حياك الله اخوي في بلدك الثاني ..
اولا المعهد البريطاني يقع فالسلمانيه - الزنج
المعهد الامريكي يقع فالجفير .. فتأكد ايهم اللي تبغيه ..
المعهد البريطاني يقع في شارع بين ديري كوين السلمانيه ومسجد الخميس ..
اما المستشفى العسكري فيقع فالرفاع .. بعد ماتخلص الهاي وي توصل لدوار كبير اسمه المتعارف عليه دوار مدينة حمد تاخذ يسار مدينة حمد تكون على يمينك والرفاع على يسارك فانت تاخذ يسار للرفاع او تمشي سيده يقع المستشفى العسكري في 3 اشارة مرور بتشوفها من بعد الدوار ..
بالنسبه للسكن فالبحرين مثل ماشفت في قوقل ارث صغيره جدا جدا .. اي سكن راح تسكن فيه مابيكون قريب .. نصيحه اذا انت ياي انت او زوجتك فقط فالمركز اهوا فندق المركيور او اجنحة السيف او ايليت السيف ..
الاماكن السياحيه ( مجمع السيف , مجمع العالي , متحف البحرين الوطني , جنة دلمون المفقوده , منتزة عذاري)
المجمعات فالايام العاديه هاديه واكيد تقدر تتمشى فيهم براحتك مع اسرتك .. وان شاءلله مافي مضايقات
سوق البحرين والخبر متشابه والمسافه جدا قريبه فانت وعائلتك تقدرون تحكمون اذا وصلتو ..
شقق Eliet او Novotel بعد وايد حلوه ..
واي استفسار ثاني حاضرين

1. مرحبا أخوي نفس ماقالت اختي ozyee المستشفى العسكري في الرفاع

مرحبا أخوي نفس ماقالت اختي ozyee المستشفى العسكري في الرفاع

اما عن الشقق طبعا فندق الميركيور غراند فندق راقي وخدماته ممتازة وطبعا اهو بالضبط عند مجمع السيف وقريب من مجمع العالي. وطبعا تقدر من هناك تاخذ الشارع السريع وتوصل للمستشفى العسكري في تقريبا 15 دقيقة او 20 دقيقة.
وفندق النوفوتيل وايد حلو وخدماته رائعة واهونفس المنتجع عند البحر وفيه نشاطات بحرية حلوة وموقعه عند جسر السيخ حمد ( المحرق )
الاماكن السياحية :
جنة دلمون المفقودة ( برك سباحة والعاب مائية وايد حلوة ) وفي يوم خاص للنساء فقط يوم الخميس من الساعة 7 المغرب الى 11 في الليل.
منتزه عين عذاري ( مدينة ملاهي حلوه توها مفتوحة )
متحف البحرين الوطني ( وايد حلو وانصحك اتروح اتشوف)
سوق المحرق ( سوق شعبي واتحصل كل محلات الحلوى البحرينية)
وطبعا المجمعات :
مجمع السيف
مجمع العالي
مجمع الدانة
مجمع مودا مول
وطبعا تقدر تسكن في الخبر بس راح اتصيدك زحمة جمارك الجسر خصوصا في يوم الخميس والجمعة والاربعاء . فانصحك تسكن في البحرين ومرة وحدة اتعرف على البلد والاماكن الموجودة فيه .
طبعا تقدر اتروح كل المجمعات وتتسوق براحتك واكيد مافي مضايقات بس الاحسن انك تبتعد عن شارع المعارض لانه وايد زحمة ومايصلح حق عوائل .
واتمنى لكم كل التوفيق وماعليكم شر ان شاء لله
وان شاء الله تستمتعون في زيارتكم البحرين
وصدقني اذا انت كنت متخوف من البحرين ترى البحرين بلد شعبه طيب ومضياف ومستحيل اتحصل
اي مضايقات او اي شي.

OZYEEE
مسكورة اختي الغالية على المعلومات القيمة ...
انا قادم بإذن الله لإمتحان ( ايلز ) بالمجلس الثقافي البريطاني ( بريتش كونسل )
بالنسبة للي مكتوب بالأحمر ( قصدك بيكون كل شي قريب ؟ )
بالنسبة للتعليق ( المجمعات فالايام العاديه هاديه ) مادري ممكن توضحين ؟ فسه ايام مب عادية ؟ والا قصدك ما اجي ايام الأربعاء والخميس والجمعه عشان الزحمه ؟
مشكورة على الأماكن السياحية وراح اجمع عنها معلومات باذن الله
ومشكورة على السكن ..

بحريني وفتخر
جزاك الله خير اخوي على الرد
انا مب متخوف من البحرين انتوا كحل عيوننا وتاج رؤوسنا
لكن تعرف ياخوك انا باجي ان شاء الله مع زوجتي و3 اطفال صغار ولا ابي احط اهلي في مواقف حنا في غني عنها فحبيت اسأل عن كل شي ولا تاخذون على خاطركم مني والله لكم معزه خاصة عندنا يا هل قطر
مشكور على الأماكن السياحية وراح ابحث عنها ان شاء الله في المنتدى
ومشكور على توصيف الطريق ..
وجزاك الله الف خير ...

حياك الله أخي الكريم .... وحنا كلنا اهل وحبايب ...
الاخت ozyeee واخوي بحريني وفتخر ما قصروا ....
بالنسبة لاستفساراتك ...
المجلس البريطاني ... والمستشفى العسكري ... ما بتلقى جنب أي واحد فيهم سكن قريب ... ذا اللي قصدته الاخت ...
مثل ما اقترحوا عليك ... يفضل السكن قرب مجمع السيف ... أجنحة ميركور ... أو أحد فنادق وشقق إليت ...
المسافة من منطقة السيف إلى المجلس البريطاني قريبة ... في حدود 15 دقيقة تقريبا ...
وإلى المستشفى العسكري يمكن تكون في حدود 20 دقيقة أو أقل ... على الطريق السريع ....
المجمعات في أيام الاسبوع العادية الأحد - الأربعاء ... عادة تكون أهدأ من نهاية الأسبوع ...
وتقدرون تتمشون وتتسوقون وتروحون كل مكان وتاخذون راحتكم ... وبدون أي مضايقات ... مابتشوفون الا كل الخير ...
بالنسبة للاماكن السياحية والترفيهية .... موجودة بكثره في البوابة ... وممكن تراجع المواضيع المثبته أخي الكريم ...
حياكم الله في بلادكم البحرين .... ومكانكم عيوننا ....

الله يسلمك أخوي وانتوا بعد في عيونا واخوانا وحبايبنا
اما عن المجلس الثقافي البريطاني ترى مو في الجفير اهو في منطقة السلمانية
اما عن المجمعات الايام العادية من الاحد لي الاربعاء اتكون هادئة بس يوم الخميس والجمعة والسبت
اتكون اشوي زحمة لانها اجازة الاسبوع اخوانا الخليجيين ايكونون متواجدين .
واهم شي نفس ماقلت لك حاول اتجنب شارع المعارض اما باقي المحلات ترى كلها عائلية وماراح تنزعج من شي.
واي سؤال لاتتردد

مشكور اخوي بحريني على ردك الكريم
طيب تعرفون اسم فنادق في منطقة السليمانية عشان انا لقيت فنادق على النت شكثر لكن مب مكتوب المنطقه !
ابي احجز واخلص ..
بعدين عندي استفسار التكاسي متوفرة عندكم ؟ وهل اقدر اطلبها من الفندق ؟ لأني احتمال اجي على طيارة بإذن الله
جزاكم الله خير

اخوي البحرين صغيره .. يعني لو بتقعد بآخرها .. بتكون قريبه من أولها ^_^
خذ فنادق في منطقة السيف مثل ماقالو الأخوان .. مثل عندك فندق ميركيور ( 4 نجوم ) او الريتز (5 نجوم )
او عندك فندق اليت جراند .. او اليت سويت ( مقابل مجمع البحرين ومجمع الدانه )
منطقة السيف تعتبر بالمنامة .. والجفير والسلمانية هي مناطق بالمنامة يعني ماراح يكون الفندق بعيد عن البرتش كانسل ..
ماعدا العسكري بيكون بالرفاع ويفصل بينه وبين منطقة السيف فقط شارع واحد .. الشارع السريع ( الهايوي )
واذا كنت تبي تسكن بمنتجع او شاليهات عندك النوفوتيل حلو كثير ..
التكاسي اكيد متوفرة .. وتقدر تطلبها من الفندق ومن المطار .. ولا تحاتي ..
وبالتوفيق ان شاء الله

أخوي انا بصراحة انصحك تسكن في الميركيور غراند الي عند السيف او مجموعة فنادق اليت ( اليت غراند وغيرها ) لان ماعتقد في السلمانية في فنادق عدلة واذا لقيت ماعتقد راح اتكون نظيفة او عائلية .
وترى المسافة قصيرة يعني بي 10 دقايق او 15 اذا في زحمة .
ونفس الشي المستشفى العسكري انت بتروح على الشارع السريع وبتوصل الرفاع يعني تقريبا 20 دقيقة .
بس الاهم انك اتكون سكنت في فندق نظيف وخدماته ممتازة وبعدين تقد راتمشى في مجمع السيف او العالي.
والتكاسي موجودة والفندق اكيد بيطلب لك اذا تبي .
وبالتوفيق