1. 101:


2. وللعلم هذا السعر دايركت مو عن طريق مكتب خش على طول جامد على الرسيبشن

ooqo
أنا أشوف كأنه أسمي طلع بالموضوع
هلا بأخوي الغالي بوعبدالله مبروك ألف ألف مبروك على اجار السياره وأنشاله رأيي طلع بمحله ومرتاح الحين

101:

أنا راح أعطيك رأيي في فينا وزل أم سي لأني عارفهم عدل أما الباقي فالبركه بالأخوان وأرئهم الطيبه
زل أم سي بو أربع أو خمس ليالي ولاتسكن في زل أم سي أسكن بالكابرون تلقى شقق رخيصه باليوم 80يورو غرفتين وصاله وحمام بينما أنا سكنت بفندق نيوبوست هوتيل غرفه لشخصين 120يورو باليوم وللعلم تأثيث الشقه راقي أحسن من الفندق
والكابرون تبعد عن زل أم سي6كيلو فقط وأنت عندك سياره وحر نفسك وفي خوش شقق وأنت طالع من زل أم سي ورايح الكابرون تلقى مطعم صيني على إيدك اليسار فيه عماره وكلها شقق للأجار ونظام رسيبشن وراقي وهذي اللي سكنت فيها ب80يورو باليوم
الأماكن بزل أم سي
1-مرتفعات الكابرون تزلج بالثلج وهذي يبيلك تروحلها من الصبح لأنها تسكر الساعه 4 العصر ومع الفراره في سنتر الكابرون ومحلاتها
2-شلالات الكرمل وهي تبعد تقريبا 60 كيلو متر من زل أم سي ولأخوان مو مقصرين كاتبين مواضيع عن الشلال روح وشوفها
3-التزلج من أعلى الجبل بواسطه الزلاجات مع الفراره في سنتر زل أم سي وتأجير القارب في البحيره
4- في مطعم بس بين دواعيس بمنطقه رورس جنب زل أم سي عنده بحيره إصطناعيه وأنت تصيد السمك بالسناره وتعطيه المطعم يشويلك إياه بالطريقه اللي أنت تبيه
وفي أماكن كثيره إذا أستعرضت مواضيع الأعضاء أنا ما كنت أدري عنها وهم جزاهم الله خير نوروني فيها
فينا
والله ما أدري كم يوم تبي تقعد فيها بس أنا أنصحك بفندق الماريوت قريب من السنتر مشي وقدامه حديقه للتمشي وسعره خذيته بعز الصيف بشهر أغسطس 159يورو أو 169 يورو ماني ذاكر

وللعلم هذا السعر دايركت مو عن طريق مكتب خش على طول جامد على الرسيبشن

بس نصيحه بفينا أصفط السياره بالباركن وياخذ عليك باليوم 26يورو وريح نفسك أستخدم الميترو أرخص وأسهل لأنه السواقه أهناك تضيع وأنا بغيت أفيش بتروم أو على قوله أخواننا المصريين الطرماي اللي هو الباص الكهربائي........ وأقدعها مشوار بالميترو مع الرده 4 يورو للشخص هذا إذا جاك أحد وفتشك وقالك عطني التذكره
أما الأماكن اللي بفينا فأنت حدد وأنا أنشاله بقولك وين تروح
أما بقيه المناطق والله ماعندي خلفيه عنها والبركه بالأعضاء مايقصرون حتى ميونخ اللي زرتها ما أفتريت فيها انت تدري بالسالفه خذيت السياره ومشيت
أما سعر الديزل فأنه الظاهر مرتفع صاير فوق اليورو للتر على رد أحد الأعضاء في موضوعي
وهذا الرابط للموضوع https://artravelers.com
ولي رجعه بموضوعك أنشاله
سلملم

الله يسلم الايادي اللي كتبت يالغالي يا حلويا انا
والله بالنسبه لفيينا يمكن اجلس يا في ماريوت او مريديان وودي اشوف الاماكن اللي ما تتفوت في فيينا وهل تنصحني اروح بودابست ولا لأ .
تحياتي للجميع

ooqo
هلا بالحبيب الغالي بوعبدالله المسافه بين فينا وبودابست عاصمه هنغاريا 250 كيلو متر والله ما جربت هنغاريا
أفضلك تسأل واحد رايحلها ................ ما أقدر أفيدك

هلا بالغالي
طيب في اماكن تنصح فيها في فرانكفورت او ميونخ

ooqo
هلا بوعبدالله
والله ميونخ ما جيتها إلا مرور فقط أو بالأحرى أستلمت السياره ودقيت سلف
أما فرانكفورت ما جيتها والله للأسف
بس تصفح مواضيع الأعضاء في شي كاتبينه عن ميونخ
وأرجو من الاخوان الأعضاء والعضوات المساعده في موضوع اخونا ooqo (بوعبدالله) بإفاده بإستفساراته

هلا بنور المنتدى
حبيب البي طيب عطنا في الفنادق اللي انت رحتها في سالزبرج او زيلامسي او اللي شفتها ومدحوها لك هناك او فندق شفته وتمنيت انك تكون سكنت فيه .. حتى اللي في فيينا وعطنا تفاصيل الطريق الزينه والشينه اللي اتبعتها في طريقك .. وفي اماكن تشجع الواحد يجلس فيها وهو على الطريق من ميونخ الى فيننا .
والله لا يهينك يالغالي داري والله اني تاعبك معي
اخوك ابوعبدالله .
د

أخي ooqo شكراً على إفادتك في موضوع الجي بي أس، وإنشالله أفيدك في هذا الموضوع، أرشح لك فندق الهيلتون دانوب الواقع على نهر الدانوب في فيينا بس شوي بعيد عن الداون تاون (مركز المدينه)، بس إنت تقول إنك بتستأجر سيارة وهذا راح يسهل عليك الإنتقال. رابط الفندق:
http://www.hilton.com/en/hi/hotels/index.jhtml;jsessionid=EOBQU14OYRXPUCSGBIVM22QKIYFC3UUC?ctyhocn=VIEHAHI
إحجز وتوكل على الله، وشاكرين لكم مرة ثانية

1. ooqo


2. شسالفه بوعبدالله بديت تزعلني منك لا كلافه ولا حاجه أنت تامرني أمر


3. وعلى نفس الطريق يتفرع منه خط سريع ثاني أخذهE52/60 لين توصل سالزبورغ


4. زل أم سي فينا


5. تقريبا راح ياخذ منك وقت بين سالزبورغ إلى فينا 4 ساعات

ooqo

شسالفه بوعبدالله بديت تزعلني منك لا كلافه ولا حاجه أنت تامرني أمر

بخصوص فينا أنا سكنت في الماريوت وجنبه لزق فندق راديسون ساس وقدامهم حديقه للتمشي العصريه حلوه حيل وقريب منه المترو وقريب منه مشي السنتر شوبنج كل شي منك قريب وبالإضافه أنه فندق ممتاز والله كان سعره 159 أو 169 يورو وكان ما عندي حجز من وكاله سفريات هذا سعرهم يوم خشيت على طول على الرسيبشن وقلتلهم أبي غرفه وقالولي السعر هذا
بس صعبه الحجز بيوليو وأغسطس متروس بو عراب وبالخصوص العوائل تلقاهم باللوبي مسوين الحريم دوانيات
أما بخصوص السياره بفينا فلاتتعب نفسك أصفط السياره بالمواقف وأستخدم المترو أو التاكسي أو الباص أو التروم سياقتهم صعبه وأنت راح تشوف بعينك.................. أنا بغيت أفيش بترو أو على قوله أخوانا المصريين الطروماي
يبا نصيحه أخو لأخوه أصفط السياره وراح يطلع عليك المصفط باليوم 26 يورو بس أنت مريح بالك بالمترو وكل الأماكن السياحيه عندها محطه مترو
بزل أم سي أنا سكنت بنيو بوست هوتيل وكان سعر الغرفه بشهر أغسطس ( يعني الموسم) 120 يورو باليوم وهذا فندق بو 3 نجوم وبعدها حولت شقق فندقيه في فندق حلو إذا أنت مصر تبي فنادق وأنا ما أنصحك فيها أنصحك بالشقق الفندقيه أرخص وأحسن ....... المهم فندق قراند هوتيل وكان سعره بأول أغسطس 180 يورو للغرفه الدبل
سكنت بزل أم سي بشقق فندقيه باليوم 80 يورو فقط وكان جاري اللي فوقي واحد من الأسره الحاكمه اللي في الكويت وتتكون من غرفتين وصاله وحمام وكان أثاثها أحسن من فندق نيو بوست هوتيل بألف مره
أو الشقق الفندقيه اللي بالكابرون وهي تبعد عن زل أم سي 6 كيلو فقط وأهدأ وأرخص وأنت عندك سياره تروح وين ما تروح وحر نفسك.......... العالم تسكن بزل أم سي لأنهم ما عندهم سيارات ومعتمدين على التكاسي والتكاسي مره غاليه بزل أم سي أغلى من فينا بس ومايحبون يقعدون بمنطقه شوي بعيده عن السنتر من غير وسيله مواصلات؟ أنته عندك سياره روح وين ماتبي تقدر تروح بنفس اليوم سالزبورغ وتجي نفس ما سويت أفتريت فيها شطبتها كلها ورجعت العصر ... بس العصر عندهم الساعه 8 بالليل ما تغيب الشمس عندهم الا عشر إلا ربع
أنت إذا عندك سياره توفر أكثر من اللي ماعنده سياره بالسكن لأنك تقدر تسكن بعيد شوي وشقه مرتبه وراقيه بسعر أرخص حيل أو اذا تبي تروح فرضا شلالات الكرمل وهي تبعد نص ساعه بالسياره أو 60 كيلو متر عن زل أم سي مايطلع عليك شي بس إذا بتاكسي يطلع عليك 80 يورو وأنت صاعد........ فهمت الحين ولا بعد تبيني اوضحلك
سالزبورغ والله ما سكنت فيها بس شفت فيها راديسون ساس حلو او أستفسر من عضو ثاني جرب السكن فيها وأفتر فيها عدل يقدر يفيدك
الطرق من ميونخ إلى سالزبورغسالزبورغ على حدود ألمانيا لزق قول ياخذ الوقت منك أكبر تقدير ساعتين وأخذ طريق سريعE45/52 من ميونخ وعلى فكره طريق سريع بو 3 سيدات حلو وأمن

وعلى نفس الطريق يتفرع منه خط سريع ثاني أخذهE52/60 لين توصل سالزبورغ

سالزبورغ زل أم سي أخذ الطريق السريع E55 لين يجيك تفرع منه خط311أخذه وهو خط رايح جاي تركد فيه وبعض المرات يتحول سايدين لين توصل الكابرون وبعدها تجيك زل أم سي وياخذ الطريق وياك من سالزبورغ إلى زل أم سي ساعه بالضبط

زل أم سي فينا

ترجع على نفس الطريق من زل أم سي إلى سالزبورغ نفس الطريق اللي وصفتك إياه وبعدها تاخذ طريق سالزبورغ لينز Linz وهو خط سريع حلو مرتب أسم الخط E55/60 لين توصل لينز أذا وصلت لنز تاخذ خط ثاني E60أو يسمونه A1 تراه أهو نفس الخط بس راح يتغير عليك أسمه لين توصل فينا

تقريبا راح ياخذ منك وقت بين سالزبورغ إلى فينا 4 ساعات

أما المناظر أو اللي تستحق أنك توقف فيها خلك نفسنا انت عندك سياره عسى منظر أعجبك بالطريق أصفط وتقهوا عسى ما في قريه عجبتنا قعدنا فيها ولا نمنا فيها ولا يردك غير شي موتر تحت إيدك ولا أنت مربوط بحجز طياره ولا حجز فندق
وآخيرا طاحت أيديني وأنا أكتبلك عساني بس كفيت ووفيت لك وكان شرحي لك مبسط ووصلتلك المعلومه تراك عزيز وغالي يا بوعبدالله ولا يهونون الأعضاء الباقين

والله يا الغالي ما ادري وش الرد اللي يليق فيك ..
بس بيض الله وجهك ... وادخلك الجنه
حبيب البي اخر طلب وش اسم الشقق الفندقية اللي سكنت فيها بزل أم سي واللي بالكابرون.
معليش بالغالي بتعبك معي الله لا يهينك