إذا كانت رحلتك عزيزي المسافر بالسياره نأمل منك التقيد بالبنود الآتيه , حيث ستساعدك بإذن الله الى الوصول سالماً الى مبتغاك:
- إشتر عصير الربيع أو عصير سن توب بعدد المسافرين أو أكثر .. ولا تشتري بيبسي للمقاطعه .
- إشتر فطاير جبن بعدد المسافرين أو إشتر : كت كات أو مارس بحسب الرغبه وحسب وقت الرحله .
- عاير الكفرات ( الإطارات ) وحط ضغط هواء مناسب , وتاكد من سلامة الكفرات الأربع والاستبنه كذلك ,, والا ألغي الرحله من أساسه . لأن عندك جو مايمزح معه .
- شيك على الرديتر لأنك ميه ميه مشغل المكيف ,, وبرضه الجو ما يمزح .
- عب البنزين فل ,, لأنك إذا طلعت برى الديره يغلى البنزين ياذكي .
- وكمان عب البنزين عند محطه تعطي مناديل هديه .. لأنك محتاج منديل في الرحله ولازم نوفر عليك المصاريف .
- إشتر نظاره شمسيه إذا كان سفرك بالنهار ,, وإذا كان سفرك بالليل لاتشتري نظاره شمسيه ,, إشتر نظاره قمريه .
- إشتر ملطف جو ,, علشان بعض الشباب " الله يهديهم " يخربونها في الخط ويطلعون روائح مال أمها داعي .
- إشتر كم شريط للخط .. لأن الmbcFM تنقطع إذا طلعت برى الديره .
- تابع قبل أسبوع من الرحله برنامج " عساكم سالمين " في الأف أم الساعه 7.30 صباح الإثنين والاربعاء .. علشانهم يجيبون نصائح مهمه في بداية البرنامج .
- تأكد من أن كل اللي معك أخلاق .. لأن الدعوه سفر وقطعه ,, والواحد مايضمن نفسه .
- إشتر مويه للزنقه بأنواعها الثلاث / للشرب وللوضوء وللرديتر .
- شيك على الزيت وشف اذا هو محتاج تغيير ولا حاجه .. واستعمل زيت ممتاز , لأن الغالي سعره فيه .
- تأكد من إحتواء سيارتك على أحزمة أمان .
- تأكد من أنك تحمل كشاف نور ( بجلي في بعض الثقافات ) لأنه أفادني كثيراً عند الزنقات .. ولي فيه مآرب أخرى .
- إذا كان ضمن المسافرين مبزره ( أطفال ) تأكد من وجود حذاء إضافي معك ( يفضل كعب ) وذلك لإستعماله في حالات الطواريء عندما يقلقكم واحد من " المبزره " .
- إذا كنت تملك جوال نوكيا رهيب 2000 , فيمكنك من تجهيز الجوال لكشف رادار السرعه ( والعهده على الراوي ) وذلك بوضع الكود : 2000 في قائمة ضبط الحمايه بند المجموعه المحدده . وإذا كان جوالك رهيب قديم فالكود هو : 00000 , واذا كان جهازك الكوبرا ولا إريكسون ولا غيره .. فأقعد بها ولا تسرع .
- إذا كنت زلابه يفضل وجود سلاح تحت المرتبه ,, ويدخل تحت طائلة السلاح كل من : فرد , عجره , سكين , مقص أظافر , بازوكا ,,
- يفضل لبس أردى أنواع الثياب لأن الدعوه سفره ولاحد يمك .
- فكر قبل ان تسافر فيمن يفكرون فيك وينتظرون عودتك سالماً .
- عند الإنطلاق لاتنسى دعاء السفر .
- إذا تعديت الديره وبدأ الخط السريع : أكنس أبو الطبلون واتكل على الله ولا يردك الا التفتيش
هذي عاد انا ماأنصح فيها من كل اللي نقلته لكم الا احذر تسلم
اللهم سلم كل مسلم في حله وترحاله
اما نكس ابو الطبلون لا يردك الا التفتيش
معاد فيه تفتيش فيه تصوير ساهر يلقطك على بعد كيلو
الله يعطيك العافيه حايليه
موضوعك رائع يجمع بين النصائح والروح الفكاهيه المرحه