هلا هلا هلا هلا اخوي تركي
الحمدلله على سلامتك
ماشاء الله واضح انك انبسطت كثير بالنمسا !!!
صح تعاملهم جدا راقي وشعب خدوم جدا ماينقصهم غير الاسلام ( الله يهديهم )

صدقت أخوي
كل شي عندهم منظم ودقيق
وأهم شي الشوارع واو عجبتني وبقو
كل شي وله شارع خاص ، ومحد يتعدى على حدود الغير
روعه هالبلاد بالتنظيم الدقيق
يعطيك العافية أخوي والحمدلله عالسلامة

الحمدلله عالسلامه
صادق اخوي شعب يعتمد على النظام في كل اموره الحياتيه..
ومن ناحيتي فقابلت الكثير ممن لديه رغبه وشغف في معرفة الكثير عن الاسلام ومنهم صاحبة فندق بكابرون ولقد انبهرت ولله الحمد بما وجدته من اجوبه مقنعه ونصحتها بزيارة المركز الاسلامي بفيينا وكذلك عدة مواقع عالانترنت ..
شكرا عالموضوع الطيب

صدقت يااخوي هالشعب ماينقصه غير الاسلام
السايق اللي كان معنا قالنا سالفه وربي تخليك تحترمهم اكثر
يقول عندهم اللي يكذب لو كذبه صغيره كل الجيران ماعاد يصدقونه ويحذرون الناس من التعامل معه
حتى لوكذب وقال انا مش موجود في البيت وهو موجود
تخيل مدى حرصهم على الصدق في تعاملاتهم
وهو يسولف لنا تخيلت عدد الجيران والاهل اللي ممكن تقاطعهم بعد هالكلام اللي سمعته
وربي شي مخجل
متى يجي اليوم اللي نكون قدوه لاسلامنا ونحبب الناس فينا
وعلى فكره ترى الاسلام يعتبر عندهم الديانه الثانيه
لايغرك كثر الكنايس اللي عندهم
وسبب كثرتها على ماعرفت من السايق انهم يهدون القيصر كل سنه بمناسبه ميلاده كنيسه
صراحه شعب عايش الله يديم عليهم النعمه ويهديهم للاسلام

ياخي لا تسوون من الشعب انه ملاك هم يخافون بس من القانون لان عندهم حكومه منظمتهم بل اكثرهم حاقدعليك وعلى دينك وعلى عاداتك بس المصلحه تخلية يكون طيب ابقولكم على اخس موقف واجهته في سفراتي بل في حياتي وهو اول ساعه طبيت فيها فينا وبعد ما وصلنا الشقة ونزلنا العفش قلت لزوجتي واختي واخواني الصغار مانبي احد ينام علشان ما يتلخبط جدولنا بنروح لشارع المشاة نضيع الوقت رغم التعب الحين الساعه اربع بنطلع والساعه ثمان نرجع وبالكثير تسع ننام علشان نصحى بدري وننظم سفرتنا واول ما طلعت انا وعائلتي من الشقة متجهين لشارع المشاه ولا نعرف ايء شيء.. نبي نضيع باقي ساعات النهار علشان ننام بدري ونبداء الجدول من اليوم واول ما طلعنا وبعد ما تغدينا في مطعم ايراني وجدناه بقرب الشقه لقينا حديقه جميلة عند كنيسه بقرب فندق ريجينا جلسنا وصورنا ولعبت الاطفال شوي.. وبعد نصف ساعه توجهنا حسب الخريطه لشارع المشاةالتالي وكنا نمشي ونحاول معرفة الاتجاهات وموقعنا على الخريطه طلع لنا واحد وفي البداية كان ياشر بزقارة على بنتي اللي في العربية ويتكلم انقلش وكان بحجم الخرتيت ومكحل عيونه بالاسود الغليظ ومسوي مناكير اسود بعدين قلب على زوجتي واختي وقال انا اقصدكم انتم واذا ردوا علية قال اصمتوا انتم عندكم المراءة كالحيوان تقاد وليس لها حق باي شيء تقوله وكنت اقول امشوا لاحد يتوقف ولا يرد علية وقام يتكلم عن النقاب وبعدها هاج مثل الخنزير وقام يرمينا باوقح الكلام الذي يخدش الحياء والكرامه ويثير غيرة الديوث فما بالك بمسلم عربي يقال له مثل هذا الكلام الذي لا تسمعه ولن تسمعة حتى بالافلام وبصوت عالي لو تستخدم مكبر صوت ما غطيت علية ..وتبعنا لمسافه اكثر من نصف كيلو وهو يسب ديني ويسب بلدي ويسب زوجتي واختي وكل مسلم وكل منقبة وكانت تفوح منه رائحة الشراب الشيء الذي استطيع ان انقلة من كلامة لانه اضحكني في ذلك الموقف الرهيب هو قولة انتم تاتون الينا لتاخذوا اموالنا هذا الكلام الوحيد الذي استطيع كتابتة هنا لانه هو الائق الوحيد من ضمن سبه يعني ما فية كلمات وسخه وانا وقتها شل تفكيري لا اعرف كيف اتصرف من كثر ما مشينا ونحن مشلولين التفكير لا نعرف اين نحن ولا اين وجهتنا ونحن عددنا سبعه بين اطفال ونساء وكان كل الماره يتفرجون ويستمعون الى هذا الكلب وهو ينبح والله ان الكلب لا اخف منه نباحا وبعدها تدخل شاب نمساوي وحاول ايقافه وبمناوشات خفيفه ثم تركه وزاد الخنزير هياجا انا وقتها فكرت ان اخربها لو توصل لين القتل بس فكرت في هالمساكين اللي معي وش بيصير لهم لو نطلوني بالسجن حتى وهم اول يوم لهم ونحن لا نعرف نستخدم لا باص ولا اندر قراوند طبعا هو يتكلم انجلش وجميعنا كنا نفهم مايقول ونستطيع الرد بالانجلش ولكن الرد لا يشفي الغليل ووصلت معه الى انه قام يستخدم يده في دفع الاطفال والنساء وانا احاول ايقافه وبتمالك الاعصاب لاني اعر ف لو دخلت معه في شجار يا ذابح يا مذبوح لن اتمالك نفسي المهم انه ولمدة نصف ساعه وفمه يزبد بسب الدين والنساء ويعتزي بجدتة التي حاربت النازية وكان كل تركيزي ان ارى شرطيا ينقذنا من الموقف المرعب الذي يعيشة اطفالي واخوتي وكان حالهم يقول اين بلادي نريد الخلاص لا بارك الله في اليوم اللي طبينا فية فينا والعبرات تخنقهم والطفلة تكاد يغشى عليها من البكاء وذات الخمسة اعوام تكاد تشل من الرجفه والباقي يقاوم الانهيار بحثا عن الخلاص حتى مر صاحب تكسي ايراني فتناوش معه بالكلام ومن ثم قصدت صاحب التكسي بان يطلب لنا البوليس وفعلا دقائق حتى جائت سيارة الشرطه وكنا على بعد خطوتين منهم لكن من هول الموقف لم اشاهد لوحتهم لانها صغيره واول مره اشوف لوحة بوليس بالالماني لانه اول ساعه لنا هناك الغريب كيف لم يسمعوه رغم ان صدى صراخه يصم الاذان بين تلك الابنية والطرقات الحجرية التي زادت صراخه وهجا بعدها اقتادوه للمبنى وبداءوا يسالوننا ومن ثم انهار من بقي من العائلة المساكين وبدائوا ينتحبون ويبكون من كبيرهم حتى صغيرهم وكانت الشرطية تسئل النساء عن اسمائهم وعنوانهم واسئله سخيفه وهل تريدون الاسعاف وقاطعتهم وقلت لهم انتم تسالوننا.. انا اسالكم هذا الرجل الذي سبنا وسب ديننا واعتدى على اطفالي ولامس نسائي وكرهنا لهذا البلد وعيشنا حالة رعب لم نواجهها لا في امريكا ولا فرنسا ولا في اي بلد زرناه قبل لا شرق ولا غرب قالت لي الظابطه هو لم يؤذيك جسديا ولم يلمس نسائك في مناطق حساسه احسست ساعتها بالعنصرية القذره وعلمت انني لو كنت اوقفته بالضرب اللي نستخدمة بالعجر وفقع الوجيه وشق الرووس كان رحت فيها المهم قلت لها كل اللي سواه وكانه لم يفعل شيء قالت الان هو بيدفع غرامه على تعرضه للمشاة وهو سكران وقالت مع الاسف انه طلع نمساوي وكان فية مصري صاحب تكسي قاعد يتكلم معنا ويترجم لان انجليزيتهم ليست قوية المهم من كلام المصري قال هم بيحاولوا يلفوا الموضوع بس انت ما تسكتش عن حئك دولى عيال كلب وعنصريين وهذي شهادة رجل عاش عندهم لمدة 23 سنه قلت للشرطية انا لازم اخذ حقي بالقانون انا لم اضربة رغم تهجمه ورغم انه كان يقول يالله خلنا نتضارب (فايت مي فايت مي) قالت تقدر تراجع القسم الرئيسي وتنبش القضية هناك المصري اعطاني عنوانهم... وبعدها قالوا لي نبي تكسي نبي نرجع للرياض خلاص قلت لصاحب التكسي تودينا قال انتم سبعه لازم سياره كبيره قلت خلاص نركب تكسيين من الرعب قال اخوتي لا واذا انحاش فينا التكسي الثاني وسالت المصري وين شارع المشاة قال بعد البناية هذي يعني خطوه وحده المهم كملنا طريقنا وطبينا في طريق المشاة وكان مزدحمابالسياح وليس بالنمساويين للمعلمومية وكانت الساعه حوالي الخامسة وانواع العروض والترفية ولكن وجوه العائلة كانت وجمة ولا ترى سوى صورة ذلك الخنزير الذي يصرخ واقسم بالله انهم لم يستمتعوا باي عرض تلك اللحظه ولا باي منظر وكنا نرى الكنيسة وكانها شبحا والناس وكانهم اعداء لدرجه اننا وعند الساعه الثامنه قررنا الرجوع ولازالوا مصرين على الركوب في تاكسي واحد ولا يريدون ان يستخدموا الاندر قراوند ومشينا حسب الخريطه اللي معنا لين تقطعت رجولهم لان روسنا انقلبت ما وصلنا الشقه الا الساعه 11 اقسم بالله انني لم استطع النوم تلك الليلة من الغبينه والقهر وحتى يوم جيت افطر كدت استفرغ ولم يكن بيدي حيلة هذي اول ساعات لي في فينا مع الشعب الطيب ولكن رغم هذا اكملنا جدولنا وحاولت الترفيه عنهم في اليوم الثاني للملاهي واليوم اللي بعده لحديقة الحيوان حتى تلاشى ذلك الخنزير ممثل الشعب النمساوي من مخيلتهم وبداوا يستمتعون بالسفر اما انا فرغم الضحك والابتسامه فكنت اتمنى لقائه في اليوم الثاني بعد ان عرفنا استخدام الاندر قراوند وضمنت بان عائلتي سوف تستطيع تتدبر امرها بعدي والله اني تمنيت لقائة رغم ان تمني لقاء العدو لا يجوز وهذه القصة لم ارد ان اذكرها لاني اعتبرها عارض قد لايمر الا لمن هم سيئوا الحض ولكن مديحكم لهولاء الخنازير افقدني صبري على فكرة هذا الأمر لم يثنيني عن استخدام الاندر قراوند طول فترة اقامتي في فينا ولم اطلب تاكسي الا عند ذهابي لمحطة القطار علشان العفش لذلك استطيع ان احكم عليهم بانهم شعب سيء من نظراتهم لنا في الاندر قراوند وتلفظهم علينا وتعاملهم واجابتهم لنا عند الاستفسار عن شيء وخصوصا في الاماكن الرئيسية العامة انتم تتكلمون عن ابتسامه اصحاب المصالح الخاصه وعمن تخالطوهم من السياح في الاماكن السياحية اغلبهم ليسوا نمساويين هم مثلكم سياحا تسعين بالمية ممن هم بشارع المشاة وماريا والاماكن السياحية سياح مثلكم لذلك الابتسامه عنوانهم انا لا اظلم الشعب النمساوي بل اقول هكذا لانني عايشت شعوبا اخرى ولم ارى مثلهم وبالنسبة للنظام والترتيب هم اصبحوا هكذا لانه هناك حكومة نظمتهم وقننت لهم حق الطريق بقوانين صارمه وحازمة منذ زمن اجدادهم حتى تشرب اجيالهم النظام وحق السير واحترام الطابور وليست حملات اسبوعية تطبق وتنسى باقي العام الشعب الامريكي اول ما بدائت صناديق البريد استخدموها للنفايات حتى تفهم الشعب وبقوة القانون معنى ان يكون نظاميا الحكومات هي من يتحمل مسؤلية تطبيق الشعب للنظام وان توفر السبيل لذلك عربية الطفل هناك استطيع ان الف بها النمسا كلها وعلى الرصيف لان موفر رصيف للمشاه وليش رصيف لقفز الحواجز كما لدينا خطوط المشاة واللوحات تجدها حتى في الاماكن النائية هل خططها الشعب اشارة المشاة لها الاولوية من وضعها ومن برمجها هل هو الشعب ...الخ ...الخ انظر الى دبي شعبها مثلنا نفس العادات والتقاليد وبدائنا الحضاره سويا ولكن الحكومه ارادت بلدا منظما واصبح لها ما كان بفرض النظام واخير لم اتكلم عن هذا الموضوع الا عندما رائيت مديحكم للشعب وجعلتموهم افضل من المسلم صاحب النخوة....... وشكرا

صدقت اخوي تركي يتحلا الشعب النمساوي باخلاق عاليه وابتسامه دائمه , وهذا لان الجو عندهم يساعد على كذا , ما عندهم شمس مثلنا تبخر المخ او حر مثلنا يشوي الجلد , وايضا كما ذكر اخونا daayem ان النظام الصارم والقوي يجعلهم منظبطين .
ونحن ناسف ان يحدث مثل هذا الموقف الذي حدث لاخونا daayem في بلاد من بلدان الكفر وهو لا يستطيع ان يدافع عن حقه بسبب العنصريه وهو درس لك سائح مسلم يتعرض لمثل هذا الموقف فيجب عليه ان يبين شجاعت المسلمين وقوتهم في الدفاع عن حقوقهم وان لا يسكت حتى وان وصل به الامر يشتكي على الشرطه في السفاره لكي تقوم بالمطالبه عن حقه بحكم خبرتها في هذه البلد .