Miss Qa
15-01-2022 - 03:33 pm
مرحبا خبراء الامارات
ان شالله الويك اند الجاي بكون في دبي (خميس - جمعه - سبت)
حجزت السكن في البستان
بكون برفقة الوالده واختي
ونبي نغيير جو
وحاطه فبالي اروح مول الامارات - فستفال مول - الغرير - حمر عين
شتنصحوني في هاليومين وين اروح وشسوي
وبخصوص المواصلات ش استخدم ؟؟؟
عندكم ارقام سواقين ؟؟؟
او شركة مواصلات ؟؟؟
ومشكورين ع المساعده مقدماً
حياكم الله في الامارات بلادكم الثانيه
وان شاء الله تستانسون وتغيرون جو
بالنسبه للأماكن اللي انصحكم فيها
اذا تبغون مولات
مول الامارات حلو حق تمشي وتدخلون سكي دبي وايد بتستانسون
بن بطوطه وايد حلو حق تمشي وتسوق
دبي فيستفال سيتي وايد حلو حق تسوق ومطاعم حلوه
ميركاتو بعد حلو حق سوالف ماركات
اذا تبغون اشياء رخيصه صناعه صينيه عندكم مركز التنين بس اخر مره دخلته ما حبيته من كثر الزحمه والروايح كرمكم الله
مركز برجمان حلو
مركز حمر عين ناسنه والله من زمان ما رحته
عندكم قناة القصباء في الشارقة حق يلسه وفيه مطاعم حلوه وتقدرون تركبون عين الامارات
مركز صحارى في الشارقة حق تمشي وتطمش واهل الشارقة اغلبيتهم تحصلونهم في الويك اند في هالسنتر
لو بيلس اقول المراكز ما بخلص
تقدرون تخصصون يوم تسيرون العين وتزورون المبزره وتسبحون في الماي الحار خاصه ان هالايام الجو بدا يعتدل
وبالنسبه للمواصلات
انصحكم بخيارين
تأجرون سياره من احد مكاتب التأجير في المطار
أو
تستأجرون سيارة بسائق بيكون وايد اريح لكم
بالنسبة للتكاسي ف بتدفعون وايد تخيلي انج في كل مشوار تدفعين مبلغ ما يقل عن الستين درهم
يعني لو في اليوم نويتي تسيرين اكثر من مكان صدق بيخسرونكم وخاصة التكاسي يوم يشوفون زوار ما يدلون في البلاد يطولون المسافه علشان يطلع العداد لصالحهم من غير مضيعة الوقت في الانتظار
واذا كنتي تبين رقم سواق بسيارة فأنصحج بواحد من اهل الامارات كذا شخص من معارفنا اتعامل معاه وما قصر وياهم
مشكلته شوي في المواعيد بس يحاول قد ما يقدر انه ما يقصر واذا حصل منه تقصير ما ياخذ قيمة هاليوم
XXXXXXXXXXXXXXXXXXXXXXXXXXX
ْ XXXXXXXX
يمنع وضع الأرقام
واسمحيلي على القصور