الموقف حقك هذا يخوي الزعيم أتوقع حصل لكل من ذهب لإندونيسيا وأولهم انا
من ناحية عكس الأتجاهات ومن ناحية السواق.
انا بالنسبة لي موقف صارلي يرفع الضغط...
انا وخويي سوينا (شيك آوت) من الفندق ونبي نروح للجبل ركبنا السيارة وانطلقنا للجبل وأجرنا السكن طبعا وصلنا على العشاء تقريبا مع الزحمة والفرفرة على سكن. المهم يوم اخذناالسكن قمنا ريحنا وقمنا نسولف الا ونسينا شيئين....؟ اللي هم ؟؟؟
جوال خويي نساه بالغرفة والشي الثاني والأهم مبلغ التأمين 400 دولار مع العلم انه الوصل حق مبلغ التأمين أخذوه الفندق ولا اخذنا التأمين وعلى طول ركبنا تاكسي ورجعنا لجاكرتا وطقاق مع الفندق طبعا الجوال (انسفوه حقيت الهاوس كيبينق) ومبلغ التأمين بالهواش والعفرتة يالله عطونا اياه لأنه مافيه شي يثبت ان احنا ما اخذنا الفلوس. وبعدين رجعنا للجبل على الساعه 3 الفجر تقريبا وذاك اليوم طلع أسوأ يوم لي في جاكرتا كله تكاسي ومشاوير وهواش.. لكن الحمد لله اخذنا التأمين أهم من الجوال
تحياتي ،،،

قايلكم انتم شياب
من حقين العراق انت أول حبيب أولا
تنسوون كثير
الحمد لله على السلامة
طيب والجوال ولا الله يخلف ;)
اخوك :
الزعيم

بالنسبة لي كان أسوء موقف الذي حصل لي في مصر وكنت ساكن في فندق شبرد وهو من فنادق خمس نجوم مع العائلة وسوف أقوم بذكر ذلك الموقف لأهميته من وجهة نظري لما فيه من عبره للآخرين وكان كالتالي
اتصل علي أحد موظفي الاستقبال و طلب مني أن أحضر لهم الجوازات لكي يأخذوها للتسجيل حسب النظام الذي كان متبع في ذلك الوقت
فأخبرت ذلك الموظف بأن جوازاتنا موجودة لديهم
وبعد فترة قصيرة أتصل بي ذلك الموظف مرة أخرى وأخبرني بأنهم بحثوا ولم يجدوا جوازاتنا لديهم
خويكم دوروه في تلك اللحظه .... طاح قلبه ... كل شيء يهون إلا الجوازات ... ما فيها مزح
ما سكر الهاتف إلا وأنا مرتز عندهم تحت وأطلب مدير الفندق ويجيبونه .. على ماشا وشه .. ويبدأ البحث و للأسف الشديد أكتشف بأنهم يضعون كافة الجوازات في صندوق بمكان غير مؤمن ففي استطاعة أي شخص يدخل خلف الكاونتر أن يأخذ أي جواز يريده (هذا بعد فندق يا زعم خمس نجوم ... لكن الشكوى لله) وهاتك تدوير من ثلاث موظفين .. أثنتين منهم موظفات ياخذوا العقل لكن أنا وين والتقزز وين في تلك اللحظات .. ولكن للأسف لم يجدوا لهم أي أثر وبعدها طلبوا مني الذهاب للغرفة وسيحققون في الموضوع .. للأسف كانت العائله معي وقلبي يقول دق دق دق دق يعني لست على طبيعتي والا كان تبكبكت عليهم وطلبت واحدة من تللك الموظفات تصعد معي لترفع من معنوياتي المحطمه ... لا يروح بالكم لبعيد مجرد دردشه بريئه
وبعد حوالي نصف ساعة وأنا على أعصابي .. أتصلوا علي مرة أخرى وقالوا بأنهم وجدوا جوازاتنا فقد كانت مع أحد الموظفين المصرح لهم من الفندق وكان قد أخذها للتسجيل وليس لديهم علم بذلك (( والله أونطه)) وما أقفلوا الهاتف الا وأنا مرتز عندهم مرة ثانيه وأطالب بالجوازات
ومن ذلك اليوم وأنا في كل سفراتي بعد ما ينتهون من تسجيلها وأنا أناظرها وأحرسها أقوم بحفظها في صندوق الأمانات الخاص بي بالفندق

في أحدى سفراتي مع الشباب إلى سوريا والتي زرنا فيها اللاذقية وكنا جداً حذرين من الأكل فقد سمعنا عن حالات تسمم كثيرة ولكن بما أننا ساكنين في فندق الشاطئ الأزرق وهو من الفنادق المصنفة كخمس نجوم ومأخذين علينا مبلغ شوي وشويات ... نزلنا للغداء في مطعم الفندق وكان المطعم والحق يقال حلو و شكله وايد نظيف
فأخذتني الثقة الزايده فيه ومن ضمن طلباتي كانت سلطه خضراء... نفسي كانت هافتني عليها .. وبعد الأكل بحوالي ثلاث ساعات ...... تخيلوا مسيقى تخوف من التي تكون في أفلام الرعب ... بدأ المسلسل من ترجيع وإسهال وهذا حصل لي لوحدي .. قلنا ما فيهاش بجه أكيد تسمم من السلطة .. كان يشيلوني الشباب وطيران ... بس الحمد لله كان رادار المرور مغلق .. على أقرب عيادة ما أدري من وين جابوها
من ضمن الكشف طلب مني الدكتور بفتح فمي لكي يضع ميزان الحرارة ومع أني كنت في حالة يرثى لها بس مصحصح فقد لاحظت بأن الدكتور لم يعقم ذلك الميزان .. فطلبت منه تعقيمه قبل وضعه بفمي ... وياليتني لم أطلب ذلك ... لأني لاحظت بأنه بعد ما عقمه قام بمسحه مره أخرى بالبالطوا الذي كان يرتديه وكان من الواضح والجلي بأنه غير نظيف بتاتاً ... وقال لي ها عقمناه والضاهر بأنه كان شكله مستغرب من طلبي ... وقال أفتح فمك فرديت عليه نو وي ... يعني بالحساوي معصي ... وغسلت لك الشباب الذين كانوا يضحكون من ذلك المنظر ولا على بالهم ويعلقون ويقولون اها عاد أفتح فمك تراه ما يعور
وطلبت منهم أخذي لدكتور أخر والحمد لله مرة التجربة على خير بس تمنيت بعدها أن يكون أحد الشباب سجلها على كاميرا فيديو للذكرى بسبب تعابير الوجوه التي رافقتها

albinsaad
هلا وغلا
بس يعني أن المعروف أن مطاعم مصر أكثر ضرر من مطاعم سوريا
والمعروف أن اكل سوريا أنظف من مصر
هذا الكلام من ناس جربو هالشي
وانا واحد ما رحت لمصر ولا كان اعطيتك الخبر الأكيد
لاكن الي اعرفة أن سوريا انظف بس
والحمد لله على السلامة
والضاهر أن الدكتور هذا مهوب دكتور عادي الي يمسح ميزان الحرارة با البالطو حقة
رح تأكد من هالدكتور
اخوك :
الزعيم

انا واعوذبالله من كلمة انا رايح لمدينه تبعد عن العاصمة 7 ساعات تقريباً المهم وقبل لانوصل بساعتين والساعة خمس ونص حول المغرب
الا وتخبط السيارة علينا لا ومن زين الوجه معي شنطه تاخذني انا وخويي (غرفة نوم) من كبرها والرز والنواشف والتونه في شنطة والجوازات والفلوس
كل شي ضافينه معنا ، وينزل السواق قافله معه في ذيك المقطعة ويقول دبروا انفسكم انا ماراح اتحرك الا لين اصلح السيارة وننلطع إلابعد المغرب ويجينا ذاك الانكوت (باص صغير) ويضف عفشنا هو و اللي معه ويدينا على قلوبنا بس طلع رجال(مافي هالديرة رجاجيل) ووصلنا للديرة ونزلنا عند باب الفندق
والسواق لا خبطت سيارته ولا شي بس مل من كثر المشاوير ودقت عليه المدام وقالت ارجع ، ورجع زي ال.......
تقولون وش دراك ( اقول دريت ، طبعاً السواق يتكلم انجليزي ونحن في ذاك الوقت ما نعرف الا ابا كبر وبازين بها بعد )
وسلامتكم

وعليكم السلام ورحمة الله وبركاته .
يا زعيمنا يا كبيرنا أنا عندي مواقف ودي استسمح منك واذكرها في ها الوضوع الرائع بس أبيك تسمح لي وتعطيني فرصة كم يوم وأذكر ما في جعبتي . تحية قلبية .

والله المواقف كثيره اللي تحصل خاصه لما تروح لدوله اول مره
وفي اندونيسيا في الجبل كنت باروحفيها بسبب عكس السير هذى وحده والموقف الثاني اني رحت السوق لحالي وخويي تعبان نايم في اول يوم المهم ركبت مع تكسي لسوق انجريك وفي الرجعه ركبت مع سواق تكسى دلخ ما يعرف الفندق اللي كنت ساكن فيه وانا ادلخ منه لاني مااعرف اسم الشارع والمشكله انه مايعرف لا غربي ولا انجليزى انا اهرج بديره وهو بديره ....انا قلت اكيد هذا يبي يزود العداد بس اخيرا غيرت رايي لانه قام يسأل وبعد فرفره ساعه بالشوالاع والجو مطر عرفت الشارع اللي كنا فيه ولقينا الفندق ويطلع العداد كله اقل من 40 لكني اعطيته بس 20 نفس سعر التاكسي اللى وداني
الموقف الثاني ان خويي مرض جاه زكام وكحه ونزلت ادورله مضاد حيوي وصاني فيه ونزلت الصيدليه ....اقولهم اسم المضاد ماهم عارفينه ...اقولهم مضاد للزكام بالانجليزي يردون علي بالاندونيسي لا انا فاهم ولاهم فاهمين (اول مره اشوف صيادله مايعرفون انجليزي) المهم اخر حل قمط اعاطس واكح واتمارض قدامهم حتى فهموني....وطلعت بشراب وحلاوه مص .
الحقيقه اللغه مشكله عندهم ...ماتلاحضون حتى اللوحات مافيها الا اندونيسي

أحسن موقف لي أني تعرفت على عصويد....... وموقع التعارف كان حلو جدا..........