senior
الحمد الله على السلامه سنيور والله انا كنت بزل ام سي باول شهر اغسطس وسكنت بشقه ديلوكس غرفتين وصاله مع مطبخها مقابل الماكدونالدز مباشره اللي تحتها المطعم الصيني وتكفي 6 اشخاص مع الحديقه ب80 يورو بالاضافه الى خدمه الانترنت دي اس ال 20 يورو بالاسبوع

أخي الكريم (يا حلو يا أنا)
أشكرك على المرور
انا من ان وصلت الى زل ام سي
وجدت المطعم الصيني وسألت عن الغرفة او الشقة لكن لم اجد احد
كان الباب مغلق
وحاطين رقم تلفون
اتصلت على الرقم وسألتها وقالت لا يوجد اماكن شاغرة حتى نهاية اغسطس !!!
وقالت السعر حوالي 70 يورو للشخص على ما اعتقد
وتوجهت الى الى حي شوتودروف الموجود فيه لاتيني وسكنت في الفندق شوتوف وهو بجوار لاتيني ومن عائلة فنادق لا تيني الفندق كويس ولا بأس به وسعره مش بطال وكان عاجبني بس لما شفت الى انا فيه هذا
طاح من عيني السابق
عموما للمعلومية لرواد المنتدى
لاتيني سعره 55 للشخص مع الافطار في غرفة مزدوجة ضيقة
و شوتوف الي بجواره ومن نفس العائلة ب 35 يورو ونصف مع الافطار في غرفة مزدوجة ضيقة
اما الي انا في 45 مع الافطار وواسعة ومقابل للبحيرة وغرفتي مطلة على البحيرة

:x1: :x1: سنيور :x1: :x1:
هلا وغلى senior كيف حالك ان شاء تكون مرتاح والرحلة سعيدة
انا اتذكر اني خذت لفة على البحيرة من الضفة الاخرى بصراحة المنطقة هادية جدا واغلبها مزارع لكن ما اظن فيه مشكلة لمن لديه سيارة خاصة مثلك يابطل .
تحياتي ،، وتوصل بالسلامة ان شاء الله ونشوف تقريرك

أنا من اول ما وصلت لا كان عندي لا حجز ولاشي رحت على طول الانفرميشن سنتر قلتلها ابي شقق ديلوكس وغير مهم السعر عطتني احسن 3 شقق وفيلا للا يجار ضبطتها على النفيجيشن ولا هذا اللي قدام الماكدونالدز واهم الانفرميشن سنتر داقين عليها وقليلها انطري الزبون قدام الباب والله جيت ومالقيتها ودقيت عليها تلفون لانه الموقع عجبني بوسط السنتر وفيه مواقف لسيارتنا ليش احنا 3 سيارات وبلاش وجات وشفت الشقه ولا معطيتنا احسن شقه ارضيات خشب واهي الشقه الوحيده مع حديقتها واثاث جديد على كلامها توها مأثثته بالشتا اللي طاف بس للامانه شغل مرتب وعطتني اشتراك الاتنرنت ب20 يورو بالاسبوع دي اس ال وعطيتها 100 يورو زياده علشان تنظف الشقه يوميا ومعاملتها جدا راقيه صاحبه الشقه وتتكلم انجليزي بطلاقه والله بيني وبينك كل العرب اللي مستاجرين عندها ميح لغه واحنا اللي كنا نترجم للعماره وكل شوي جايتنا وتقولنا كلموا الشقه الفلانيه قولولهم لايسوون جذي او كذا اهي بني وبينك كانت متعاونه ويانا واحنا متعاونين وياها ونفسنا حلوه وياها
اذكر مره قالتلي نفسي اركب سياره صديقك وكانت سي ال اس 350 اللي اهو الحوت الجديد بو درايش صغار قمت وعطيتها سويتش السياره قلتلها سوقي السياره قالت لا ما اعرف والله خذيتها وطقيت فيها فره ومرت رفيجاتها وخذيت معانا بعد زوجها واستانسوا وعطوني خصم خاص ولا بعد ضافتني عندها على الماسنجر وتقولي انت احسن زبون عندي وكل ما تجي اسكن عندس لك عرض خاص وبعد ما دهنت سيرها عزمتني على حفله في قريه ثانيه تبي ترد الجميل بس انا قلت لا ما اقدر تخبر كلهم سكر ومصخر اعتذرت منها باسلوب حلو

اخي العزيز senior حمداً لله على سلامة الوصول الى زيلامسي ، واهنيك على رحلتك الجميلة ، حقيقة كم هو جميل ان يستأجر المرء سيارة ويصبح حر نفسه والحمدلله على تيسر امر السيارة ، اتمنى ان تنقر دليل المسافر للنمسا لاختيار مايناسبك من اماكن الزيارة في زيلامسي والله يحفظكم ويردكم سالمين غانمين وبانتظار ان تروي لنا تجربتك الجميلة في زيلامسي وان تطمنا عليك اول بأول
دمت في حفظ المولى ورعايته

ماشاء الله عليكم الله يهنيكم
وبصراحه صورة فندقكم روعه كنه اللي بافلام الكارتون.وسعره لؤطه ما شاء الله

ماشاء الله تبارك الله سرد رائع ياغالي.
حبيت استفسر عن فندق Bellevue am see كيف اوصله إذا نزلت في محطه القطار في زيلامسي . هل في باصات توصلك الضفه المقابله لفندق القراند .طبعآ موقع الفندق هادي مو مثل وسط البلد اللي بقرب القراند. إذا سكنت فيه هل في باصات توصلني للضفه مالت الجراند لان هناك السنتر.
اتمني لك طيب الإقامه بجنه الله في ارضه
تحياتي لك

ماشاءالله هلت علينا معلومات الخير
حمدالله على سلامة وصولك النمسا وإن شاءالله نقولك حمدالله على سلامة وصولك بلدك
مشكورين اخوي على التواصل وبارك الله فيه على ماجئت به من معلومات ....
اخوي ياحلو تكفى لا تخلينا مع العجوز قلها لي صديق سعودي شروانا نفسيته أحلى من الحلى علها تعطينا خصومات وتسهيلات وبنركبها فيراري لو تبي
الف شكر على تواصلك
تمنياتي لكم بالصحه والعافيه

أخي العزيزSenior
الحمد لله على سلامة الوصول الى حبي :36_3_13: :36_3_13: :36_3_13: زيلامسي............
وأتمنى أن تستمتع بكل لحظة من رحلتك وأن تعود الى ديارك بالسلامة