1. 1- الأهرامات وأبو الهول:


2. 2- القريه الفرعونيه:-


3. 3- منطقة الحسين:-


4. 4- برج القاهرة:


5. 5- مطعم ابو رامي:


6. 7- -قلعة صلاح الدين الأيوبي:


7. 11- رحلات النيل:


8. 12- مراكز التسوق:


9. 13- ملاهي دريم لاند:


10. 14- مدينة الانتاج الاعلامي:


11. المطاعم


12. المطاعم اللي اكلنا فيه وزرناها:


13. نصائح وملاحظات:-

بعد زيارتي الثانيه لمصر ومع انها كانت لوقت قصير وكنت ملتزم بالعمل (معرض البناء الدولي من الصباح الى 10 مساء) الإ انني استمتعت بالرحله وانا أعجبت بالشعب المصري لكفاحهم وروح النكته والابتسام الدائم بالرغم من مصاعب الحياه وصعوبتها
. أحاول انقل لكم صوره مبسطه عن هالرحله لأشياء زرتها واضافة ملاحظاتي وتعليقاتي:

• بداية في الحجوزات في السعوديه: معظم خطوط الطيران كانت "فل" مافيه حجوزات على الوقت اللي نبيه- اضطرينا نحجز عن طريق البحرين وبالموت (اذا كنت ناوي تروح لمصر فأحجز قبلها بوقت كافي).
• قبل السفر انصحك بصرف حوالي - 100 - 150 ريال كجنيهات- لأنك راح تحتاجها للبخاشيش أول ماتوصل- خاصة للفندق
• ماأخذنا ولا عشر دقايق وطلعنا من المطاروبدون تفتيش ولا انتظار- تراها أحسن من بهدلة انتظار الإجراءات – الطوابير الطويله- والتفتيش وانتظار التاكسي وسعر التوصيل....وغيره – هالخدمه تقدمها الفنادق بسعر تقريبا – 100-150 جنيه تدفعها عند التشك اوت من الفندق –( استقبال في المطار – توصيل للفندق – ترجيعك للمطار عند السفر – يابلاش) (انصح فيها للي معاه اهله)
• راح يستقبلك ممثل الفندق في المطار وهو اللي بيسهل امورك (لاتنسى تبخه ب10 جنيه) لأنك بتحتاجه عند السفر لتسهيل اجراءاتك
• أول ماتوصل للفندق- اللي يفتح لك الباب عطه بخشيش (يفضل خمسه جنيه أو أقل) – بعد ماتعمل تشك إن- اللي ياخذ اغراضك للغرفه برضه عطه بخشيش- والرووم سيرفس (اللي ينظفون الغرف) برضه بخششهم (كل هذا في اليوم الأول او الثاني) بعد كذا بتعيش مثل الملك طوال فترة جلوسك بالفندق
• تقريبا كل الفنادق فيها فروع صغيره للبنوك والصرافه- لاتصرف فلوسك كلها في وقت واحد- اصرف على قد حاجتك وزياده شوي- ونصيحه حط جزء من فلوسك الغير مصروفه لجنيهات في الأمانات في الفندق وجزء عندك في الشنطه- وجزء في الخزنه اللي في غرفتك
• انصحك بشراء شريحة جوال مصريه
• بالنسبه للمشاوير عندك اربع خيارات- سيارة الفندق (لاتاخذها غاليه على الفاضي الا اذا مشوار خاص ورسمي)- أو تركب التكاسي قبل ماتركب اسأل عن التكلفه – الخيار الأفضل استأجار سياره مع سواق (مش تاكسي- سياره ملاكي موديل 2004 او 2005) والسعر في اليوم على حسب نوع السياره يتراوح بين 150 –250 جنيه) وهذا افضل خيار اذا تحب الفشخره والترزز- وللمعلوميه السواق ماراح يكون معاك طول اليوم
• اسأل عن العروض السياحيه الموجوده في الفندق- فيه افواج سياحيه تطلع من الفندق لأماكن مختلفه والعاده رخيصه ومنظمه (زينه للعوائل)

أماكن لابد من زيارتها في القاهره:
(اذا مازرت هالاماكن ماكنك جيت مصر- لابد من احضار كاميرا معاك او على الأقل كاميرا الجوال)-

1- الأهرامات وأبو الهول:

• اول شئ رحنا له -دفعنا لتذكرة الدخول للمنطقه 2 جنيه للشخص- ويقول السواق اذا بغيت تدخل داخل الهرم فيه تذكره خاصه ماسألنا عنها- ممكن تستأجر حصان بحوالي 100 جنيه او عربه ب150 – 250 جنيه والأفضل انك تمشي لأنك راح تدخل اماكن تمشي فيها- غير مسموح للخيول والعربات بالدخول فيها. ومع العربه فيه اماكن ماتقدر تدخلها والسايس يوديك لأماكن يعرف الناس اللي فيها وممكن يزيدون السعر عليك
• ابو الهول قريب جدا وممكن تصور على بعد 3 امتار عنه (مسكين انهرى تصوير)
• لاتشتري أي تذكارات من البياعيين اللي في هالمنطقه. (فيه اسواق ارخص ابا قولك عليها).
• انصحك انك تاخذ ماء معاك لانك بتعطش كثير وتلبس ملابس خفيفه وقبعه على الراس
• راح تشوف الكثير من الأفواج السياحيه- حاول تقرب منهم وراح تسمع معلومات عن تاريخ الأهرامات وابو الهول عن طريق المرشد السياحي اللي معهم بدون ماتدفع شئ – او استأجر واحد ب 50 جنيه
• انتبهوا من اصحاب العربات من النصب تسأله كم السعر – يقول لك اركب ومايهمكش ويتحايل عليك هو واللي معاه الين تركب وخاصة اذا معاك اهلك ويساعدونك في الركوب- وبعد ماتركبون وتتعبون يقول لك السعر 300 جنيه مع انها ماتكلف ولا 100 جنيه ويحرجونك قدام اهلك وعيالك وياتنزل او تدفع- اذا قلت بنزل ولا واحد منهم بيساعدك في النزول ويخلون الخيل يتحرك قدام وورا- وهذا شفناه حصل لشخص وساعدناه. الافضل اذا بتاخذ عربه تتفق على السعر والمكان اللي بيوديك له والوقت اللي بيكون معاك فيه قبل ماتركب.

2- القريه الفرعونيه:-

• هذي قريه/جزيره صغيره مبنيه على النيل وتعطيك ملخص عن تاريخ مصر بمشاهد تمثيليه وزيارة 10متاحف صغيره (عن الفراعنه- الأهرامات- السادات واغتياله- جمال عبدالناصر- حرب اكتوبر- ...الخ) فيه مرشديين سياحيين يشرحون لك وانت راكب القارب وفي المتاحف وغيرها ومتعونيين جدا وما يطلبون بخشيش
• الرحله تستغرق حوالي ساعتين بدون الغداء في مطعم توت عنخ آمون ورحلة اليخت في النيل وهي مفيده جدا للي اول مره يجي مصر لأنها بتعطيك معلومات كثيره عن مصر وتاريخها في وقت قصير.
• أعلى تذكرة- 150 جنيه – شاملة الغداء ورحلة اليخت
• فيه امكانية تأجيل رحلة اليخت ليوم ثاني على حسب ماتبي لكن لابد ان يكتبون لك على التذكره من الخلف ويوقعون عليها وتجي أي يوم ثاني وتاخذ هالرحله (افضل وقت لليخت في العصر قريب المغرب)- تراه تختلف عن رحلات النيل الثانيه لانها تروح للأماكن القديمه ولاتعدي كوبري 6 اكتوبر- وعلى فكره ممكن تسوق اليخت وتصور (يعني انك كابتن تنصب على اخوياك اذا رجعت)
• فيه رحلات للعرب والمصريين ورحلات بس للأجانب – فلا تستغرب اذا تشوفهم يركبون الأجانب قبلك مع انك جاي قبلهم لانه الشرح بالإنقليزي لهم وعددهم كامل- اما انت فانتظر السياح العرب الين يكتملون
• فيه كافاتيريا واستوديو للتصوير باللباس الفرعوني :icon_fara وصراحة الصور بتكون ذكرى ماتنسي (الصوره على حسب المقاس 50 جنيه – 55 او 60 جنيه) عندك اكثر من مكان لاتخلي المصور يختار لك انت قله ابغى اصور على العربه او كرسي الفرعون – او عند بوابة المعبد (اللي يناسبك)
• اذا دخلتوا المعبد فيه زوجة الفرعون والخدم – تقدر تصورون معاها مكان الفرعون او تخليها تطلع وتصور على الكرسي
• حاول انك تكون قريب من المرشد علشان تفهم اللي يقوله وتعرف وين يروح- الكثير يتاخرون بعد مايمشي المرشد للموقع الثاني ويضيعون او يفوتهم الموقع الثاني.

3- منطقة الحسين:-

• مسجد الحسين والقهاوي والاسواق القريبه منه – متعه مابعدها متعه- انصحك بعدم الدخول للمسجد- كل دقيقه يجيلك واحد بركة الحسين ، افضل لاتدخل لانه مافيه شئ وبرا ماراح يجونك.
• ممكن تستأجر شخص يغني لك الأغاني القديمه بالعود والمراويس (اتفق قبل مايبدأ على السعر والوقت اللي بيجلسه معاكم) واطلب لك شاهي – قهوه- ....الخ واستمتع. فيه قهوة الفيشاوي مشهوره جدا او القهاوي الصغيره اللي قدام المسجد. على فكره فيه مكتبات لبيع الكتب في نفس المنطقه اذا بغيت وبأسعار زهيده جدا
• انتبه اول ماتوصل راح يتلاقطونك اصحاب القهاوي- الأفضل قبل ماتوصل للقهوه من بعيد شوف افضل طاوله وروح لها على طول لايمين ولا يسار وقل للي يكلمك انا ابغى اقعد هنا- على طول جرسون القهوه يقول لهم ابعدوا ده عندي وانت اجلس (اذا معك اهلك لازم تسوي كذا والا والله بتلقاهم عاملين دائره عليك وكل واحد يسحبك من جهه)
• من هنا تقدر تشتري التذكارات عن مصر(مجسمات اهرامات- لوحات – خزفيات...الخ وبسعر مناسب) في الأسواق الحرفيه والمحلات الكثيره.

4- برج القاهرة:

• اول ماتاصل بيجونك مصوريين علشان ياخذونلك صوره مع البرج بعدسه خاصه تطلع البرج كله جنبك بسعر 50 جنيه للصوره تستلمها بعد ماتنزل واشرط عليه انك ماتدفع الا بعد ماتنزل
• فيه مطعم دوار فوق ممكن تاكل فيه بس اسأل عن الاسعار قبل
• فيه ناس لابسين فرعوني اذا عطيتهم اسمك وتاريخ ميلادك يكتبون اسمك بالفرعوني ويحللون شخصيتك بالكمبيوتر بسعر 10 جنيه – بتتفاجأ بمدى صحة التحليل
• بعد ماتخلص تقدر تطلع لأعلى البرج بالدرج وتشوف القاهره كلها

5- مطعم ابو رامي:

موجود في السيده زينب ويفتح الى الفجر ومع انه المكان قديم وشعبي الا انه الأكل فيه من كباب وريش وكفته وغيره لذيذ جدا والكثير من الخليجيين والاغنياء والممثلين ياكلون فيه (مع انه صراحة يوم اكلنا فيه ماشفنا الا الطل- احلى واحد موجود السواق اللي عمره 20 برا) -ً سعر الكيلو 60جنيه – بعد ماتخلص اشرب لك شاهي على مزاجك- ترى المكان من جد قديم وماهو اد كده لكن الأكل ممتاز جدا جدا
6- شارع جامعة الدول العربيه: شارع مشهور وبتلقى كثير من الخليجيين فيه على القهاوي والمطاعم الكثيره اللي عليه من مطاعم الفول والكشري لمطاعم المندي ولاتنسى عصيرات فرغلي واحنا معظم الأوقات نمر على هالشارع في الليل

7- -قلعة صلاح الدين الأيوبي:

موجودة في المقطم لكن اذا ماعندك لياقه لاتروح ابد لأنها كلها مشي واحنا تعبنا كثير وتحتاج حوالي اربع ساعات ويالله تخلصها- اذا بغيت تقدر تروح لها لمدة ساعه بدل 5 وتشوف القلعه وتصور عندها وتشوف الاثار وتنزل ماتكمل الجوله- (اذا نويت لازم تجي بدري يعني حوالي الساعه 8-9 صباحا وتاخذ معاك غرشة ماء)
8- كورنيش المقطم:
فيه كازينوهات فوق الجبل تطل على القاهره والمنظر يجنن خاصة في الليل والجو البارد – تاكل وتشرب وباسعار معقوله والمنظر يجنن من فوق الجبل وانت تشوف القاهره كلها تحتك والجو بارد
9- شارع قصر النيل وشارع طلعت حرب: وفيه محلات كثيره وبضائع مختلفه وخاصة النسائيه وباسعار مناسبه – تقدر تشتري الهدايا لأقاربك من هناواذا تبغى كتب فيه مكتبه مشهوره (مكتبة الشروق)- التسوق حلو هنا
10- كوبري قصر النيل وكوبري 6 اكتوبر اذا تحب تتمشى وتبصبص وتشتري ورد وفل يافل(بعد الساعة 12يصير مليان فل من الخليجيين :m9: والمصريين وجميع الاصناف والاشكال)

11- رحلات النيل:

• اجملها فرعون النيل وسعرها يصل الي 170 جنية للشخص مع غداء او عشاء بوفية وفيه فقرات ترفيهيه
• نصيحه اذا معك اهلك لاتقعد قريب الستاج/ البست وخذ طاوله بعيده- لانه كل عيون الناس على هالمنطقه والمصوريين طايحين تصوير

وفيه يخت كريستال النيل وفيه نفس الفقرات اللي في فرعون النيل بمستوى اقل لكن مقبول

12- مراكز التسوق:

• اجملها واحدثها سيتي ستارز وفيه 14 دار للسينما وفندق انتركونتيننتال لكن محلات لك عليها ما ارتحنا من نوعية البضاعه والاسعاروتعبنا وحنا نمشي
• جنينية مول بمدينة نصرشارع عباس العقاد- فيه 8 دور سينما والمحلات الله بالخير والناس اشكالها محترمه-
• سيتي سنتر بمدينة نصر حلو ونظيف ونوعية الناس محترمه–

اركيديا بكورنيش النيل - فيه مدينة ألعاب وعدد كبير من المطاعم وهو راقي وقريب جداً من النيل ولكن مافيه الا سينما قديمه وصغيره وبضائعه متنوعه وبأسعار معقوله وهو كبير الحجم في روض الفرج- كورنيش النيل واقرب الفنادق اليه كونراد –

• مركز التجارة العالمي وسوق النيل هيلتون امام هيلتون رمسيس – فيه مجمعات ثانيه لكنها غاليه جدا مثل مجمع جاردينا ومجمع فيرست مول وهو مركز تجاري فخم ويعتبرسوق فندق فور سيزونز أفخم فندق في مصر- مركز هيلتون رمسيس التجاري يشتهر بين السواح وبالذات الخليجيين.فيه مسرح في الدورالسابع وصالتين للسينما ومطعم ماكدونالدز قريب من السينما وصاله بلياردو راقيه ورخيصه- محل عمر افندي كبير ومناسب خصوصا لشراء المنتجات القطنية مثل الملابس الداخلية والمناشف وغيره. وسط البلد ومنطقة العتبة لمن يبحثون عن كثرة المحال ورخص الاسعار , شارع قصر النيل للمنتوجات الجلدية وانصح الراغبين بشراء احذية زيارة معرض اسمة سمراء بشارع جامعة الدول وهو في رايي افضل المحال

13- ملاهي دريم لاند:

مدينة ترفيهية وبها ألعاب حلوه ويبغالها يوم كامل وفيه مكان للتصوير بالملابس الفرعونية ( الصوره ب50 جنيه - بالنسبه لتذكرة الدخول – اشتر تذكرة ال (vip) تلعب الين تتعب- فيه ملاهي ثانيه مكيفة وجميلة بمركز اركيديا للتسوق اذا مابغيت تبعد لكن ماهي كبيره

14- مدينة الانتاج الاعلامي:

مدينة ترفيهية فيها جولات داخل مناطق التصوير والمباني القديمة والقرية الريفية ومعظم الأفلام والأغاني تصور هناك وممكن تلتقي بالفنانين وتصور معاهم (اسأل بكم قبل ماتصور) - التذاكر ب 40 جنيه وفيه مدينة العاب صغيره وتاريخ الديناصورات
15- القناطر الخيرية : مارحنا لها
16- كريزي ووتر بطريق الاسماعيلية الصحراوي

• مسابح مع جلسات وأكل مع السباحة-

أكوا بارك وهما مدينتا للألعاب المائية وفيهما مسبح بالأمواج وزحالايق مائية
17- ميريلاند الترفيهية بمصر الجديدة تشمل العاب معدودة وحديقة وقوارب للتجديف تدفع رسم حوالي 60 جنية يشمل وجبة عشاء

المطاعم

المطاعم اللي اكلنا فيه وزرناها:

• مطعم كاستن للأكلات البحريه- مدينة نصر- مكرم عبيد- هذا مطعم للاعب قديم مشهور في مصر- تلقى صور معلقه في المطعم للاعبين- ممثلين- ناس مشهوره جات للمطعم – الأكل والنظافه ممتازه جدا- الأسعار وسط. انصح بزيارته –اكلنا الين قلنا بس يمكن اكل عشرين شخص
• مطعم القرية النوبية– خلف القراند حياة وحجزنا عشاء فيه ل 14 شخص وكانت جلسه جنان- تتميز القرية النوبية بجو خصوصي تستمتع به أنت واسرتك وبالجو الشرقي الذي يتضمن تقديم الاكلات المصرية واللبنانية وحريم ثنتين يسوون الخبز قدامك – الاسعار وسط الى مرتفع لكن المشكله يسكر بدري الساعه وحده في الليل
• ابو شقره يوجد في اماكن كثيره في القاهره – رحنا لفرع شارع قصر العيني –فيه جميع انواع المشويات والاكلات المصرية وخدمه وسط – اكل ممتاز ونظيف
• وفرع أبو شقره بشارع جامعة الدول العربية – عندهم شاورما دجاج جنان
• العمدة سندوتشات الفول والطعميه- والكشري وغيرها.
• عصيرات فرغلي في شارع جامعة الدول العربية.
• مطعم كبابجي العربي فيه حمام محشي روعة وطمطم بالثوم في الدقي شارع الملك فيصل
• مطعم فلفله في ميدان التحرير.وطلعت حرب
• نعمة مطعم حلو واسعار مناسبه واكل نظيف واشكال الله بالخير
• مطعم الباشا: سفينه او باخره ثابته وفيها عدة مطاعم الأكل ممتاز والاسعار مناسبه ومعظم الطاولات بالحجز.
• مطعم ابو رامي في السيده زينب واحسن وقت بعد منتصف الليل

نصائح وملاحظات:-

• اذا وصلت للفندق في اول يوم او ثاني يوم خلهم يهتمون بحجوزاتك للعوده – عطهم التذاكر وخلهم يسوون لك اللي تبي- الخدمه بحوالي 30 جنيه (تقريبا 20 ريال- يابلاش)
• فيه شئ يسوونه الناس كثير الغني والفقير منهم فلا تستغرب– (بعد مايخلصون اكل في المطعم وبقى اكل يطلبون من الجرسون يلفه بكيس وياخذونه معاهم- بعدين يعطون الأكل للمحتاجين او يودونه لاهلهم- ياليتنا نسوي كذا- الواحد يقوم ونص الطاوله مليانه اكل وهو عارف انها بتنرمي)
• بعض الاماكن السياحيه ونقاط التفتيش يطلبون منك اثبات – الافضل لك تعمل صوره للجواز وتخليها معاك وتحط جوازك في الأمانات في الفندق
• اذا طلعت شريحه مصريه استفيد من الاستعلامات – فيها معلومات كثيره تفيدك عناوين مطاعم-فنادق- اسواق – سينما- مسرح ....اي شئ
• معظم الفنادق عندها ديسك المعلومات او في الريسبشون ممكن يفيدك زي الاستعلامات عن الحجوزات وغيرها لكن ببلاش
• قبل لاتروح لرحله في النيل تأكد من الوقت واحجز قبل- الكثير من الاوقات يقولون المركب فل او الرحله طلعت- احجز قبل ماتروح
• اذا ركبت مع تاكسي اسأله عن جملة "اللي يحب النبي يضرب" اذا هو حق فرفشه بيضحكك الين تقول بس- اذا هو نكدي بيرد رد بارد عليك- هذا الإختبار جربناه مع اكثر من سواق وصراحة نجح. كل واحد فسرها بطريقته واسلوبه.
• اذا ماتعرف تتكلم باللهجه المصريه انصحك تلتزم بلهجتك لأنه بتطلع كلمات مختلطه غريبه وبتضحك عليك الناس- واحد من اخويانا: " احنا مضيعين و"مندلش" بالله عليكم وشي ماندلش اخذ كلمة ماندل واضاف "ش" وقال اتكلم مصري.

مع اجمل تحياتي وامنياتي لكم بقضاء وقت ممتع وجميل في أم الدنيا وسامحونا على الإطالة – ولا تحرمونا من نصايحكم ونقدكم البناء
F.Traveler
June 2005