اتوقع اني غلطت وحطيته في ماليزيا وكان مفروض اني احطه في دول اسيويه اخرى
اسفه ع الغلط ياليت احد من الاداره ينقله او يتركه اذا ما رح يسبب حوسه

يا عاالم ليه ما احد يرد ما خبرتكم كذاا

1. للمعلوميه


2. نجي هالحين لجدول الرحله

حياكي الله ياجيداء

للمعلوميه

عشر ايام كفيله بنجاح رحله غير مرتبة الجدول مسبقاً ........ كلامي واضح ؟؟ يعني وسعي صدرك ولاتنقلي هم
اول شي راح انصح به هو إنك توزعين الايام على فندقين وتكون بدايتك في شارع اورشاد وعندك احد خيارين السكن في فندق الماريوت او قراند حيات ... كلا الفندقين اسعارهم لاتقل عن 1100 ريال لكل ليله ..... المنطقه الثانيه راح تكون في المارين وعندك فندق سوستن ستامفورم والباسفيك او الرايتز ... السكن في المارين يجب أن يكون على اطلاله وإلا ماراح يكون له أي قيمه
هناك منطقه ثالثه وهي جزيرة سنتوسه وبحكم إنكم بتجلسون 10 ايام انا ارشح السكن به بقوه على الرغم إني لم اجربه ولكني جربت السكن في المنطقتين السابقتين وكانت روعه

نجي هالحين لجدول الرحله

منطقة المارين جميع الاماكن قريبه لها مقارنه في شارع اورشاد لكن مايميز شارع اورشاد إنه تمشيه بحد ذاتها في جميع الاوقات ... ستجدين به حياه مستمره
اخالفك الراي وبقوه في وضع زيارة حديقة الحيوان وسفاري بيوم واحد ..... راح تكرهون عمركم .... تخيلي يوم كامل على مشاهدة حيوانات ...... ممل صح ؟ ...... مع العلم إن حديقة الحيون مكانها بعيد شوي عن مركز المدينه
اليوم الأول .... يوم الوصول ... خليه في اورشاد .... الشارع مليان مجمعات واحدثها المجمع المقابل لفندق الماريوت .... راح يكون ممتع الشارع إذا كان يوافق يوم اجازه .... هناك على نفس الشارع يوجد مطعم برقر كنق حلال ..... الشي الاخير هناك نفق يربط الشاوارع ببعضها بشكل مختصر وهو امام فندق الماريوت .... يوجد مكتب سياحي في الماريوت وفي الاحرى في كل فندق ... هذا المكتب يوفر رحلات سياحيه .... احجزو من عنده رحلة اليخت الصيني فتره صباحيه ولا يخطر في بالكم الحجز لرحلة مسائيه لانها ستفقد جمال مشاهدة المدينه في وضح النهار ........... واكبر دليل منضر البحر دايم ممتع مع الشمس وليس في الليل .... يوجد على نفس شارع اورشاد مكتب سياحي مشهور اسمه singapore visit على نفس امتداد شارع الماريوت ( تقدرون تروحون له مشي لكنه مسافته شوي بعيد )
اليوم الثاني تصحون بدري وتفطرون بالفندق وبعدها راح يمر باص وياخذكم الى مقر اليخت ( الساعه 10 الصباح ) مدة الرحلة اتوقع ساعتين ........... بعدها تتغدون ( لكم الخيار ) وترتاحون شوي ثم تروحون الى السفاري ( يفضل حجز مسبق من نفس الفندق ) وقتها اتوقع بعد المغرب ويمكن يوفرون لكم النقل ذهاب واياب الى الفندق .... ثم تتعشون
اليوم الثالث زيارة الحي العربي مع مسجد سلطان .... يجاوره الحي الهندي ومايسوى ريال ولا تضيعون وقتكم به .... ميزة الحي العربي هو زيارة المسجد والتصوير في المنطقه المجاوره .... يوجد في نفس المنطقه مجمع شعبي من خمس ادوار يسمونه مصطفى مول .... هناك ستجدين البضاعه رخيصه وستجدين اغلب انواع المعلبات التي تباع في السعوديه ... يصلح السوق للهدايا والتحف التذكاريه ..... ارجعو للفندق وتغدوا وارتاحو ...... ثم توجه والى سوق فيفو سيتي ... واقضوا فترة العصريه هناك
اليوم الرابع ... بعد الصحوه والفطور توجهوا الى عجلة سنغفورا في منطقة المارين اسمها سنقافور فلاي .... تذكرتها للشخص على حد علمي ب 70 ريال .... بعدها روح والى ساينتك ستي واحجزوا رحلة البطه البرمائيه .... بعدها الفندق وغدى .... في العصر روحوا الى حديقة الطيور بس يبيلكم تروحون بدري على اساس تمكنون العروض
اليوم الخامس انتقلوا الى فندق في المارين إذا لكم رغبه وبعد الغدى روحوا الى منطقة المينا وهي منطقتين يسمونها كلاركي و بوتكي ... منطقة مطاعم وملاهي ليليه .... لاتجلسون فيها عقب المغرب راح تشوفون شي مايناسبكم ..... للمعلوميه كلا المنطقتين فيها مطاعم عربيه ..... يوفرون هناك رحلات يخوت تمشي بسرعه خفيفه قد تكون تجربه ممتعه .... بعدها الى الفندق وعشاء ونوم
اليوم السادس زوروا حديقة الحيوان .... فيها عروض حلوه مجدوله .... بعدها غدى ومن ثم الذهاب الى الحي الصيني وبعده الى تمثال الاسد ( منطقة تصوير احسن وقت لها العصر ) بعدين عشاء وفندق
اليوم السابع راحه او روحوا الى منطقه بها لعبة التزلج على الماء ... ليس عندي لها تفاصيل ... او روحوا للحي الهولندي ... حي عباره عن شارع ... قد يكون عادي ... او خوذوا رحله على المدينه بالقطار ... رخيصه
اليوم الثامن والتاسع في جزيرة سنتوسه .... فيها
شواطي راقيه
عرض الدلافين .... عادي
عرض ثري دي ممتع ممتع بالحيل
عرض فور دي ... بايخ ماله داعي
عرض النوافير الراقصه حلو
عرض سونق اوف سي .... اكثر من رائع ... يمكن خانتني الذاكره في اسم العرض
حديقة الاسماك .... تجربه حلوه
برج سنتوسه .... على شكل صحن دوار كهرائي.
برج سنتوسه ... على شكل تمثال الاسد حقهم
التلفريك
الكراسي المعلقه ... داخل الجزيره ... زي الكراسي المتحركه نفس نضام التلفريك في المناطق الثلجيه
مدينة اليونيفيرسل ... اكثر من رائعه .... فيها ملاهي وعروض ممتعه
التمشي في ارجاء المدينه ممتع بحد ذاته
اليوم العاشر .... على التلفزيون ههه
تحياتي
مسافر ماسافر

مشككور اخوي ويعطييك الف الف عاافيه بس عندي كم سؤال زياده
بالنسبه لليوم الثالث اذا رحنا لفيفو انا قريت ان محلات الاسواق تسكر 5 في ايم غير الاجازه ؟؟؟ كيف يمدينا نلحق عليه ؟؟ او اخليه يوم اجازه لحاله احسن ؟؟
وانا اهم شي عندي ابي شاطئ للباراشوت والنشاطات البحريه والسباحه
وبالنسبه للفندق احنا حجزنا وخلصنا للأسف والا كنت سمعت بنصيحتك
وشكرا والله يسعدكك

ع التلفزيون يعني اجلس في الاوتيل قصدك ؟؟ ههه لا بحلل كل يوم انا

اهلين اختي000تروحون وترجعون بالسلامه
ماشاء الله الاخ مسافر ماسافر كفى ووفى000
بس حبيت اضيف انه فيفو ستي مول كبير وحلو وكل شيء فيه ويطلع رحله بالقطار المعلق الى جزيره سنتوزا
وبصراحه يوم ازوره طلعنا على الساعه 5 وماشفت محلات سكرت00بس مو متذكره اي يوم
فيه بالدور الارضي مطعم هندي ناسيه وش اسمه--نظامه بوفيه- صح انه تنوعه قليل بس سعره معقول واكله حلو
رحله موفقه

يعطييك العافيه مشكوره وان شاء الله بخليه بيوم يكون اجازه ولو امداني رحت له ثانيه اخر يوم
شكرا ع الردود

ايش التزلج ع الماء ؟؟ وما اقدر اخلي اول يوم في الاورشاد لان اول يوم بنوصل ع الظهر و الاورشاد فيه مولات يعني حق مقاضي
ايش افضل مكان اتمشى فيه اول يوم تمشي فقط

الاورشاد شارع طويل يمكن 8 كيلو--هذا على كلام التاكسي
فيه مولات ومطاعم وقهاوي وفيه زي الكشكات وبتلقينه مليان ناس
انتم اول ماتوصلون بتريحون بالفندق لانه الرحله طويله وبتكونون تعبانين--ريحوا لكم ساعتين وبعدين اطلعوا على شارع اورتشاد تمشوا وانبسطوا وتعشوا--ولين خلصتوا روحوا لمصطفى مول بالحي الهندي لانه مايسكراتوقع 24 ساعه
وخذوا الاشياء اللي ناقصتكم000احنا احتجنا فيش عشان شاحن الجوال لان افياشهم مو زي افياشنا
وفيه معلومه ما ادري اذا تعرفونها او لا انه اذا بغيتي تاكسي لازم تتصلين من الارقام اللي موجوده عند موقف التاكسي وتعطينهم الاسم ويرسلونه لك بسرعه--يعني ولا خمس دقايق الا هو عندك
احنا مادرينا وتعبنا نبغى تاكسي وكل ماجينا نركم يسالنا عن الاسم ولين قلنا له اعتذر قال انه ينتضر ناس