بالنسبة للوصف انا ماني من الرياض لكن ابوصف لك نصف المسافة بما انك طبعا راح تجي مع طريق الدمام ، اول ماتوصل الرياض بتل طوالي لين يجيك كبري شارع التخصصي
اطلع معه ، ثم بتل لين يجيك لوحة ع اليمين مكتوب فيها (شارع ام الحمام )
رح معها ، ثم بتل حتى يجيك بنده ع اليمين ، بعدها مباشرة بتحصل لوحة مكتب التأشيرات
واذا الوصف فيه خطأ اتمنى يصححون لي ،
اما بالنسبة للموعد فهم للأسف لايتقيدون بالوقت ، انا كان وقتي الساعة عشر صباحا وماجاء رقمي الا 12 الا ربع
وماطلعت من المبني الا الساعة 2 الظهر !!

يعطيك ألف عافية يالغالي وماقصرت
وبخصوص الحجز والله شكله الكلام صحيح

اخوي اول ما تخش الرياض امش سيده لين يجيك الملك فهد ارق فوق الكبري واتجه يسار يعني يكون وجهك جنوب
امش لين يجيك تقاطع الملك فهد مع خريص لفه يمين طريق مكة المكرمه يكون وجهك غرب تعد اول كبري حق التخصص وثاني كبري حق تركي الاول بعد كبري تركي الاول خش يمين بيجي على يمينك مبنى عسكري عليه صبات حمايه اول شارع ثلاثين يجيك لف معه يمين وامش لين تجي اول اشاره ديور معها يجي على يمينك بنده و مكتب فيغا للتاشيرات ومكاتب السفارات فوقه

ما قصرو اهل الرياض ...

يعطيكم ألف عافية على تفاعلكم معاي والحمدلله أمس خلصت أموري كلها
وصلت المكتب الساعة 12 وللعلم مقدم أوراقي كامل من قبل وما تبقى عندي إلا التبصيم
المكتب كان مزدحم جداً طبعاً بسبب تواجد مكاتب لدول أخرى أيضاً لتقديم الفيزا
ما انتظرت دوري بالتبصيم كثير وللعلم كنا 4 أشخاص ,, ما جات الساعة 1 الا وحنا مخلصين أمورنا كامل
حمدلله خبرني انه خلال الخمس السنوات القادمة ما بحتاج أجي للمكتب عشان أبصم يعني وأنا بالخبر أرسلهم أوراقي ويخلصونها ويرسلون لي الجواز بالفيزا
تعامل الموظفين ممتاز جداً و موظف التبصيم كان لطيف ويضحك ويسولف
شيء واحد ما عجبني هو تعامل الأمن الي كانوا بقمة الوقاحة وقلة الأدب في التعامل مع الناس
لكن حمدلله كل الأمور مشت تمام ويعطيكم ألف عافية

الف شكر لذكر تجربتك يا غالي
مشكله تعامل التكاسي بالدول السياحيه لا تعكس تعامل البشر في الدوله
وتعامل الامن دائما سيئا ايضا
ولكن من اجل الفيزا يهون وبننسي ان شاءالله

وين المكتب انا ودي اقدم على تاشيره بالله ضروري تردون استناكم

وصف الشباب واضح
مع طريق خريص او من طيق الملك فهد وتقاطع العروبه لكن الافضل طريق خريص مكه