هلا أختي ....
بالنسبه لرسوم الماستر في الجامعه تقريبا 9000 باوند للسنه من غير السكن
السكن تقريبا من 300 الى 500 باوند في الشهر لان السكن انواع فيه طلاب البكالوريوس وفيه خاص لطلاب الماستر

شكرا يعطيك العافيه
بس هل فعلا السفارة سعودية اذا قدمت لها هناك اوراقك بعد ماتلتحق بالجامعة اول تيرم
تضمك للمبتعثين على حساب الدولة؟

العنود الرياض
بالفعل أختي ولكن يطلبون انه يكون المعدل طيب ويكون التخصص معتمد يعني لا يقل عن أربعة في التقييم غير انه قبل ما تدرسين يجب انك تقولين لهم هنا قبل السفر علشان يتسهل وضعك وتعرفين مالكِ وما عليكِ
مع خالص احترامي

يعني يكون من التخصصات المطروحة من قبل الوزارة ؟ مااعتقد فيها ادارة اعمال !!
وكذلك ان ادرس تيرم كامل على حسابي الخاص واجيب معدل بعدين اقدم لهم؟؟

اختي تقدرين تقدمين على بعثات الملك عبدالله بأي تخصص
حاسب و الا محاسبه
و اذا رحتي بريطانيا غيري التخصص من هناك
بعد ما تخلصين اللغه
يعني جيبي قبول بالقسم اللي تبينه اداره اعمال
و قبول ثاني للقسم اللي اخترتيه في البعثه (مثلا محاسبه و الا حاسب)
و ترى فيه ناس كثير سوو ذا الحركه
بس لازم تبلغين الملحقيه اول ما توصلين
و طبعا لازم تاخذين موافقه المشرف على دراستك
انا اعرف ناس بامريكا سوو كذا و عادي جدا
و سألت عن بريطانيا و قالو نفس الكلام

العنود الرياض
نعم أختي من التخصصات المطروحة من الوزارة وأحياناً يتساهلون بقبول تخصصات ما هم طرحينها ولكن بشرط انها تكون قوية وحاصلة الجامعة على تقييم جداً عالي في التخصص المرغوب دراسته
وتخصص ادارة اعمال تخصص مطروح ولكن بفروع شتى
اختي نعم تقدرين تحولين على مسار البعثة ولكن لازم تعطيهم خبر قبل البدء في الوزارة وعند الملحقية كذلك والله يسهل لكِ دربك ونشوفك دكتورة
مع خالص احترامي

اخوي ملبورن :
1- ماهي الشروط المطلوبة للتقديم لجامعات بريطانيا لدراسة ماجستير تخصص إدارة أعمال
2- هل يشترطون (الجامعات) رسوم معينة للقبول والضمان البنكي شرط للقبول ام لا
3- هل التقديم عن طريق النت مقبول ام يشترطون المراسلة البريدية التقليدية .

1- ماهي الشروط المطلوبة للتقديم لجامعات بريطانيا لدراسة ماجستير تخصص إدارة أعمال
شوف يالغالي التقديم مثل أي تقديم على اي جامعة ولكن في هذا التخصص يطلبون خبرة لا تقل عن سنتين او ثلاثة على الأقل وغير انه في بعض الجامعات تطلب أختبار مختص بأدارة الأعمال
2- هل يشترطون (الجامعات) رسوم معينة للقبول والضمان البنكي شرط للقبول ام لا
نعم يالغالي يشترطون والضمان المالي هو كل شي
3- هل التقديم عن طريق النت مقبول ام يشترطون المراسلة البريدية التقليدية .
نعم يالغالي مقبول وتحتاج ايضاً انك ترسل أوراقك
مع خالص حبي

اشكرك اخوي ملبورن على الرد وحول سؤالي على الضمان المالي متى يشترط تقديمه وكم تبلغ قيمته