوع
عددنا والمرافقين
نحن 5
انا وصديقتي جوجو وصديقتي ام مبارك وامها واخوها
الطيران المعتمد ...
طيران الامارات
العمله ...
عملتهم اسمها بات

و1000 درهم تساوي 8650 بات تقريبا عندنا
وفي شارع العرب في بانكوك حصلنا 1000 درهم ب 8750 بات أحسن شوي
نوع الطياره ...
هي الايرباص الجديده أم طابقين ، ونحن تعمدنا نحجز عليها في السيره
وفي الرده والحمدالله توفقنا وحصلنا فيها ، وهاي الطياره وايد حلوه
والبزنس فيها رغاده فمابالكم بالدرجه الاولى ..
بس في الرده اتصلوا فينا طيران الامارات وخبرونا انه الطيارهالعوده
مابتينا وبيطرشون وحده صغيره ، وسألونا اذا حابين نكسل او نأكد رحلتنا
فردينا انه بنرجع بنفس تاريخنا ، ولما سرنا المطار صارت بيننا وبينهم
مشكله انتصرت انا فيها
الله يسلمكم خبرونا انه البزنس فل واعطونا خيارات ، يا أما نرجع ع
السياحيه ويعطون تذاكر مجانيه ، وطبعا انا رفضت وبشده ، او نساف
ر على الدرجه الاولى على الطياره الثانيه يعني ننتظر بالساعات وقالولنا
بينزلونا في فندق 5 نجوم نرتاح كم ساعه لين موعد الطياره الثانيه
وتنيلت حضرتي ورفضت
الصراحه كنت معصبه عليهم وع هذا المقلب واصريت أرد ع هاذي الطياره
وع البزنس ، ولما شافوني ما اتحاجى دبرولنا مقاعد على البزنس وردينا
في وقتنا وانا في الطياره اقول لجوجو :
انا غبيه ليش مافقت على العرض الثاني والله كنا بنسترغد ، قالت :
أنا قلتلج وافقي بس انتي أصريتي
نحاسه
شوفوا صور طائره الايرباص 380 الجديده ، وانا حطيتها اهداء في تقرير
أخونا الحربي
https://artravelers.com/p/re/327982
السكن ...
حجزنا في الانتركونتينتال
غرفه ديلوكس انا وجوجو
الهدف من السفره ...
فحوصات في المستشفى الملكي
وتسوق
الاستعداد للرحله ....
أنا وجوجو ما اخذنا وايد ثياب وأغراض لأنه هدفنا نترس الشنط من هناك
جمعت كل المعلومات المهمه لي من تقارير الاخوان في منتدانا ومن منتدى ثاني
وأكثر واحد ساعدني في الاسئله اللي حيرتني هو أخويه الحربي
وهاي بعض المقتطفات من اسئلتي وأجوبته ...
اقتباس:
شو الفرق بين المستشفى الملكي والامريكي
أنا بصراحة أحب المستشفى الأمريكي لانه انظف واجهزته احدث
اقتباس:
(( أنا سبق اني جربت الامريكي ))؟ وشو الافضل بينهم؟
ما فيه فرق بينهم واناسألت عنه وايد وعرفت انا الدكاتره الكبار
يداومون هني يومين وفالثاني يومين يعني بخصوص الاطباء الكبار هم
نفس الدكاترة لانهم يشتغلون بالساعة وفي كلا المستشفيين ،أما من
ناحية الاجهزة والخدمات المتوفرة فالامريكي ( برمنجراد ) يفوق على
الملكي في عدة اشياء من حيث العيادات كذلك التمست الفرق في
العيادات وخاصة العيادات المتخصصة في الامراض المستعصية ،، أما
بقية الاشياء فهي متشابهه ... والاسعار متقاربة بين المستشفيين
اقتباس:
انا سألت عن صرف العمله ، قالولي : ال 1000 درهم تساوي 8200 عند الانصاري
شو رآيك ..أوكي ولا تنصحني بشي ثاني؟
بصراحة انا افضل انج تاخذين تصرفين 500 درهم فقط وهناك اصرفي
في الحي العربي او في الصرافات التي في في الاسواق يكون
الصرف عندهم احسن من الصرافه هني.
اقتباس:
وشو رآيك آخذ ويايه غير التايلندي ، دولار ولايورو؟
خذي الدولار افضل لان صرفه ما يطيح مثل باقيالعملات
اقتباس:
وانا ما افكر أسكن في فريج العرب ، قبل 3 سنوات سكنت هناك وماعجبني
الوضع أفكر أسكن في الأنتر
بخصوص العائلات ما أنصح بسكنهم في الحي العربي ،،، يفضل أن
تسكني في اماكن بعيدة مثل مجمع الأسواق التجارية او في سكاي ورلد
تاور عندهم عرض هذه الايام ولاحظت انا هذه المنطقة ممتازة
وتنعدم فيها الحركة بعد الساعة 10 مساء .... أما في الحي العربي ففي
اماكن الواحد يستطيع السكن فيها وهي بعيدة عن شارع سكومفيت 2
3 ، 4 وتكون هذه المناطق هادئة بعدالساعة 10 ليلا والحاجة للسكن
في هذه المناطق من أجل المطاعم والخدمات فقط.
اقتباس:
في رأيك وين أصرف لو احتجت ؟
في الحي العربي احسن سعر للصرافة في محلات الصرافة مقابل فندق جراند .
اقتباس:
اذا بغيت اشتري كيمرا عاديه وتصور حلو بس مب احترافيه..
فأي نوع تنصحني فيه ، وصنع أي بلد ؟
انصحج بهذي الكاميرا وهي من نوع canon سعرها ممتاز
وصورها ممتازة جدا .... والكاميرا في تايلند ما بتفرق في السعر وايد
وخاصة لهذي الكاميرات الفرق يكون في كاميرات البروفيشنال أكثر من
نصف السعر .
Canon Digital IXUS 110 IS Digital camera compact
اقتباس:
حتى اللاب توب لو فكرت أشتري يديد ، أي ماركه
تنصحني فيها وأي مواصفات ؟
اللابتوبات في تايلند سعرها قريب من سعرنا هني في دبي عدا التي تنزل
يديد يكون السعر عندهم ارخص ب 20 % تقريبا عن السعر هني ،،،
اذا انتي بتاخذين لاب توب فانصحج بالسوني فايو لان الضمان عالمي
وما ينخاف عليه ،،، وما ناحية الكيبورد بيكون انجليزي لازم تطبعين
عليه الحروف واذا عزمتي تشترين عقب بنقولج كيف تطبعين عليه الحروف .
اقتباس:
متى يسكر سوق الاكترونيات ؟
الساعة 7-8 حسب المحلات بس الرسمي هو الساعة 7 ساءاً
اقتباس:
ومتى يسكر انديرا ماركت ؟
نفس الشي الساعة 7 ساءاً
اقتباس:
بغيت أعرف بالنسبه للصرف تقريبا 1000 درهم كم تساوي من عندهم؟
أنا بصراحة يوم كنت هناك في شهر 3 كان الصرف 1000 درهم =
0وكان وايد اوكي حتى اني تطمعت وقلت بصرف مبلغ
عسب يوم ارجع مرة ثانية وعقب سرت في شهر 9 / 2009 وكان
الصرف نازل 1000 درهم = 9380 بات ونزل وايد والحين قالوا
لي في حدود 8900 - 8700 تقريبا .
اقتباس:
بالنسبه لهاي الكاميرا بنتي عندها وحده ، وأنا عندي كيمرتين كانون
بس نوع ثاني غير اللي عند بنتي والثنتين يشبهون بعض لأنه
وحده اشتريتها وحده فزت فيها
وبنتي الثانيه عندها نيكون ، بس كلهم مفلعين من كثر مايطيحون عنا
يعني خربانين شوي ، وكنت أفكر أشتري وحده أكثر منهم جوده وتقنيه
عيل خذي الكانون 450 وايد اوكي وسعرها ممتاز في تايلنج
d450 بيكون في حدود 1700 درهم او أقل لاني كنت هناك كانت
0درهم في البانتيب بلازا .... وشي ثاني هذي الكاميرا نصف
احترافيه يعني اذا تبغين تصورين في الوضع الاوت تقدرين او تقدرين
تصوري في الوضع الاحترافي يعني لج الخيار في اختيار الوضع ...
وهذي مناسبة جداَ... ويقابلها في النيكون d80 وما اعتقد تحصلينه
ا في تايلند لان الموديلات اليديدة من تنزل يسحبون الموديلات الجديمة
ويطرشونها على الاسواق الاخرى عسب ما تنزل جيمتها .... بس
الكانون ارخص ونفس الاداء مع النيكون.
اقتباس:
يبتلك سؤالين ع الطاير
شو الجو عندهم في شهر 4 و5 يعني كم تقريبا ؟
والله الجو طول السنة في تاي نفس الجو بس الامطار تزيد بين شهر
7-9 وبيكون الجو رطب ومشمس والشمس في النهار حارة ... خذي
كريمات الوقاية من اشعة الشمس.
اقتباس:
أنا قريت تقرير لأخ سعودي ، وتكلم عن الفيزا ..
هل مطلوب منا نحن بعد فيزا ولابس للسعوديين ؟
تصدق أنا من 3 سنين سايره ونسيت هاي السالفه..
لا ما يحتاي فيزا من المطار يعطونج الفيزا خلال ربع ساعة حسب
الزحمة لمدة شهر لمواطني دولة الامارات ودول مجلس التعاون عدا
السعودية ... الله يساعدهم .
اقتباس:
أبا اشتري بطاقة تيلفون من عندهم ...
فهل بحصل في المطار ؟ وشو أسم البطاقه اللي ترشحها ؟
هلا ومرحبتين والله ...
طال عمرج البطاقات موجودة في المطار وتقدرين تشترينها وشي
محلات في المطار ... أو اصبري لين تطلعين من المطار وفي اي محل
بتحصلين البطاقات ... انا كنت استخدم 12 كول ( ون تو كول ) وبعد
الاستفسار من البائعين قالوا لي كل البطاقات الي تستخدمها نفس الشي
تكلفة الاستخدام لكن ما يميزها هو بين الاتصال في نفس الشركة يكون
التخفيض كبير يعني من بطاقة ون تو كول الى نفس البطاقة يكون
الاتصال مخفض .... الشي الثاني والمهم ... بخصوص الاتصالات
الدولية شي بطاقتين الاولى أسمها ( مرحبا ) والثانية أسمها
( ترو دي ) احفظي الاسامي عدل ... هذيلا بس للاتصالات الدولية لان
الاتصال من البطاقة مباشرة غالي جدا وتقريبا الدقيقة بما يعادل 4
دراهم لكن مع البطاقتين السابقات تطلع تكلفة الدقيقة الواحدة فقط 80
فلس اماراتي ... انا عن نفسي كنت استخدم بطاقة ترودي ( 500) بات
كنت اتكلم فيها تقريبا 6 أيام وكل يوم تقريبا نص ساعة .... ونظامها
كالتالي ... تخلي حد يحط الرصيد الخاص بالبطاقة في بطاقة التلفون
واذا تبغين تتصلين شي طريقتين :-
الأولى :- تتصلين في رقم معين ( مرفق مع البطاقة ) وعلى طول
بيصكر ويرجع يتصل فيج وتحطين الرقم الي بتتصلين فيه عقب
تتكلمين كالعادة بدون الاصفار على طول 97150.......هذا فتح خط
الامارات طبعا كمثال .
الثانية :- يعطونج كود موجود في البطاقة تحطين الكود مع رقم الهاتف
الدولي وعلى طول ارسال بدون الاصفار كذلك .
ملاحظة هامة جدا : في تايلند كل التلفونات اذا اردتي الاتصال خارج
تايلند لا تحطين 00 ما بيتصل ابدا .... حططي علامة + بدال الاصفار .
اقتباس:
بس في شي مافهمته ، يعني اشتري بطاقتين وحده
للأتصال الدولي وحده للاتصال الداخلي ؟
انتي بتشترين بطاقة واحدة الي هي ( الشريحة) وهي من نوع ون تو
كول عقب البطاقة الثانية مال الاتصال الدولي هي شرات البطاقة الي
نشتريها من السوبر ماركه عسب نعبي فيها رصيد ،،، بمعنى آخر
البطاقة بيكون فيها رصيدين رصيد البطاقة الخاص بالبطاقة الاصلية
ون تو كول ورصيد خاص بالبطاقة الدولية .... ترودي او مرحبا ....
نسيت شي بعد اذا اتصلتي ( من بطاقة مرحبا او ترودي ) ما بيظهر
عند المتصل رقمج الخاص بالبطاقة الي هو رقم البطاقة الاصلية ون تو
كول بيطلع رقم خاص او مكالمة من غير رقم لان هذي بدالة تتصلي
عليها عقب هي تحول المكالمة دوليا.
واذا تبغين رقمج يظهر عند المتصل تتصلين دايركت من البطاقة ون تو
كول بدون التحويل من البدالة بس تتكلفة المكالمة غالية
( قريب من 4 دراهم للدقيقة ).
شو رآيكم نكمل باجر ...
فيي رقاد
تصبحون ع خير وانتظر تواصلكم