وعليكم السلام
لاتشيل هم وتطمن ياغالي ان شاء الله بنفيدك بكل الي نقدر عليه
لكن ابغاك ماتنساني من دعواتك
شف ياغالي اتوقع انك اول مره تسافر وعادي تحصل امور التردد في المره الاولى وماهو شي جديد
مسألة المناطق والاماكن هذي تعتمد عليك لأن ممكن تعجبك منطقة ولكن انا ماتعجبني وكلن وجوه وهواه
يعني كمثال انا احب جزيرة بالي حتى مع العائلة لكن غيري مستحيل يروح لها بسبب كثرة الاجانب واللبس الخادش هناك
مدتك الصافية 15 يوم وكافية جداً لزيارة العمة
مدري بسألك كم سؤال وبعدها بنعرف وش تحب ونضبط امورك ان شاء الله
هل تحب الرحلات البحرية ؟
هل تحب التسوق والمجمعات ؟
هل مفكر تسكن في فلة وفيها بركة سباحة ؟ وتعيش جو الفخامة ؟
وش الي تكرهه ؟
بالنسبة لي اكره المتاحف والمناطق الأثرية
ادري اسألة مدري وش تبي ههه لكن ابي اشوف وش تحب ووش تكره
ونضبطك ونغير اسمك الى ( عريش متضبط )

هلا وغلا اخوي علي الله يعطيك العافيه والله اثلجت صدري والله الشاهد اني اول ماشفت بداية ردك طلعتلك دعوه من صميم القلب
وبقولك كل شي حتى الميزانيه
اول شي ابعدني عن التسوق والمتاحف ما ابيها تكون بالرحله خير شر انا ابغى طبيعه للجبل ونفسي اضبط نفسي لبالي بسكن فيه مسبح خاص وجو عرسان لو يومين ع الاقل ميزانيتي بدون التذاكر 20 الف واللي ناقصك ومحتاج تعرفه انا موجود وكل شوي بدخل ع المنتدى واشيك لان الموضوع شاغل فكري كثير

وينكم يا اهل الفزعات

بقولك حاجه حلوة مفلطحه من الجانبين :
خذ ورقه وقلم وخذ لفه في المنتدى .. وسجل الجداول .. المقترحه وتقريبا عندك 3 مدن بلا هياط
(جاكرتا والجبل وبالي وجاكرتا مره ثانيه ) طيب وزع الليالي
2 جاكرتا
6 الجبل مثلا
5 بالي
3 ليالي جاكرتا وانت راجع او ربما تزيد الجبل شوي
طيب الان حددت المدن
ادخل على خيارات السكن وحده وحده
جاكرتا فندق وبوكنج يهرج
الجبل ياكثر التقارير عن الفلل حدد لك فيلا واتصل عليهم اتصال او القط رقم سواق
وهكذا ..
شغل اسبوع كل ليله ساعه على الانترنت تطلع لك الرحله بنسبه 80 % والباقي الشباب مايقصرون
ودمت مبسوطا ايها العريس المزركش

يعطيك العافيه اخوي الاعرابي والهياط لابد منه لزوم الكشخه ماقصرت نبذه حلوة وزركشه احلى واتمنى اخواني الباقي يشاركوني واسمع ماهو مفيد من الكل

ما قصروا الشباب الله يعطيهم العافية ..
الميزانية طيبة جداً يعني يوميتك شاملة السكن والتنقلات والتذاكر الداخلية 355 دولار وهذه
تعطيك خيارات ممتازة للسكن ..
توزيع الأيام طالما لا تحب الأسواق والمتاحف نقلل أيام جاكرتا ..
جاكرتا 1 -- بالي 5 -- باندونق 3 -- الجبل 5 -- جاكرتا 1
إذا ما تحب التنقلات الكثيرة تلغي باندونق من الجدول وتختصر أيامك على 3 مناطق :
جاكرتا 1 -- بالي 5 -- الجبل 7 -- جاكرتا 2
نتفق على التوزيع وبعدها نحدد خيارات السكن يا عريس ..

الله يسعدكم جميعا وجزا الله خير كل شخص فيكم كتبلي حرف
لاني احتاج خبرتكم من واقع انكم زرتوها وافهم مني فيها
اخوي المصباح ياهلا فيك يامشرفنا
الجدول الثاني جميل جدا بس بسوي عليه تعديل وراح يكون كالتالي
جاكرتا 1 -- بالي 4 -- الجبل8 -- جاكرتا 2
وماعندي اي مانع اني اتقبل نصيحة اي شخص

استفسار حتى تكون الصورة واضحة .. !!
متى تاريخ رحلتك !! هل وصولك جاكرتا في وقت متأخر بالليل حتى نحدد الفندق لأنه إذا كان
بالليل يكون السكن بالقرب من المطار وإذا في الصباح نختار فندق قريب من مولات وأسواق ..
الجبل طبعاً خيارك الأفضل فندق سيروني 3 لأن الفيلا كبيرة عليك وما تحتاج مسبح فالجو بارد
في كل الأحوال ولا تستفيد منه حسب رأيي بعكس بالي ..
فندق جاكرتا في الأيام الأخيرة من رأيي بولمان سنترال لعدد من المميزات منها أنه قريب من المطار
وقريب من المولات ويناسب العرسان ..
وإذا تحب تدلع نفسك على الأخير هناك خيارات أفخم بكثير ..
معلومات سريعة ..

• - حجز الطيران الداخلي عن طريق اسيا اير ..
• - تحتاج فيزا دخول وقيمتها 25 دولار للشخص الواحد وهذه تأخذها من مطار جاكرتا
• - في الطائرة يوزع عليكم كرت الدخول وتعبيه وهناك موضوع يترجم الكرت إذا كانت

اللغة الإنجليزية عندك ضعيفة ..

• - تحتاج سائق خاص في الجبل ويوجد موضوع مثبت بأرقام السائقين تتفق مع أي واحد منهم

وهذه موضوعها سهل إن شاء الله ..

ماقصرو الاخوان الخبراء افادوك كثير
انا اشوف تمشي على الجدول الثاني لحبيبنا المصباح
جاكرتا 1 -- بالي 5 -- الجبل 7 -- جاكرتا 2
اما جدولك حلو لكن 8 ايام في الجبل كثيرة
تقدر تزور الجبل او شي بعدين تروح بونشاك
والخيار لك بلغنا ونفيدك لأن اذا تبغى بالي لاتحجز على جاكرتا خذلك حجز على بالي ثم بعدين احجز من بالي الى جاكرتا وزيارة بونشاك
بس على فكرة بخصوص بالي كيف لغتك الانجليزية ؟
بالنسبة لجاكرتا لاتجيها دامك منت راعي تسوق ابداً لكن تقدر تأخذها محطة ترييح قبل السفر اذا حاب تريح