نبت الوسم
23-03-2022 - 08:27 pm
السلام عليكم ورحمة الله
حنا ناوين باذن الله نروح هالصيف لندن وهذي اول مره ماقد رحت لها من قبل ... والحقيقه مااحب اروح ديرة وانا مااعرف عنها شي فياليت لو توضحون لي اهم الاشياء اللي لازم اشوفها فيها .. مع العلم اننا 2 كبار و3 اطفال (12 _8 _5) والمدة 3 اسابيع ويفضل زيارة الريف الانجليزي بحيث ان السكن بلندن وباقي المدن نطلع لها ليلة واحدة ونرجع اخر اليوم.
ولو فيه دوله نقدر نروح لها مع لندن ياليت غير فرنسا لاننا شايفينها.
والسفر في شهر جولاي.
همتكم معاي وماتقصرون كعادتكم.
والسلام
اخي نبت الوسم الله يعافيك وبالعكس انا السعيد بالمشاركه وياك
انصحك تسكن ادجوارج رود لانه امان وفيه كل العرب وفي عمارة اسكن فيها اذا رحت لندن اسمها ووتر قيد فوق السيف وي وكل شي عندك وخصوصا البقالات والمطاعم العربيه
وطبعا ماتحتاج سيارة لان ادجوارد رود نهايته تكون حديقه الهايد بارك وشارع اكسفورد
وبالنسبه لغلاسكو فهي مدينه وعاصمه اسكتنلدا والطبيعه فيها خلابه تقدر تحجز من مكاتب السفر اللي موجوده هناك وبكثرة سكن وتذكره قطار وكل شي وهي تبعد بالقطار سبع ساعات بس مو شرط ساعات تكون اربع ساعات اذا كان الجو بارد لانه ياثر على القطار اذا كان الجو حار او دافي اكثر من اللزوم وهي مدينه خلابه وتستاهل الروحه والعنوة
اما اقرب دوله لك هي طبعا فرنسا تروحلها بالقطار اللي يربط فرنسا وبريطانيا تحت البحر
بس لو تبي نصيحتي تروح اسبانيا وتسوي رحله من هناك رخيصه وايد بس دير بالك لازم يكون عندك فيزا متعده لبريطانيا مو تاحذ فيزا لمرة واحده فقط
وطبعا فيزا اوروبيه او تشنغن لو تبي تزور اسبانيا او اي دوله اوروبيه وهناك راح تشوف كل الدول رخيصه لانها قريبه وفي وايد خيارات انت عاد ومزاجك