عن قرب
26-12-2022 - 08:21 am
السلام عليكم ورحمة الله وبركاته..... أما بعد
أحب أحيي القائمين على هدا الموقع المتميز والفريد من نوعه والاعضاء المشاركين فيه
على جهودهم ومشاركاتهم الحلوه والتي تستحق كل التقدير والاحترام والي تقدم الكثير
من النصح والمشوره الى الجهتين اما الطلاب أو السياح في نفس الوقت , وياريت تقدروا
تخدموني من خلال تجاربكم الي مريتوا بها في الماضي والحاضر , أنا الصراحه طالب
في الصف الثالث ثانوي طبيعي من المملكه العربيه السعوديه وعمري 18 سنه وسوف اتخرج
بعد شهر ونصف من الان تقريبا وأرغب في الدهاب الى كندا لغرض دراسه اللغه الانجليزيه
ومن ثم الالتحاق باحدى الجامعات المعترف بها في المملكه ودراسه تخصص هندسه الكمبيوتر
ولكن لا أعرف من أين أبدا فليست هنالك معلومات اكيده من جهة الاصدقاء او الاقارب عن الدراسه
أو السكن او المناطق الجيده في المقاطعات الكنديه والمبالغ اللازمه للدراسه والمعيشه هناك
لكل شهر او سنه وهل اقدر ان اعمل بوظيفه مسائيه مثلا لتوفير نفقات معيشتي ودراستي
والاستغناء عن المبالغ المحوله من الاهل , وهل يوجد في كندا قروبات سعوديه او خليجه او عربيه
اقدر الالتحاق بها والسكن معها ....... *
أخوكم
Moayad
من المنطقه الشرقيه
السلام عليكم ورحمة الله
اخوي الصغير : عن قرب
انا خريج الكلية التقنيه في تخصص تكنلوجيا السيارات وكانت رغبتي اني ادرس وحصل على شهاده في تخصص يكون نادر وغير متوفر في السعودية. وكنت في نفس الوقت اللي ادرس فيه في الكليه اشتغل في شركه فيها مجموعه من الكنديين ، ومعهم شهادات هندسه في مجال لالكترونيات.اقنعوني الكنديين هذولي اني اروح الي كندا ودرس في نفس المعهد الي هم درسو فيه ، وكان رايهم اني ادرس في مجال الكترونيات السيارات لانه كان من التخصصات النادره ولا فيه في السعوديه اي شخص معه شهاده في المجال هذا.
جمعت فلوسي وبعد ما تخرجت من الكليه توكلت على الله وسافرت الى مدينه فانكوفير عام 1995 ، كنت مجمع حوالي 30000 الف ريال وكنت عارف انها ماهي كافيه طوال فترت الدراسه وللي كانت لمدة سنتين ، لكن كنت مفكر نفس تفكيرك ولي هو اني اشوف لي شغل يساعدني على المصاريف.
التحقت بمعهد يعتبر افضل معهد في كندا في مجال التكنلوجيا بجميع انواعها ، نفس المعهد يقدم دورات ممتازه في اللغه الانجليزيه ، لكن الحمد لله لغتي الانجليزيه كانت جيده ولا احتجت اني ادرس انجليزي عشان اقدر اخذ دورة الكترونيات السيارات.
المعهد كان ممتاز والمحاضرين كانو قمه في الاخلاق وفي التعامل مع الطلاب ، والطلاب كانو خليط من جميع الاعراق عشان كذا ما تحس انك غريب.
قبل ما انسى المعهد اسمه معهد برتش كلومبيا للتكنلوجيا.
British Columbia Institute of Technology
وممكن تروح لموقعهم عن طريق الرابط هذا
ادعس هنا http://www.bcit.ca/
تكلفة الدوره في المعهد كانت تعتمد على المواد الى تاخذها في كل ترم , تكلفة الترم الواحد اذا اخذت الحد الادني من المواد كانت حوالي 10000 ريال.
ممكن تسكن في سكن الطلاب الملحق باللمعهد ويكلفك حوالي 500 ريال في الشهر ، او ممكن تتهور وتصير زيي وتستاجر شقه مفروشه بحوالي 1500 ريال في الشهر.
طبعاً المبلغ الي معي ما كان يغطي كل التكاليف هذي ، عشان كذا دورت لي على شغل ، ولكوني معي شهاده في ميكانيكا السيارات وخبرتي في السيارات جيده ، بديت ادور على عمل في ورشة سيارات.
كان البحث عن وظيفه من الجرايد وكان فيه طلب كبير على ميكانيكيه السيارات وكان الراتب بالساعه حوالي 80 ريال وهذ مبلغ ممتاز ، المشكله كل وظيفة اقدم عليها كان يطلبون من ترخيص عمل كاميكانيكي ، و بطاقة تامينات اجتمعيه ما تصرف الا للمواطن الكندي او للشخص الي جاي علي تاشيرة عمل ، ولكوني ما عندي لا رخصه ولا بطاقه ما قدرت اشتغل في المجال هذا.
قدرت اشتغل في محلات ما تدفع الا الحد الادني من الاجور الي هي حوالي 15 ريال في الساعه لانهم ما يطلبون لا رخصة ولا يطلبون يشوفون بطاقة التامينات الاجتماعيه ويدفعون لي يومياً على حسب الساعات الي اشتغلها . صحيح انهم ما يطلبون بطاقة التامينات الاجتماعيه ولاكن يطلبون منك تعبيه نموذج عمل من ضمنه خانه لرقم البطاقه ، انا كنت احط رقم من راسي ولا من شاف ولا من درا.
وللي يميز العمل بلحد الادني من الاجور ان الدوله ما تقتطع من راتبك ضرايب عشان كذا محد درا اني حاط الرقم من راسي.
اشتغلت في اكثر من محمل ، منها طباخ بيتزا في دامنوز بيتزا وشتغلت سواق اوصل للناس طلباتهم من الاكل الي يطلبونه من مطاعم معينه .
طبعاً لاني كنت ادرس ما كنت قادر اشتغل ساعات كثيره والمبلغ الي يجيني من العمل كان قليل وياله يخارج ، والفلوس الي كنت جايبها معي قضت.
بعد ما كملت حوالي 9 اشهر في كندا وبعد ما تقفلت في وجهي من كل جيهة ضفيت عفشي ورجعت للسعودية ولا كملت دراستي.
المغزي من القصه هذي اخوي عن قرب هو اذا ما كان عندك مصدر مالي يدعمك اثنا الدراسه اقعد عند اهلك احسن لك ، ولا تفكر انك تبي تلقا شغل يساعدك في المصاريف.
وذا كنت مازلت مصر على الدراسة في كندا ، انا جاهز لكل ما عندك من استفسارات.