- ما بقي في الذاكرة , متفرقات :
كل عام و انتم بخير جميعآ ,, رحت و رجعت ! طازة ! الوصول قبل امس ,, من 24 اكتوبر الى 09 نوفمبر ,, لحقت العيدين , هنا و هناك , فله يا حسام .
ما بقي في الذاكرة , متفرقات :
الخطوط المغربيه : ميزة الخطوط المغربية انها تطلع on time في الغالب حتى في رحلاتها الداخليه, بس عيبها اوقاتها قشرا , تروح و الناس نايمه و ترجع و الناس نايمه , يعني ما فيه بصيص امل ان احد يطلع لك المطار الساعه 5 الصبح.
- تبقى مشكلة المويه على الخطوط المغربيه معضله , اكره شي على المضيفات انك تطلب مويه و ممكن توصل كازا ما و صلت المويه . لدرجة ان واحد من الركاب بعد اكثر من محاولة سأل المضيفه : كم حق المويه ؟ قالت ليش ؟ قال اذا كان عشان المويه ببلاش نتمرمط بهالشكل بندفع حقها و صافي ! انحرجت المضيفه و دقيقه و المويه حاضره.
- يتم توزيع الوجبات و بعدها بنص ساعه تقدم المشروبات يعني ممكن تغص و تموت :frown: . و كتبت في ورقة الاقتراحات اللي يتم توزيعها للي يحب يعطي ملاحظاته ان يتم توزيع المشروبات مع الاكل زي باقي خطوط الطيران.
المطارات : الحق يقال , الزياره هاذي بالذات ما صادفت اي نوع من انواع التلميح بالبخشيش لا من الجوازات ولا من الجمارك في مطار كازا و اغادير .
- التفتيش كان صارم في مطار اغادير في العوده لدرجة ان الضابط طلع الاغراض اللي في الشنطه كلها و حتى باكيت الدخان فتحوه يدورون داخله, طبعأ بعضكم بيقول هذا تلميح بالبخشيش بس الرجال كان جدي و لا جات عيني في عينه حتى , فيه مصطلحات معينه و لغة جسد للتلميح بهالامور اعرفها زين من خلال زياراتي السابقة, طبعا من حقه يفتش , بعد ما خلص لميت اغراضي و رحت للجوازات و قعدت اتابع نفس الضابط اذا كان بيفتش الناس اللي وراي بنفس الطريقه , بس ما فتش احد ! ( كلهم اوروبيين أوادم ) . رحت الحمام و قعدت اطالع المرايه و اقول في نفسي ( معذور الضابط , وجهك وجه حرامي ).
مراكش : وصلت يوم 24 و اليوم الثاني امطرت طول اليوم :rain: و انا في البلكونه اتأمل البيوت و الشوارع تنغسل, من احلى الدقايق اللي مرت علي في مراكش, كانت موجة امطار على مدن ثانيه في المغرب, تأثرت فيها الصويرة اذا متابعين الاخبار.
- فيه مطعم في مراكش اسمه اعتقد الكونتوار كلاس كلاس و يستاهل الزياره , و هاذي من الامور اللي تميز مراكش وجود عدد كبير من المطاعم الفخمه تقدم كوزينات مختلفه و ديكوراتها اروع من ان توصف.
أغادير : جو متقلب و يلخبط المخ , يعني ما تعرف و انت طالع تلبس خفيف والا ثقيل ! اطلع راسي من الدريشه اشيك الجو القى حر , البس خفيف و اطلع القى برد ! , و العكس بالعكس.
- كان فيه حفل التسامح على الشاطئ جنب مارينا اغادير مقابل مطعم العراقي يوم 4 نوفمبر احياه عدد كبير من فنانيين المغرب العربي و اخرين غربيين و اسماء عالميه مشهوره, الحفل كان مجاني, حسب ما قرأت في الجريده ان الحضور كانو تقريبآ 100000 ( و العهده على الجريده ) و اللي شاف الاعداد المهوله اللي كانت على الساحل في ذاك اليوم بيصدق الرقم, لأن الباصات كانت تجي من خارج اغادير بالكوم, الشوارع على البحر اتسكرت من قبل الحفله من الأمن و كانت الناس توقف سياراتها في الشوارع الخلفيه و يروحون مشي, ألوف مألفه من البشر.
- يوم من الايام طلعت بالسياره بالليل ولاحظت ان في كل 100 متر تلقى 2 عسكر على الشوارع الرئيسية, و بعد ما رجعت الشقه شفت في الاخبار ان الملك محمد السادس موجود في اغادير و فهمت ليش الأمن محيح ! .
- عندي واحد المشكل مع لوحة STOP في الشوارع ما انتبه لها دايمآ و صادني واحد شرطي ووقفني و قال ( عليك واحد المخالفه من الطبقه الرابعه ديال عدم الوقوف عند لوحة STOP و قيمتها 400 درهم ) قلت له OK , اعطيني مخالفه , شفت الرجال تأخر علي , شوي يطلع الدفتر و شوي يرجعه , قلت له بتعطيني مخالفه والا وش الدبره ؟ قال اللي بغيت , قلت له بأعطيك 100 درهم و بلاها المخالفه , قال واخا , دورت في جيبي لقيت كل الفلوس اللي معي فئة 200 درهم, قلت له ما عندي الا فئة 200 و عطيته وحده, قام و حطها في الشنطه الصغيره اللي معه حاط فيها دفتر المخالفات و قلب فيها شوي و طلع 100 درهم و عطاني اياها , يعني رجع لي الباقي ( صرف بخشيش! ).
- عندي مشكله ثانيه مع المرور و هي اني طويل و لما اكون في السياره واقف عند اشاره ما ادري اذا صارت خضرا والا لأ لأني ما اقدر اشوفها ( حظكم يالقصار ) , اعتمد على السيارات اللي وراي اذا عطوني بوري مشيت ( كلكس بالمصري), لسوء الحظ ما كان وراي ولا سياره و الاشاره فتحت خضرا وانا واقف , و اشوف الشرطي يأشر لي بيده يقول تعال و يصفر بالصفاره, قلت بس, اكيد مسوي مصيبه , جيت عنده في الدوار و فتحت الدريشه ( الشرجم ) , طالع فيني و قال ( كايبان ليا ما كتعرفش تسوق ! ) , وانا اطالع فيه فاتح فمي و ساكت , قال ( هادا اللي نشوف , كايبان ليا ما كتعرفش تسوق ) , وانا اطالع فيه فاتح فمي و ساكت :shocking: , طالع فيني شوي و لسان حاله يقول وش ذا السبهه ! قال سير سير , هو قالها والا ما قالها وانا ادزها في الواحد و اقحص ذيك التقحيصه يسمع صوتها اللي في الرباط , الهروب العظيم.
- تعشيت في احد المقاهي على البحر و ما انتبهت للأسعار في المينيو, ولما طلبت الفاتوره جابها لي مكتوبه بخط يد و حسيت ان المبلغ مش طبيعي :36_13_3: , بس استحيت اقول للجرسون جيب المينيو اطابق الاسعار خفت يطلع صادق و انحرج اني شكيت فيه, المهم, المكان حلو بصراحه و اكلهم زين, يوم ثاني جيت نفس المقهى و طلبت عصير برتقال و قلت له اعطيني المينيو عشان اشوف اذا عجبني شي ثاني اخذه, انا في بالي اقارن الاسعار اللي شفتها في الفاتورة حقت امس, اللي حصل ان اللي يخدم علي واحد ثاني غير حق امس و لما شافني الاول جاني عشان هو يخدم علي , وقتها حسيت الموضوع فيه لعبه :36_1_12: , ليش كل ما يشوفني لازم هو اللي يخدم علي حتى لو كان غيره اخذ مني الطلبات, جاب المينيو و لقيت الاسعار حقت عشا امش كلها مدبله عن الاسعار الرسميه, و اناديه , قلت له امس تعشيت هنا و جبت لي فاتورة بأسعار غير اللي في المينيو, قال لا انا ! قلت استح على وجهك هاذي يسمونها سرقه و عيب عليك اللي تسويه , اخر شي افكر فيه الفلوس و مستعد اعطيك اياها دبل بس انك تستغفلني بهالشكل كل ما شفتني على طاوله تجي وراي كأنك متوصي فيني و في الاخر تلعب في الفواتير, لعلمك المكان هذا من احب الاماكن بس والله ما عاد اطبه بعد اليوم طول ما انت فيه , طبعا الناس تسمع الحوار و انا ما كرهت يعرفون انه نصاب :36_1_3: , المشكله انك تشوف اللي يشتغلون في المطعم يتبادلون اشارات معينه على بعض الزباين من جنسيات معينه ( :m9: ) يعني النصاب هذا يتفق مع اللي يخدم علي انه انا بأخدم عليه و اطلع منه و بأعطيك نصيبك بس خله لي !!! , قلت له كم حساب العصير ؟ قال 12 درهم ( و شكله مزود بعد ! ) , و ادور في جيبي على فكه عشان احط له 12 بالضبط و ما لقيت, فيه واحد جنب المقهى يبيع قليه ( بوب كورن) قلت بأروح اخذ من عنده قليه عشان احصل فكه و احاسب النصاب و لا اخلي له ولا درهم زياده( اللي قاهرني يوم نصب علي النصبه الاولى معطيه بخشيش فوقها , يعني سارقني و اكرمه !! ) , سألت اللي يبيع القليه بكم قال 2 درهم و أعطيه فلوسه و عطاني فكه و ارجع المقهى و احطها على الطاوله و اطلع. عاد بعدها قعدت اسولف لواحد مغربي صاحبي عن السالفه قال اصلآ القليه بدرهم واحد بس ! قلت إلعب له , و هذا واحد ثاني !!!.:baaa2:
- السفره هاذي كانت سفرة الحلويات , أكلت سليلو و محنشة و فقاص ( أتحداكم تعرفونها ), امزح طبعا اكيد فيه منكم هوامير مغرب , غير الاخوان المغاربه اكيد يعرفونها .
- اللي ما اكل سوسيس دو فوا ( سجق كبدة بالحار ) حياته من العدم .
تحياتي , avocado
..