يالله حي كلن باسمه ^_^
تعرفون اليوم جمعه والاخلاق تكون شوي مش ولا بد ، والسبب اني البارحه كنت سهران بالبر للفجر، ويوم رجعت من الصلاه قررت اقاطع اجتماع العائله الاسبوعي على القهوه ..
قلت شرايك تسحب على الشيّاب، وتأدب لك حبه بخاري على كم كاس لبن وتصك أمها نومة اهل الكهف ولا تدري عن نفسك إلا أختك رافستك صباح السبت تبيك توديها لدوامها ؟؟
جاوبني عقلي الباطني ( تمام يا دبل ) ناديت حَمّو وقلت له اتصل ع المطعم خليه يجيب المقسوم، لكن تفاجأت ان اخوي يقول: ترى البخاري مايوصل يوم الجمعه عشان الزحمه !!
انحمست وانقهرت وش حضرته ؟؟ قفلت الاخلاق زود وقلت لاخوي قل ل منو و بيبي يلبسون بنطلع نتغدا برا، ركبنا وطلعنا من البيت وهمت انا وياهم على وجيهنا بشوارع رياض العز..
تعالت الاصوات، الي تقول ملينا من هذا والثانيه تقول لالا نبي هذاك ومدري ايش، واخوي الصغير باله مع الاندومي وحالته حاله، وفجأه زأرت عليهم كالأسد وقلت: (بس لقيته) !!
طبعا كان الي لقيته هو التقرير الي بين يديكم، صحيح انه بسيط وخفيف، بس صدقوني شريف ونظيف وخالي من الشوائب، اتمنى يعجبكم يارب ..
قبل انسى بقولكم فيه اشياء ماصورتها، وهي طبق لزانيا وشوربة دجاج بالكريمه واربعه بيبسي ومويه صغيره، ولا انسى طبعا ضيافة المطعم الي قدموها لنا تشكيلة معجنات لذيذه، وكل هذا كلفنا مبلغ وقدره ( 81 ) لعدد اربعة اشخاص !!
طبعا السعر هذا بالدولار يعني يطلع 304 ريال سعودي، عاد مايحتاج اشرح لكم المطعم لأنه غني عن التعريف، ديكور وهدوء ونظافة وجودة عال العال وفوق كذا اسعار في متناول اليد ..
أتمنى اني كنت خفيف عليكم وأشوفكم بتقارير اخرى وانتم بخير ^_^