1. بينغ


2. وبجنبه محل القهوه

وصلنا بينج على اير اسيا بالتوقيت وبالدقيقه ولله الحمد بالطبع بداخل الطياره تدفع عشان تشرب لو مويه او كوفي والمسافه قصيره ماحتجنا وهالمره اخذت تاكسي من المطار على فندق فلامنجو بالتسعيره الرسميه >>> مصدع ماهو فاضي للمكاسره والمفاوضات

بينغ

وصلنا لفندق بعد حقيقه مشوار طويل من المطار يبي لك تحسبه بالضبط عشان خط الرجعه تبكر ماتتاخر عن رحلتك والجو كان ولا اروع مطر خيال
الفندق حقيقه تفاجات فيه وهالشئ طبيعي لما قارنته بفدق السن واي بسلامجنور يعني اقل منه وبوضح والاثاث عادي فيه وخدمات الغرف برضه عاديه واالمطعم الي فيه غالي واكله جيد المسبح روعه والافطار حقهم راائع ايضا والشاطئ اروع ولك الخيار تفطر بعدها تجلس على المسبح تشم الهواء بعدها تتمشى على الشاطئ وفيه بالطبع البرامج مثل البراشوت يسحبك القارب وانت ورغبتك في البحث عن الانشطه
الفندق اعطيه 8 من عشره وخدمات الغرف ايضا 8 واثاثهم عادي نوعا ما والانترت مجاني بالغرفه
البرنامج
حديقه الفراشات لا باس بها حلوه ومعلومات روعه ومكان يستحق الزياره
محل للشوكلاته راائع ايضا بالقطاره تذوق بس حلو عندهم عروض راائعه
وبجنبه محل العسل

وبجنبه محل القهوه

بالطبع لا احد ينحرج يقول ذقت لازم اشتري المدام ضغطت علي اشتري مجامله ولا شريت ولا عود ولا كسره الا من محل الشكولاتاات وكان عندهم عرض حلو لمجموعه من الشكولاته
رجعنا بعدها للفندق ماكان فيه وقت ناخذ جوله على حديقه الفواكه ونسيت رحنا للهضبه هضبة بينج مكان روعه وبالقطار يعني لاهو قطار ولا هو ترفليك روعه طلعنا لها وجلسنا حوالي نصف ساعه وطنقرت المدام علي زعلت عشان تخاف من الاماكن المرتفعه بس الحمدلله انبسطت كل هالجوله بالطبع كان من ضمنها حديقه الفواكه 120 ريجنت سياره بتاكسي وفخمه مكيفه من الفندق وسائق قمه بالاحترام بالطبع تذاكر حديقه الفراشات 27 ريجنت والهضبه 30 للشخص الواحد والباقي اكيد مجانيه محل القهوه والشوكلاته والعسل ياعسولين
بعد راحه قصيره العصريه رحت لمطعم هندي ذكره احد االاخوان مقابل الفندق بالطبع اكل شعبي بس حلو انا يعجبني برضه الاكل السبايسي الحار مقابل الفندق ومشي خطوتين بعدها بالغرفه لحد اليوم الثاني راحه .
بعدها العصريه على الشاطئ خيال والبرااشوت قمه بالمتعه يسحبك القارب وبعدها وز بالسماء عالي وروعه الاسعار ثابته ومحدده عندهم , الدبابات البحريه انا بصراحه ماطيقها عشان كذا منعتها , وبالصدفه للاسف تهور واحد وزوجته وطاحوا بس ربي ستر قاموا بالسلامه يعني ياليت الحذر خاصه لو كانوا اهلك معك استمتاع رائع لحد الغروب بعدها راحه نوم استعداد للسفر ل لانكاوي.
تم الذهاب بالصباح الباكر فطرنا بالفندق وسوينا اجراءت الخروج واخذت ال 200 رينجت هع هالميتين تتنقل من فندق لفندق ومدينه لمدينه التأمين ولا ننسى الايصال الأصلي نحتفظ فيه انا بالطبع قطعت التذاكر الخاصه بالعباره بالرياض , بس نشبت لهم تابعتهم لحد ماكلموا المكتب هناك وارسلوا فاكس بالتذاكر الخاصه فينا واخذت الصوره ولما وصلت استبدلتها بالاصليه الرحله كانت 8:15 وبعدها بربع ساعه رحله ثانيه ومن الموويهم الحضور شويات بدري عشان تحجز مقاعد لك متقاربه الرحله مدتها ثلاث ساعات حقيقه مزعجه نوعا ما بصوت المحرك بس مايمنع تجربتها روعه بالنسبه لي ووقفنا بعد ساعتين بجزيره نزلوا ركاب بعدها انطلقنا وكانت بالنسبه لي شخصيا راائعه هي مثل الصاله وفيها كراسي وتلفزيون عديم الفائده ومتعه الي له صبر معك اطفال عاقبهم قبلها بيوم من الاي بود بعدها فك العقاب بالعباره يتحمسون وينبسطون ويقضون وقتهم بهدوء >>> مجرد اقتراح ماجربته بس شفت اطفال كثير مشغولين فيه.

لانكاوي المسافه لحد فندق لوق اون لانكاوي حوالي 45 دقيقه بعيده المحطه شويات عن الفندق محطه وصولنا , السعر بكل صراحه مايحضرني تقريبا 25 ريجنت ووصلنا للفندق الساحر لوق اون لانكاوي اربع نجوم خدمه الغرفه عشره على عشراات روعه تعاون المكيف كان مايبرد على طول عطوني غرفه ثانيه بعد محاولات لصيانته الاثاث روعه الاستقبال بكل الفنادق حقيقه راائع دقائق بس قالوا لازم ننتظر لحد الساعه 3 العصر على بال ماتجهز الغرفه رحنا للمطعم ليالي الشام واخذنا شاهي ورجعنا يمكن نصف ساعه وكانت الغرفه جاهزه قبل موعدها. كان يوم راحه يوجد به شاطئ روعه رغم قصره الا اني اجد الخصوصيه فيه يعني تقدر تبعد شويات مسبحه راائع والطعم الافطار فيه خيالي ونظيف عشره على عشره وخدمات النت 25 ريجنت بالغرفه باللوبي مجاني. البرنامج البرنامج كان هالاقتراح حصلته بالموقع هنا وكان رائع حقيقه تتفق مع سائق التاكسي بالفندق على جوله اخذت جوله اربع ساعات ب 100 ريجنت للنهر والتقائه بالبحر وكهف الوطاويط وكذا موقع اختصرت الرحله النهريه لمده ساعه بعدها لميدان الصقر رائع ايضا حلوه الصور فيه التذكاريه والشلالات رائعه اختصرتها على شلال المدام مافيه لياقه ولحديقه الفواكه لا تفوتكم روعه خاصه مع المرشد عبدالقادر راائع بروحه الحلوه وتصويره البارع وخفه دمه الحديقه رائعه بس بالطبع هي لسعه الصدر اكثر من هي للمعلومات وتصلح للاطفال ايضا رائعه حاول قدر الامكان مع الاخ عبدالقادر قدم لنا اسواره وخاتمين من ورق الشجر رائعه ورمانسيه حيل والنعناع وتتذوق الفواكه وفيه رسوم ام حوالي والله اعلم ترا الذاكره شوويات 20 للشخص الواحد التلفريك راائع ع حسب قولتهم او بالاحرى وجدت احد الاخوان يمدح الموقع كثير للاسف تم استبعاده عشان بعض الناس خوافين انا والله كان لي رغبه بزيارته بس الشكوى لله لا للتسوق بلنكاوي الاستمتاع بالطبيعه بعدها اكلنا بالمطعم بجنب الفندق وراائع بس غالي شوويات مبالغ باسعاره نوعا ما بس اكله حلوو بعد الغداء ارتحنا قيلوله بعدها برنامج رائع رومانصي على الشاطئ والمسبح اخذت لي سااعه تقريبا فيه والغروب روعه وبعدها سلامتكم صلاه وراحه شويات والعشاء ونوم استعدار للمغاده عشان رحلتي للاسف كانت الساعه عشره صباحا لكولامبور وبالتوفيق للجميع

كولامبور وصلنا الحمدلله بتوقيت جيد حوالي 11 صباحا واخذت تاكسي رسمي من المطار بسعر تقريبا 74 ريجنت واتجهنا لفندق قراند ملينيوم فندق راقي ورائع وفيه بعض السلبيات راح اتطرق لها الاستقبال للاسف كان نوعا ما سئ انتظرت انا وزوجتي حوالي الساعتين ونصف لحد ماجهزت الغرفه وهذا الوقت مبالغ فيه وياليت هالانتظار كان نهايته حلوه واليكم الحكايه الغرفه للاسف سيئه الرائحه رغم فخامه الفندق ومشينا الحال لعل الوضع يضبط او تروح هالريحه وكان برضه في باب مشترك للغرفه المجاوره وتأكدت انه مقفل وحطت المعزبه اكبر شنطه عليه هع واخذت قسط من الراحه بس ماقتنعت بالغرفه وبعد ماصحيت رحت لهم وحاولت ووعدوني بغرفه اليوم الثاني واليوم الثاني صيانه وصبغ للغرفه الي بجنبي ولا بدلوا غرفتي والغرفه الجاهزه هي غرفه كل سرير بلحاله قلت له (مع نفسك) تخليني عزابي قالي اصبر وحاولت اخذ راحه نوم ولا قدرت بعدها لبست عرفت المعزبه انه فيه براسي هووشه ونزلت بكل برود المدير السوبرفايزر ليه قلت نادوه لي بس يوم جاء شرحت له الوضع بكل ادب وذوق رغم اني متوتر الغرفه والمبلغ دفعته من شهر وهذي نهايتها وشويات ينط على الاستقبال وز طلع لي غرفه وبدلوا غرفتي مع كلام حلو واسف منهم ورحت للغرفه راائعه وقمه لابعد حد حتى تكرمون الشطاف فيها لاني قريت البعض يقول مافيه شطاف بالفندق الانترنت غالي سعره وانا كنت احتاجه ماهو كثير لذا تم البحث عن بعض الشبكات المجانيه واستخدمتها افطار راائع مجاني وبهو ساحر خيالي وخدماتهم بعد الهوشات هع خدماتهم راائعه بكل امانه واثاث الغرفه روعه واطلاله حلوه بالغرفه الاولى كانت على الشارع العام بالدور 17 وروعه بس الخوافه الي معي ماحبت هالمنظر وبعدها نقزت للدور العاشر الخزنه متوفره وطاوله الكوي والخدمات الاساسيه بكل طلعه خارج الفندق اجيب زياده مويه وعصيرات الي بالغرفه اسعار خياليه خاصه لعشاق الشاهي تحتاج مويه للشرب واستخدامها للشاهي. موقف بس لا احد يضحك علي حبيت انهم ينظفون الغرفه واقلب الغرفه من اولها لاخرها عشان ادور عن الورقه الي تعلق باذانيها على الباب ماحصلتها ههه اثاري فيه عند المدخل بجنب الباب زر ترعصه تولع لوحه مربعه صغيره بخارج الغرفه عند الباب من الخارج نظف الغرفه او الخصوصيه وتوضح عند خدمات الغرف وسائل النقل قطار المونوريل : لله دره اخونا الي كتب عنه ووضح المحطات حقته وشرح وافي من اخونا اتوقع الوافي , انا جربته ببعض الدول بس المدام كانت متخوفه من الزحام واننا نضيع واقنعتها ولا ولا ولا يفووتكم روعه مميزته يوصل لاغلب النقاط الرئيسيه الاسواق الفنادق تذكرته رينجت ونصف وتذكره طالما انك بالقطار توصل بها لاخر محطه والاهم هو اختصار الوقت بدقائق وصلت من خلال الموضوع الي قرات عنه للسوق الصيني ولمواقع ثانيه التاكسي صح خصوصيه وتاخذ راحتك بس ممكن ترا اقول هالشئ عن تجربه ممكن تاخذ بالتاكسي ساعه وبالزحام بالقطار دقائق هالشئ هو الاهم ومن زود الفسقه هع صرنا نروح للسوق مرتين يعني اقسم التسوق على مرحلتين عشان ماطفش ولا امل ولا اشتري بسرعه بنهايه التسوق خاصه مثل ماقلت لكم الوسيله رائعه والحمدلله ماصادفني غير مره زحام بالداخل بس دبرت رووحي وجلست المعزبه بمكان حلو. اعرف المحطه الي ركبت منها اسمها والمحطه الي ترغب فيها وكن حريص تسال لو مالك خلق للخرائط عن عدد المحطات الي قبل محطتك النهائيه المطاعم كل انواع الاكل العربي والمطاعم والمقاهي متوفره بشارع العرب والبقالات والامن راائع ولله الحمد بيتزا هوت كنتاكي ماكدونالدز يعني بالنسبه للاكل مافيه مشاكل لمختلف الاذواق انتبه لعدم التبذير. التسوق جربت السوق الصيني عشان الهدايا وما ادراك ما الهدايا واحد الاخوات والاخوان نصائحهم كانت بمحلها من ناحيه تنوع السوق وروعته وعمليه طلب التخفيض من البائعه للاسف يرفعون الاسعار على العرب بس الله الله فيهم ماعليك منهم انا اتفقت مع المعزبه لما يعطينا سعر هي ترفع وانا اشووت يعني تقولي بحركه انها تبي هالشئ ولا نوضحه لهم ونمشي ويرجع يناديك ويقول حط سعرك وبعدها ابدا اشووت وبقوه ولا يهمك وبادب بالطبع بضاعته يملكها وفلوسك بجيبك اخصم باختصار 70% من السعر الي يقوله ولا يهمك بالمساء يعني العصر يمكن العروض اكثر عندهم تمنع دخول السيارات والباعه يزيدون باكشاشهم وعرض بضاعتهم الرجووع من السوق الصيني بنفس المحطه الي وصلت فيها كان يبي له مشي شوويات يعني الصبر حلو بس بعد ماوصلت دقايق وانا بالفندق وكان زحام نشوفه تحت بالسيارات فيه المولات والاسواق المركزيه بالطبع ماني بخيل بذكرها بس انا قلت على اهم سوق تسوقت منه وفيه بالطبع عندهم الماركات بكل انواعها بالمولات والاصليه لكن باسعار خياليه وفيه اسواق اخرى مارحت لها ذكروها الاخوان والاخوات الله يجزاهم خير يعني ممكن يرجع لها لو جربت اي سوق ثاني باذن الله بذكره وان شاء الله مانسى لاني اكتب هالسطور المتواضعه بالفندق عشان مانسى ولا نبخل باي معلومه نحاول ندونها بالنسبه للي عنده رغبه بطرح موضوع جربت سوق التايمز سكوير رائع وفخم ومكيف ومريح والاحلى ولا تعلمون احد هع هو تنزل من محطه المونوريل من الدرج على السوق على طول السياحه اخذت جوله برضه من احد نصائح الاخوه هنا بباص الهوهو محطته مقابله للفندق سعر التذكره للشخص البالغ 38 وياخذك ل 23 محطه حقيقه رائع ومتعب شوويات بس تقدر توقف باي محطه وتريح وتتقهوى وبنفس التذكره تركب الباص الثاني هي باصات متتابعه وميزتها توصلك لعماره التوأم البرح وتمر فيك بحديقه الطيور والفراشات وباماكن سياحيه يعني لو تحب تعمل جوله بحديقه الفراشات تاخذ هالباص وهناك لو بعد ساعتين تكمل رحلتك السياحيه بالباص وبدلوا لنا التذاكر لصلاحيه اكثر مدتها اربع وعشرين ساعه تقدر تلف مره او عده مرات بالطبع مستحيل تاخذ اكثر من لفه من طول المشوار بالطبع نزلت للبرجين التوأم من الباص عشان اخذ جوله فيها وللاسف طلعت مقفله يوم الاثنين تقفل لو انت لك رغبه بزيارتها حاول تسال متى تقفل بس اخذت فيها جوله حوالي ساعه فيها اسواق ماركات عالميه وبعدها انتظرت الباص السياحي وواصلت المشوار الاتصالات اخذت شريحتين من شركه سيليكوم وماخفيكم القول احسها رائعه باسعارها ومعقوله الصرف محلات الصرافه متوفره وبشكل مكثف فقط تاكد من انه بعض الاوراق النقديه ماتكون مقطوعه او مكتوب عليها بعض المحلات رفضت ورقه نقديه مكتوب عليها ومن حقك تطلب هالشئ من محل الصرافه نقاط هامه - الاقامه بكولامبور بنظره شخصيه بحته افضل تكون بخمس نجوم وبقيه المدن لو ماحصل الفايف ستار اربع نجوم رائعه كولا بعد ماترجع من التسوق والسياحه تحتاج لمكان مريح جدا - العفش وما ادراك ما العفش افضل شئ تاخذ ملابس على قدك وتحسبها حتى للاطفال كم راح تستخدم كل يوم افضل مايكون عفشك ذو وزن عشان لما ترجع ماتقصفك شركه الطيران بالوزن الزائد - لا تاخذ الجوازت معك ضعها بصندوق الي بالغرفه وبرقمك السري الخزنه اعني والقرنقش بعد لا تاخذ مبالغ كبيره ووزعها الي بتطلع فيها جزء معك وجزء مع المعزبه - الخريطه موويهمه لاي مدينه ولا يقول الواحد ماني فاضي بالعكس حلوه وسمعت نصيحه احد الاخوه خاصه الخرائط الي ماله خلق السياحيه حلو ومبسطه ممكن تكون لك وجهه بزياره مكانين وتروح لاول موقع بعدها ترجع للفندق تلقى الموقع الثاني بجنبه - بالمدن السياحيه خذ ترا وجهة نظر شخصيه بحته جوله بالتاكسي ههه راح تسمع جوله جوله ممكن تختصر الجوله بمزاجك وتختار المواقع والاماكن الي تحب تزورها - احرص على الوقت الكافي للوصول لاي مطار ماهو خساره توصل بدري وتكون امورك تمام هالنقطه احرص عليها بكل سفراتي حتى لو شحنت وقطعت كرت الصعود للطائره مانددم لو كان باقي وقت طويل الاهم اكون مرتاح وغير متوتر - السياحه ثقافه انقل صوره رائعه عن الدين الاسلامي تصرفاتك الشخصيه وسلوكك وتعاملك يعكس روعه شخصيتك - بعض الاطباق والمؤكلات بالمطاعم اكل الشخص يكفي شخصين لذا احرص انك ماتبذر ماهو بخل بس عدم الاسراف ولو بقى شئ اطلبه سفري وقدمه للسائق لا تخليه بالمطعم. - احرص على اختيار غرف غير المدخنين ولو براسك شئ دخن بالخارج فرصه تقلل والغرف افضل بكثير الخاصه بغير المدخنين بالطبع ماقولها مجاهره اني ادخن بس اطمع بدعواتكم الاخويه ان ربي يفكني منه. - التنقل بالخطوط الداخليه احرص على حجز مقاعد لك بجانب عائلتك - النوم مبكر روعه وتصحى لصلاه الفجر وبعدها يبدأ برنامجك ولا يمنع تاخذ قيلوله لا يفوتكم هالبرنامج راائع وغير مجهد - الكاميرا الخاصه فيك احرص وانت تصور تكون معلقه البعض فقد كاميرته بمويه البحر او النهر واماكن الشلالات احرص من عدم الانزلاق احيانا مايتم التحذير خاصه الطحالب الي على الصخور تعرضك للانزلاق لاقدر الله. - ماليزيا كتاب مفتوح وسهل فقط قم بقراءه الفهرس وخطط واحرص على الخريطه لكل مدينه تواقيت الرحلات والتنقلات من قرارتك بس من الروعه تجلس تخطط لبرنامج اليوم مع اهلك خاصه الي معه اطفال تشعرهم بالمسؤليه او مع زوجتك وهنا تكون فائده السفر التعلم تعلمهم لا يقول انا لي الراي وبس المشاطره بالراي والبرنامج ومشاركتهم رائعه اقلها لو ماضبط البرنامج نوعا ما مايلحقك ملامه منهم. - اخيرا كلوش انتهت التسوق وخلصت منه بالطبع يوم قبل الرحله انطلاق لبعض الاماكن الي مارحنا لها بعدها العوده والاسترخاء ومن ثم الاستعداد للسفر والعوده لارض الوطن ان شاء الله. - هناك برامج او اماكن او معلومات يمكن نسيتها العذر والسموحه واكيد فيه اخطاء بسيطه ولا هو عيب يتعلم الانسان من السفر والاحتكاك بشعوب العالم الاهم لا ننسى ننقل صوره مشرفه عن الاسلام وعن كل بلد تنتمي له هويتنا وسلامتكم واسف على الاطاله والتقصير.

فندق السن واي من الخارج وبعض الصور الداخليه للفندق

يتبع بقيه الصور

بينغ او بيانغ العذر والسموحه على الاخطاء الاملائيه وفندق فلامنجو

المسكينه طلعت عنونها هالصينيه

يتبع للصور

لانكااوي وما ادراك ما لانكاوي وفندق لانكاوي لوق ان وبعض الصور بالمدينه
اثناء الرحله بالعباره

قابلت شخص وسالته عن الاكواخ مانصح فيها عشان الحشرات والوزغ

متعه رؤيه الصقور او النسور وهي تصيد الاسماك

جزيره على شكل حذاء تكرمون عاد مقصصين الشجر مدري الله اعلم

الفندق

مدخل لمغاره الخفافيش او الكهف

العذر والسموحه وباقي صور كولامبور للاسف ماسعفني الووقت لتحميلها لي عوده ان شاء الله

وضعت دبوس على الموضوع حتى ارجع له
جميل يا جميل ؛ ما شاء الله
وحمد لله على السلامة

ما شاء الله تبارك الله
نفس الدبوس ( حق ) أبو جود ^^^^
وضعته ، لإن الموضوع حلو ، وفيه نقاط تستحق القراءة بتمعّن .
بس عودة ، وصباحك وردي أيها العنيد

اسلوبك جميل
ورائع البدايه بالكتابه ومن ثم الصور حتى لايتشتت القارئ ويفوت كثير من الجمل ويلتهي بالنظر