بسم الله
وصلنا المملكة العربية السعودية وتحديدا إلى الشرقية عن طريق مطار الملك فهد في الدمام مع زوجتي الغالية. في بداية شهر يوليو 2008 وتحديدا يوم الاثنين 1/7 عن طريق طيران الاتحاد قادمين من أبوظبي. لرحلة عمل تستمر لمدة شهر واحد.
وجدنا الوفد اللي يستقبلنا في انتظارنا والحمد لله كل الأمور تمت بسرعة وسلاسة في المطار بدون أي تعقيدات حالنا حال مواطني دول مجلس التعاون الخليجي.
والحمد لله كانت الترتيبات جيدة .. الشقة جاهزة وقريبة من مكان العمل.

ماكس ميد
متابعين معاك للأخر لاتطول علينا
ولاتنسى الصور

احنا وياك بس لا تنسى الصور عشان يحلو الجو....
في انتظار تقريرك ومغامراتك

في انتظار المغامرات والصور

تحياتي لكم
اعذروني على الصور ..
ما صورت كثير بصراحة .. بس إن شاء الله راح أصور وأحطها لكم

1. سألته: أيهما أفضل

نكمل مشورنا..
رحت أطلع لي شريحة جوال.
دورت ودورت فرع قريب لأي شركة جوال .. ما حصلت.
بعدها سألت أحد الشباب المارين.. وقال لي تقدر تدخل أي محل جوالات وتطلب من عندهم شريحة جوال.
قلت له: جزاك الله خير.
المهم .. مشيت وأول محل جوالات شفته .. دخلته.
سألته إذا عنده شرائح جوال... قال لي أبشر.
الرجال ما قصر معاي..
قال لي عندي شريحة ( الجوال ) أظن اسمها سوا... ب 165 ريال فيها 125 ريال رصيد
وشريحة موبايلي ب 125 ريال وفيها 125 ريال ( تحصل 75 ريال في البداية ولما يخلص رصيدك يعطونك 50 ريال رصيد إضافي بعد 24 ساعة )

سألته: أيهما أفضل

قال لي بصراحة .. موبايلي أحسن ولكن الناس ما تدري بعد .. موبايلي خدماتها أفضل بكثير من الجوال وأسعارها أحلى .. بس الناس تروح للجوال لأنها قديمة وإرسالها قوي وغطى كل المملكة .. بس بعد موبايلي إرسالها ممتاز.
قلت له أنا جاي شهر.. أريد أستخدم الجوال لشهر بس.. وكذا راح أسمع كلامك .. وآخذ موبايلي.
أخذتها وشغلتها على طول بدون تسجيل ولا غيره.. والحمد لله ممتازة.
سألته ما يحتاج أسجلها؟؟
قال لي: لا..شيلها واستخدمها
قلت: تسلم ...
الرجال ما قصر وياي .. سألني من وين جاي .. قلت له قاعد أدور على شريحة ومشيت من المكان الفلاني لحد ما وصلت عندك.. مسكين.. قال لي: المكان بعيد والدنيا حر.. راح أوصلك.
وصلني لحد منطقتي اللي ساكن فيها .. وتوادعنا في حفظ الرحمن.
استخدمت الشريحة .. والحمد لله مشت عندي تمام.
حبيت أستخدم النت ... قلت أجرب أستخدم الانترنت عن طريق الجوال.
أوصل اللاب توب بالجوال وأستخدم النت..
اشتغل النت عندي تمام..
وأول موقع أدخله.. ( منتدى العرب المسافرون )
تصفحت الموقع .. يمكن 10 دقايق.. أقرأ بس.
فصلت النت .. وأطالع الرصيد ... لقيته نقص 25 ريال... حشا
5ريال بس عشر دقايق تصفح.. كثير..
المهم .. قلت ما أكررها..
بعد 3 أيام شفت كاونتر موبايلي في مجمع الراشد .. وسألته عن خدمة الانترنت.. قال لي عندهم خدمة السكاي نت... تشترك بمبلغ 100 ريال.. تستخدم 1 جيجا
أو مبلغ 200 ريال ... تستخدم 5 جيجا..
أو مبلغ 350 .. استخدام بلا حدود.
وقال لي .. إذا تبي تشترك .. اتصل على 1100 أو روح لأي فرع موبايلي..
قلت له شكرا ... وعلى طول .. أقرب فرع لشركة موبايلي شفته ... دخلته.
طلبت السكاي 1 جيجا.. قلت كتجربة.
قال لي أبشر..
يفحص على الشريحة .. لقاها ما مسجلة..
يسألني الشريحة .. باسم من؟؟
قلت له .. ما سجلتها.. شغلتها واستخدمتها..
قال لي ما يصير .. لازم الشريحة تكون باسمك علشان أفتح لك.
قلت له يا ولد الحلال.. أنا اشتريتها من محل جوالات واستخدمتها وقال لي ما يحتاج لها تسجيل ولا غيره..
:112:
مني كلمة ومنه كلمة .. قال لي راح أتساعد معك .. وأفتح لك الخدمة..
فتج لي الخدمة .. وما فصر
قلت له: سجل لي الشريحة باسمي..
قال لي: ما أقدر .. ممنوع.. وإذا تبي تسجلها لازم تروح الفرع الرئيسي وتكتب رسالة فيها ,, و,, و,, و,,.
قلت له .. ما أريد.. كل السالفة أنا أريد أستخدمها شهر بس..
قال لي استخدمها .. وبعد كذا .. ارميها..
المهم .. اشتغلت عندي الخدمة .. والحين أنا أكتب لكم باستخدام سكاي نت.
بس المشكلة ,... إنه بين فترة والقانية .. ينقطع الخط .. وأضطر أتصل من جديد..
فأول ملاحظة لي: اشتري شريحة الجوال من أي فرع للشركة المشغلة وسجله عندهم بالمرة.
تحياتي

منوره الشرقيه باهل ابوظبي
متابعه معك ..

وعليكم السلام ورحمة الله وبركاته
حياك الله يا غالي وأسعدتنا بذكر تفاصيل رحلتك وإقامتك في الشرقية
نسأل الله لك التوفيق في عملك وإقامة سعيدة في بلدك الثاني
متابعين معاك وأي خدمة لا تتردد في طرحها هنا لنتشرف بخدمتكم