1. بسم الله الرحمن الرحيم


2. السلام عليكم ورحمة الله وبركاته

بسم الله الرحمن الرحيم

السلام عليكم ورحمة الله وبركاته

كان الأهل يخططوا لإجازة الصيف ولهم رغبة بالسفر لأمريكا بس أنا رفضت بسبب ما يجده المسلمون من إهانة وقلتلهم نروح أوروبا أهون ( مسكينه مو دارية إن السكاكين كلها تموت) وبعد المشاورة والتحري وافق الأهل على الذهاب لأوربا وزيارة مدن مختلفة فيها وتم التخطيط كالآتي جدة - القاهرة – النمسا – ألمانيا – سويسرا - القاهرة – جدة.
وطبعا الأهل والحبايب أخذوا تهافتوا بالنصائح ندوش أنتبه على نفسك لا تسوي زي تركيا عارفين إيش حصل:114 قبل سنتين سافرت تركيا وكانت أول مرة أسافر بنقابي دولة أجنبية بعد إلتزامي والحمد لله وكان الجميع يصروا عليا إني أعمل بالطوا ملون وإلخ فرفضت بحجة إن هذا اللون رمز لبلدنا وأخواننا في السودان لما يجوا عندنا ما يغيروا عشاننا والهنود وباقي الدول فسافرت بالعبايه السوداء حفظها الله وعند تفتيش حق الجوازات نوقف واحد واحد ويقارن الصورة بالشخص فطلب مني الموظف فتح النقاب فرفضت وطلبت امرأة موظفة تشوفني وطبعا الأتراك مو كلهم يتكلموا إنجليزي فشوف كم سنه أنا ووالدي جالسين نفهم فيه بالإشارات حتى فهم طبعا أنا عصبت مرة:112: وجاءت السنيورة وقفت قدام الرجال وتقولي طيب يلا فكي وجهك ساعتها حسيت الشياطين تترقص قدامي:112: ومجهود أخر حتى فهمت وأخذتني بعيد وفتحت وجهي وغطيته بسرعة فقالت لا أفتحيه ما شفت كويس فعملت حركة خطيرة مديت لها لساني وسكيت وجهي ، السنيورة عصبت وراحت ونادت رئيسها والدنيا انقلبت في المطار بس لحسن حظي إن أهلي ماهم فاهمين إيش صار و الأتراك يبربروا وبابا مسكين يحسب عليه لأنه كان يتكلم مع ماما وسب الشرطية بالعربي و مشي الموضوع بأمان بس رحت لما وصلنا الفندق قلتلهم إيش صار طبعا ضحكوا بس الكل لامني أنا عارفة إنه خطأ بس من جد قهروني فلا أحد يسوي زي). فالكل من بعدها صار ينصحني وكده مايصير ولا تحسبي أوربا زي تركيا بس من جد خوفوني وصلنا القاهرة وجلسنا أيام ومنها على النمسا وأنا في الطيارة بس أدعي يارب تكون حرمه موظفة الجوازات تشوفني يارب ووصلت الطيارة ونزلنا مطار فيينا والحمد لله كانت موظفة وتم الموضوع بسلام، وطبعا الكل يطالع وفاتح فمه إيش هذه المخلوقه الغريبه الدنيا حر موت وهي مشتيه ومغطيه وأنا ماأخبي عليكم طول رحلتي النظرات هذه ما نحرمت منها أحيانا أكون سعيدة لأني قلت بيني وبين نفسي يمكن ما يسمحولي أتكلم معاهم عن الدين بس أكيد إن شاء الله حجابي يكون دعوة لديني وكنت أتعمد أتكلم إنجليزي أو أقرأ الخرائط قدامهم عشان يتأكدوا إن البنات المسلمات متعلمات وأكيد أحسن من بناتهم إلي الكثير منهم ما يعرفوا إلا لغتهم بس ، وأحلى حاجه العجايز لما يبحلقوا فيا ينتابني شعور والواحد منهم مبحلق وفاتح فمه بس أقول( بو) أحس إنه حينشف ويصير خشبه ويموت في ساعتها ، وأحيانا تضايقني نظراتهم وتزعجني بالذات في المطاعم يطالعوا وأحسهم يفكروا كيف هذه حتاكل هذه أكلت لحوم البشر هذه كائن فضائي .
وكمان الأطفال الشيء إلي كان مزعجني إني ماكنت أقدر ألعب معاهم ولا أمازحهم بس يطالعوا فيا ويتشبثوا في أهلهم فكان صراع داخل مشاعري حبي للأطفال وممازحتهم وخوفي لوقربت منهم حيخافوا مني ويصير أثبت إني المحجبات مرعبات بس في مرة من المرات رحنا سوبر ماركت و لقيت طفله في عربتها كلبوظه تجنن ما قدرت أقاوم أكتفيت وغمضتلها عيوني وفتحتها لها ضحكت وصارت تقلدني وتضحك قلت في نفسي هذه الطفلة مازالت على الفطرة (قوله صلى الله عليه وسلم‏:‏ ‏‏"‏كل مولود يولد على الفطرة فأبواه يهودانه أو ينصرانه أو يمجسانه") وتركتها وكملت مع أهلي بس ماما أنتبهت للطفلة نفسها وشدتها ( طالعه لبنتها حنونه) لعبت معاها ومسكت خدها فأهل الطفلة أنتبهوا فسحبوا عربة الطفلة عندهم خايفين ناكلها. يلا ما علينا .
وأكتشفت كمان إنهم يخلوا العرب ويحصروهم في أدوار مع بعضهم وبالذات ففي ألمانيا كنا محاصرين في الطابق الثاني والثالث عارفين ليه( الحدق يفهم ) والعاملين على تنظيف الغرف من المهاجرين العرب أغلبهم من إخوانا العراقيين فكانت امرأة تدعى أم كروان عراقية مسيحية تشرف على تنظيف غرفنا وبرضوا عارفين ليه ( الحدق يفهم) وكنا أي شيء نشتريه من مأكولات أو مشروبات غير مكتوبه بالإنجليزي نسرع لأم كروان عشان تقرأ الألماني وتوضح لنا إذا في كحول أو جيلاتين خنزير أكرمكم الله ، وعند مغادرتنا لألمانيا قالت لنا أم كروان مرة حفتقدكم أنا دايما أحكي زوجي عنكم وعن حرصكم في تطبيق دينكم وحأفتقد الآذان( عشان بابا الله يسعده لما يصلي يحب يأذن ويقيم للصلاة) وتقول أم كروان سامحوني لما كنت أسمع الآذان كنت أحط إذني على الباب لأني من زمان من يوم ماتركت العراق من 12 سنه ما سمعته .( يالله أم كروان مسيحية وتشتاق زينا للآذان والله إنه لحق لوكانوا يعقلون). يتبع