في ما نيلا اسكن في منطقة مكاتي عن طريق موقع بوكينج تجد جميع الخيارات اللي في بالك والمنطقه حيويه وكل شي حولك واجعل اول ليلتين فيها
ثم من 4 الى 5 ليالي جزيرة بوركاي كافيه ,, و ستجد في منطقة مكاتي مكاتب سياحية كثيره جدا ,, ممكن هم ينسقون لك باكيج خطوط طيران وبوت وسكن في بوركاي حسب متطلباتك الاقتصاديه والترفيهية
ثم ارجعو آخر 3 ليالي تسوق في ما نيلا وتجربة المطاعم والجزر القريبة من ما نيلا اللي ممكن تطلع لها نص يوم وترجع
هذا اللي اقدر افيدك فيه وبالتوفيق في رحلتكم

اشكرك اخوي وليد على ردك الطيب ولكن قريت بعض المواضيع الحجز السكن من هناك ارخص بحجز اول ليلتين من البوكينق وعندي استفسارات الشركات السياحية ارخص ولا احجز من نفس الفنادق احسن وبعدين في برنامج اماكن اروح لها معينه
سياحية اقصد ولكم جزيل الشكر

اخى روما السلام عليكم الله يسهل لكم و ترجعو با السلامه
عندى لك اقتراح اذا معك عائله اشوف بوراكاى مزعجه لكم اولا هى عباره عن شاطى ما يتعدى 10 كيلو متر و فيه مناظر خادشه للحياء اعتقد ما رايح تنبسطو
الاقتراح بدل من بوراكاى الى مدينه سيبو فيها شواطى فى جزيره مكتان و منتجعات 3 ايام بعده تاخذ السوبر كات عباره سريعه الى جزيره بهول فيها منتجعات رئعه و اقل زحمه و ممكن تحضى بشى من الخصوصيه
فيه تقارير كاتبها الخبير العاطل مر عليها
سفره موفقه

اشكرك حبيبي الفارس على اقتراحك وانتظر باقي الاقتراحات واشكر فعلا تعاونكم الراقي

وعليكم السلام ورحمه الله وبركاته
شوف انا من اكثر الناس اقتصادا بالسفر
وان شاء الله ناوي اسافر للفلبين شهر 6 وحجزت وخلصت كل شيء
طبعا قعدتي بمانيلا بتكون عند صديق عشان جذي ما حجزت فندق فيها
لكن انا متوجه لسيبو وبوهول وتقريبا طلعت علي الليله بكل الفنادق بحدود 16 دينار الى 20 دينار كويتي ( تقريبا 250 ريال سعودي )
والطيران الداخلي من مانيلا لسيبو حجزته عن طريق سيبو باسيفيك تقريبا 11 دينار للشخص ونفس الشيء من بوهول لمانيلا
اما من سيبو لبوهول تاخذ السوبر كات تقريبا 5 دنانير للشخص وساعتين بالبحر
اما بخصوص الجدول في ناس يقولون ان بوراكاي زحمه ودوخه ومن هالحجي فمادري انت شنو رايك فيها
على العموم انا بعطيك جدولين تختار منهم الي تبيه
1 - مانيلا يومين / بوراكاي 5 ايام / سيبو 5 ايام / مانيلا 3 ايام
2 - مانيلا يومين / سيبو 5 ايام / بوهول 4 ايام / مانيلا 4 ايام
وانت لك حق الاختيار والتعديل وانا بالخدمه

ان شاء الله ذاهب لها بعد شهر بالضبط اي 30 يوم ومانيلا وبوركاي غيره ما اروح لان شباب وانا اشوف بوركاي وبالي في اندونسيا لا تصلح عوائل لان فيها مناظر تخدش الحياء