هالو .... هالو .... هالو لندن
يأم الوناسة و التسوق والسهر
الدنيا طماشة فيج ماتعرف قهر
هالو .... هالو .... هالو لندن
مشتاقين
متعنين
هالو ... هالو .... هالو لندن
بتاريخ 6 Nov إلى 15 Nov
0قضيت ايام جميلة في لندن ...
الجو كان بارد بس حلو ... وكل اضواء الكرسمس مزينه الشوارع ...
كل الدكريات الحلوه لي في لندن ارجعت لي ...
سكنت بفندق كورس Corus ومكانه مقابل الهايد بارك وجمب لانكستر قيت اندر قراوند ...
موقع الفندق وايد زين ... بجانب الاندر قراوند وفيه جمبه محطتين قراب للباص لانستر تيراس و لانكستر قيت وقريب من كوينز وي ومن الاسفورد ستريت مكانه بالضبط في النص ...
هاي صور للغرفة ...
للعلم هالسرير مزدوج والغرفة مزدوجه مالقيت غرفة مفرده لي فحجزت غرفة مزدوجه بالافطار ... و غرفة توأم لشخصين بدون افطار .. وانا نمت في الغرفة المزدوجه الي تشوفونها حاليا ...
كل الغرف مزوده بمكواة وطاولة كوي
هاي المكتب والتسريحه بنفس الوقت والخزانه عباره عن علاقة ملابس كما في الصورة والتلفزيون مسطح .. بس كل القنوات اجنبية ..
الحمام صغيرون ...
صورة ثانية للسرير وجمبه التيلفون ..
الفندق يوفر خدمة انترنت مجانية واير لس - مدفأه في الغرف - مكيف هواء - وغلاية ماء و شاي و قهوه وحليب مجانا
صندوق امانات - مجفف شعر
غرفتي في الدور السابع ونص الغرف تحتاج تنزل 3 سلالم عشان توصلها مثل الي في الصورة
هدا المطعم موجود في الفندق له بابين من داخل الفندق ومن الخارج والمميز فيه انه في كل ليلة يتم تقديم العشاء بطريقة مميزه ويتحول النادلين الى مغنيين اوبرا ... ولازم تحجز مسبقاً ... ماجربت المطعم بس فكرته حلوه وشكله حلو
يمر بجانب الفندق في محطة لانستر تراس 3 باصات اساسيه
1 - باص رقم 94 باصي الحبيب وكل مامر من جنبي طرت على بالي احلى الدكريات ويمشي من بداية نوتنق هيل الى بيكادلي سيركس
2- باص رقم 390
3- باص رقم 270
وهاي باص الدكريات باص رقم 94
بجانب الفندق على طول يوجد سوبر ماركت صغير صاحبه واحد باكستاني مسلم يبيع سندويجات حلال و كل الاشياء الموجوده في السوبرماركتات العادية اضافتاً الى هدايا لندن التدكارية
يوجد ايضاً مطعم وايد حلو اسمه The Swan ماجربت اكله بس قعدته حلوه وايد مجابل الهايد بارك وخارجيه وفيه بلكونه ممكن تقعد فيها ويبيع فيش اند شبس وماعرف ادا في اشياء ثانيه .. وبالليل يتحول الى بار ومطعم و في الداخل فرقة مسيقيه تعزف كان خاطري اجربه بس للاسف ماجربته ان شاء الله خيرها بغيرها
شكل الفندق من الخارج حلو ومرتب ... بس الصور ملتقطتها في المساء
اللوبي ..
فطورنا كان كونتننتال .. يعني جبنة و مربى وشاي وكرواسون وهاي قاعة الفطور الكونتننتال لان بوفيه الفطور الكبير في الاسفل
هاي المره الثانية الي اسكن في الفندق ... بالنسب لي عيبه الوحيد حجم الغرف اما الباقي وايد تمام وما امانع اني اسكن فيه مره ثانيه وانصح بالسكن فيه ...
وعشان اعطيكم فكرة عن الاجواء ولون الشوارع .... هاي اهداء لكم
بقايا الخريف