1. طيب الشنقن من وين نطلعها ؟


2. لالا باقي ,, باقي مستلزمات السفر


3. مايستفاد من الجزء الأول : :50055:

:smile002:
أصعب شي (---البداية---)
اتمنى ان اوفق في كتابة التقرير على الوجه اللي يخليكم تقرونه لآخر حته
وعلى رغم كثرة التقارير و تشابه الصور إلا أن ..
مابين السطور يحكي أحداث مختلفه عايشها كل واحد كتب تقريره
هذي تجربتي الأولى في المسافرون العرب ولكنني مطلع قديم وباستمرار لكل مايكتب
شكر خاص جداً للأخ الكبير - المايسترو ( المرشد السياحي ) اللي اجبرني على زيارة لندن وباريس بعد ماقريت تقريره :x1:
=====
الصراحه قبل مااكتب التقرير فكرت :upset: بالاشياء المهمة اللي لازم اضمنها في التقرير مثل تخطيط الرحلة وتكاليف جميع الأشياء
وكثرت من الصور بس بنقي الأحلى .. تعالوا نشوف كيف قسمت هالتقرير
الجزء الأول : ماقبل السفر - الحجوزات (طيران وفنادق) واستخراج الفيزا ومستلزمات السفر
الجزء الثاني : أحداث السفر - الرياض - باريس ثم السفر إلى لندن مباشرة عن طريق اليوروستار
+ الوصول إلى لندن + تفاصيل أيام السفر
الجزء الثالث : الوصول إلى باريس + تفاصيل أيام السفر ( سيكون في البوابة الخاصة بفرنسا )الجزء الأول : ماقبل السفر - الحجوزات (طيران وفنادق) واستخراج الفيزا ومستلزمات السفر
تم الحجز على الخطوط الجوية العربية السعودية بسعر 3600 للشخص الواحد
المغادرة من الرياض إلى باريس 15 اغسطس(8) 2008 - يوم الجمعة الساعة الرابعة وخمس وعشرون دقيقه فجراً
طبعا المكتب اللي قصيت منه التذكرة قال لي ترى التذكرة اللي قصيتها مخفضة بمعنى انه لو جيت بكنسلها قبل مااسافر بيخصم مبلغ 250 ريال على التذكرة
واذا سافرت إلى باريس ذهاب فلا يحق لي استرجاع المبلغ حق العوده نهائياً أي تذكرة ( غير مستردة )
واللي حدني على السعودية اني ماقررت السفرة الا قبل موعد السفر بشهر بس فلقيت الرحلات كلها فل حتى العودة مدبرينه بواسطه بعد ماارسل لنا واحد
يشتغل بالخطوط برقية لجده وأكده لنا قبل مانسافر .. على العموم اللي بيسافر يستحسن انه يخطط من بدري لانه بيلقى عروض ارخص وعلى طيران افضل
بس اغسطس زحمه اصلا (موسم) .. لان فيه ناس ماشالله حجزوا على 2200 ريال من بدري

طيب الشنقن من وين نطلعها ؟

الفيزا لبريطانيا كلكم تعرفون انها غير فيزا (الشنقن) حقت دول الاتحاد الاوروبي بس بريطانيا ملقوفه ماانضمت لهم علشان كذا عملتها غير وفيزتها غير وناسها غير .
على العموم كانت السفارة الفرنسية علشان تعطيك موعد يبيلك 21 يوم وتقعد 21 يوم مايحق لك تقول هاه وش صار على فيزتي .. وهذا يعني اني ماراح اسافر فقلت مالك الا السفاره التشيكيه .. اجراءاتهم سهله مره .. رحت يم مكتب ممتاز جدا اصلا هالمكتب مختص بالمصحات التشيكية بالرياض - طريق الملك عبدالله
ولاابي اقول اسمه علشان مايعتبر دعايه لاني قاري شروط المنتدى زين علشان هالمشاركة تبقى ناصعة البياض .. المهم عطيته 350 ريال للشخص رسوم السفاره و200 رسوم المكتب و 75 ريال رسوم تأمين للشخص لمدة اسبوعين يعني التكلفة للشخص الواحد 625 ريال .. فيزا متعددة الدخول لان رحلتي لباريس ( الآن احسبوا هذي دخله ) ثم بطلع للندن ( هذا خروج من منطقة الشنقن ) ثم برجع لباريس ( هذي دخله ثانيه ) والسبب في ذلك مالقيت عودة من لندن للرياض والا كان رحت( الرياض - باريس - لندن - الرياض) فهذا اللي خلاني اروح ذهاب واياب لباريس واتنقل بينهم بالقطار وأخلي باريس آخر شي .
الرجال أخذ مني الجوازات وصورة لبطاقة الصراف العادية ((( عطيته كشف الحساب لست شهور بالانجليزي وعليه ختم البنك ))) قال خله معاك مااحتاجه تكفي صورة بطاقة الصراف العادية وجبت تعريف للسفارة التشيكية وصورتين شخصية بخلفية بيضاء وهو تولى الباقي من تأمين طبي وحجوزات وهمية للفنادق والطيران .. واخذ الجوازات وبعد يومين دق علي قال تعال خذ جوازاتك رح قدمهم للسفارة البريطانية علشان الفيزا ..
رحت يم السفارة البريطانية بالسليمانية والأخ المايسترو ماقصر بشرحه عن طريقة استخراج الفيزة البريطانية وهذا هو الرابطhttps://artravelers.com/p/re/188299
الا ان المايسترو كان عزوبي يوم راح فاللي بيعبي النموذج اذا جيت يم خيار كم عدد الاشخاص اللي بيسافرون معاك وكتبت 1 والا 2 الخ راح تنضاف كم شاشه صغيره
فيها معلومات اللي بيروح معاك ..
فرضا بتروح انت وزوجتكالمره الأولى اكتب بياناتك وعدد اللي بيروحون معاك اكتب واحد .. بيقول اكتب بيانات هالواحد .. رح واكتب بيانات زوجتك ( اطبع الطلب بعد ماتخلص )
ثم المره الثانيه لازم تعبي نموذج جديد باسم زوجتك وتكتب عدد اللي بيروحون معاها واحد .. بيقول اكتب بيانات هالواحد .. رح واكتب بياناتك انت يالزوج ( اطبع الطلب بعد ماتخلص )
الخلاصة : كل شخص بطلب واذا كان معاك مرافقين تسجل جميع بياناتهم .
طبعت الطلبات وجبت من عملي تعريف بالراتب موجه للسفارة البريطانية وصورتين شخصية رغم انهم قالوا وحده بس بخلفية بيضاء وكشف حساب من البنك
معلومه هامه : مايحتاج حجوزات طيران ولا حجز للسكن ( المعلومه ميه ميه )
اهم شي تجيب قيمة كل طلب وهو 520 ريال لكل فيزة ( الفلوس كااش لان ماعندهم شبكة ) .. يسألونك تبي نرسل لك رسالة على جوالك اذا خلصنا امورك ادفع 5 ريال ( وهذي أفضل بدل ماكل شوي تدق عليهم ) ..
يطلبون منك بصمات لكل اصابيعك ثم يلقطون لك صورة سبيشل عندهم وانت مصلّع ( مكشوف الرأس )
المهم جتني رساله بعد اربع ايام تعال استلم جوازاتك ( في الأوقات العادية لغير الموسم يوم يومين بالكثير ومخلصينها ), استلمتها ثم وديتها للمكتب علشان يوديها لسفارة التشيك قعدت اربع ايام قال تعال خذ الجوازات لان الشنقن جاهزه .
من يوم عطيتها المكتب عشر ايام والله .. وقت سريع جدا رغم زحمة العالم في اغسطس
خلصنا من الجزء الأول ؟

لالا باقي ,, باقي مستلزمات السفر

طبعا الاغراض عباره عن شنطتين (عائلية) وشنطة ظهر الأولى للملابس والأخرى للمعلبات والحركتات الخفيفة , الشنطة الثانية اللي فيها المعلبات وانت راجع راح تكون مستفيد منها في اغراضك اللي تسوقتها
فيه شنطة ظهر خفيفة حقت الطلعات والتمشيات فيها : كاميرة الفيديو وكاميرة الديجتال والخرائط وبعض البساكيت والبطاطس والشوكولاه واحيانا اذا رايحين لمكان بعيد نحط فيها ساندويش الغدا وكولا ومويا .. قولوا ماصارت شنطة خفيفة .
سبحان الله اكلهم ماتشتهيه .. يمكن لاني حاط في بالي ان كل اكلهم فيه مشتقات الخنزير .. حتى ماكدونالدز قريت انهم يستخدمون زيت الخنزير فكرهت اكلهم مره .. فقلت الله يخلي جيان وانواع المعلبات والحمدلله من احلى مايكون .
صرف العملة : فيه في البطحاء محلين مشهورات مرره للصرافه صرفت منهم وعطوني اليورو ب 5.68 ريال والباوند ب 7.32 ريال علما ان فيه ناس اعرفهم صرفوا اليورو
بسعر 6 ريال قبلي باسبوعين تقريباً فالسعر متذبذب .
حجوزات الفنادق : حجزت عن طريق موقع http://www.Expedia.com
والجميل في هالموقع انك تقدر تحجز وتلغي على كيف كيفك بس انتبهوا بعض الغرف تلقى مكتوب جنبها غير مستردة وهذي قليل
انا حجزت اوتيل Quality Crown Paddington Hotel في لندن

وهذا موقعه من أقمار قوقل (اللي باللون الاورنج)
اقرب اندرجراوند له هو Paddington ويبعد الاوتيل عن المحطه 3 أمتار ونص

الحجز كان عن طريق الموقع اللي قلت لكم .. بعد كم يوم قلت ليش مااروح لموقع الاوتيل نفسه على الانترنت - الله يخلي قوقل
وفعلا بحثت ولقيت موقع الفندق وانا اشوف الاسعار لنفس الفترة .. الا وتطلع ارخص بفارق حلو مره واروح واكنسل من البوكينق واحجز عن طريق الموقع نفسه
مايميز الاوتيل اللي بلندن قربه من محطة البادنقتون وهي محطه خطيره مره ملاصقه للاوتيل من احد جوانبها ومن الجانب الآخر الهيلتون اللي سكن فيه المايسترو
الموقع من جد خطير انصحكم فيه حتى الاوتيل اربع نجوم نظيف مره وخدمتهم حلوه وسعره كان من دون افطار 91 باوند لليلة الواحده = 680 ريال لليله
صور للاوتيل في لندن بعد ماوصلناه من عدسة كاميرة صايق ضدري .

هنا كاتبين اسمي الصدقي بالشاشة بس مايمديكم حذفت اسم العائلة علشان ماتعرفوني :8888:

مايستفاد من الجزء الأول : :50055:

• * اللي يطلع الشنقن من اي سفاره ماهو لازم تكون محطته الأولى نفس السفاره اللي طلع منها الشنقن .. لاني كنت متخوف وقريت سبعين موضوع ان اللي يطلعها من سفارة كذا لازم يمر بكذا .. كله كلام فاضي .
• * احجز من بدري علشان تاخذ اسعار ارخص للطيران والفنادق
• * لاتحاول اللجوء إلى المكاتب السياحية عند الرغبة في حجز الفنادق والتنقلات نهائيا فاسعارهم اجرام ولنا في ذلك قصة لاحقة .
• * خذ معاك معلبات لان اكلهم اغلبه ماهو حلال وخل اعتمادك هناك على الخبز والكولا والمويا والايسكريم وهالحركات الخفيفه .
• * ضع في شنطة السفر مناديل معطره وأخرى عادية ذات الحجم الصغير وجل تنظيف اليدين بعد الأكل لان بعض الوجبات ستتناولها خارج الفندق وبروفين لانك يمكن تصدع

ولمستخدمي النظارات مثلي عدسات لاصقه يوميه أحلى علشان اذا جاء المطر ماتقعد ساعه تنظف في نظارتك .. ولاتنسى أخذ شمسيه قصدي مطريه لانهم يستخدمونها للمطر
وخذ شاحن لجوالك وقلم لانك بتستخدمه بالطياره علشان تعبي النموذج وفي المطار برضه فمالها داعي تقلق خلق الله .

• * لمعرفة توقعات الطقس في لندن http://uk.weather.yahoo.com/UKXX/UKXX0085/index_c.html
• * اللي بيجي لمطار هيثرو ويبي تاكسي اوفر وعن بهذلة الاندرجراوند إليك هذا الموقع http://www.londonconnexions.com/

تقدر تحجز عن طريقه وتعطيهم رقم رحلتك .. بس اقرأ الشروط زين ترى كل تأخير بساعه عليه 15 باوند واذا كنسلت يروح عليك 5 باوند الخ دقق لاتتوهق
بهذا وصلت إلى نهاية الجزء الأول .. وانتظروا الجزء الثاني قريبا :36_2_66: